Coss Ear2
lakbima.lk
COSS Ear 1

රජයේ පාසලක සේවයේ නියුතු අවිවාහක තරුණ ගුරුවරියක සමඟ අවිවාහයෙකු ලෙස පෙනී සිටිමින් පැවැත් වූ සබඳතාව බිඳ  වැටීමෙන් අනතුරුව පරිගණක ආධාරයෙන් ඇගේ නිරුවත් ඡායාරුප සකසා එම ඡායාරූප ලියාපදිංචි තැපෑලෙන් විවිධ පුද්ගලයන්ට යැවූ විවාහක දෙදරු පියෙකු පිළිබඳ පුවතකි මේ,

අනුරාධපුරයේ නියෝජිත තැපැල් කාර්යාලයක් පවත්වාගෙන ගිය මොහු අත්අඩංගුවට ගැනීම පිණිස අනුරාධපුර මූලස්ථාන පොලිසියේ ළමා හා කාන්තා කාර්යංශය ඊයේ (23) සිට පුළුල් විමර්ශනයක් අරඹා තිබේ.

අනුරාධපුර මූලස්ථාන පොලිසියට තම මව හා පැමිණි අගතියට පත් තරුණ ගුරුවරිය එම නියෝජිත තැපැල් කාර්යාල හිමිකරු විසින් විවිධ පුද්ගලයන් අතට පත්කළ තම ඡායාරූප විශාල ප‍්‍රමාණයක් ද පැමිණිල්ල සමඟ ඉදිරිපත් කර තිබේ.

එම පුද්ගලයා තමන් අවිවාහක බව හඟවමින් මෙම අවිවාහක ගුරුවරිය සමඟ පෙම් සබඳතාවක් පවත්වා තිබෙන අතර ඔහු විවාහක දෙදරු පියකු බව දැන ගත් සැනින් එම පෙම් සබඳතාවය නතර කිරීමට ඇය කටයුතු කොට ඇත.

එවිට  සැකකරු උරණ වී ඇයට විවිධ තර්ජන කර තිබෙන බව පොලිසිය අනාවරණය කරගෙන තිබේ.

මෙලෙස සැකකරු විසින් අනුරාධපුර නගරයෙන් බැහැර පිහිටි පාසලක සේවයේ නියුතු තරුණ ගුරුවරියට මානසික පීඩාවන් සිදුවන අන්දමින් කටයුතු කර ඇති අතර ඇය සිය මවද සමඟ පොලිස් ස්ථානයට පැමිණ ඒ සම්බන්ධයෙන් පැමිණිලි ඉදිරිපත් කළ පසුව දෙපාර්ශවය ගෙන්වා අවවාද කිරීමට පොලිසිය කටයුතු කර තිබේ. එවිට සැකකරු "හිර ගෙවල් හතක ගියත් මම උඹ එක්ක හිටපු නිරුවත් ඡායාරූප මුළු ගමටයි ඉස්කෝලයටයි එවනවා!" යනුවෙන් පොලිස් නිලධාරීන් ඉදිරියේම තර්ජනය කරමින් කියා ඇති අතර ඒ සම්බන්ධයෙන් ද පොලිස් නිලධාරීන් පැමිණිලි පොතෙහි සටහන් තැබීමට කටයුතු කර තිබේ.

ඉන් දින කිහිපයකට පසුව සැකකාර නියෝජිත තැපල් හල් හිමියා ගුරුවරියගේ නිරුවත් ඡායාරූප මුද්‍රණය කර ඇය පදිංචිව සිටින ප‍්‍රදේශයේ නිවෙස්වලට හා සේවය කරන පාසලට ව්‍යාජ ආපසු ලිපිනයක් යොදා ලියාපදිංචි තැපෑලෙන් යොමුකර තිබේ.

පාසලේ ගුරුවරුන් කිහිප දෙනකු අතට මෙම නිරුවත් ඡායාරූප අඩංගු ලිපිකවර ලැබී ඇති අතර ඔවුන් සෙසු ලිපි පාසලේ ගුරුවරුන් අතට පත්වීමට පෙර තැපැල් ස්ථානයෙන් ලබාගෙන ඇයට සිදුවීමට තිබූ අපහසුතාව මගහැරවීමට කටයුතු කර ඇත.

ගුරුවරියගේ මවට හා අසල්වාසීන් විශාල පිරිසකට නිරුවත් ඡායාරූප සහිත ලිපි ලැබී ඇති අතර ඇය නිවෙසේ නිදන ඇඳේ සිටියදී ගත් ඡායාරූපයක උඩකය වෙනත් නිරුවත් සිරුරකට පරිගණක මෘදුකාංගයක් මගින් බද්ධකර තිබෙන බව ගුරුවරියගේ මව අනාවරණය කරගෙන පොලීිසියට ඒ පිළිබඳව පැමිණිලිකර තිබේ.

සැකකරු අනුරාධපුර උසාවිය පෙදෙසේ පිහිටි නියෝජිත තැපැල් කාර්යාලයක් කුලී පදනමට ලබාගෙන පවත්වාගෙන යන පුද්ගලයකි. ඔහු අත්අඩංගුවට ගැනීම සඳහා පොලිසිය මෙහෙයුම් ක‍්‍රියාත්මක කිරීමත් සමගම ඔහු පෙරේදා (22) සිට ආයතනය වසාදමා සැඟවී සිටින බව පොලිසිය පවසයි.

පැමිණිලිකාරියට ලියාපදිංචි තැපෑලෙන් යැවූ ලිපි කුමන ස්ථානයකින් පැමිණියේද යන්න අනාවරණය කර ගැනීමට පොලිසිය විශේෂ පරීක්ෂණයක්ද ආරම්භ කර තිබේ.

අනුරාධපුර මූලස්ථාන පොලිසියේ ස්ථානාධිපති ප‍්‍රධාන පොලිස් පරීක්ෂක ඊ.එම්.සංජීව මහනාම මහතාගේ උපදෙස් මත ළමා හා කාන්තා කාර්යාංශයේ ස්ථානාධිපති උප පොලිස් පරීක්ෂිකා පී.යමුනා කාන්ති හා උප ස්ථානාධිපති උප පොලිස් පරීක්ෂක කේ.ඒ.රත්නසිරි යන මහත්ම මහත්මීන් සිද්ධිය සම්බන්ධයෙන් පුළුල් පරීක්ෂණ ආරම්භ කර තිබේ.

අනුරාධපුර බුද්ධික මහේෂ් විජේසූරිය

ප්‍රවීණ සංගීතවේදි විශාරද එඩ්වඩ් ජයකොඩිගේ මාරම්බරී ගී ප්‍රසංගයේ සියවැනි දිගහැරුම මෙම මස 28 වැනිදා සවස 6.30ට කොළඹ නෙළුම් ‍පොකුණ රඟහ‍ලේදී පැවැත්වීමට කටයුතු සංවිධානය කර තිබේ. ඔහුගේ ආදරණීය බිරිඳ චරිතා ප්‍රියදර්ශනී පීරීස්, දුව සාරණ්‍යා ජයකොඩි සහ පුතා චන්දීප ජයකොඩිගේ හඩින් මාරම්බරි මෙවර හැඩගැන්වේ. 
 
සියවැනි පියවරට ළඟා වූ මාරම්බරි පිළිබඳව සුන්දර මතකයන් බොහෝමයක් ඔබට ඇති?
ඔව්. මාරම්බරි ප්‍රසංගය ලංකාවේ වගේම ඇමෙරිකාව, එංගලන්තය, කැනඩාව, ප්‍රංශය, ඉතාලිය, ස්විට්සර්ලන්තය, ඔස්ට්‍රේලියාව, කුවේට්, ඩුබායි වගේ දේශ දේශාන්තර ගණනාවක සංචාරය කරමින් තමයි සියවෙනි කඩයිමට ළඟා වුණේ. මාරම්බරිය  හරහා මම නිතරම ගම් දනව්වල ඉන්න ළමුන් වෙනුවෙන් කලාපයන් තියෙනවා. ඒ හරහා මා වගේම චරිතාත් විශාල තෘප්තියක් ලබනවා. මාරම්බරි ප්‍රසංගය තුළින් අප ලබාගත් සියලුම අත්දැකීම් ඉතා සුන්දර බව කිවයුතුමය. 
 
මෙම ප්‍රසංගය මාරම්බරි ලෙසට නම් කරන්නට විශේෂ හේතුවක් තිබුණාද?
කුමාරදාස හපුතන්ත්‍රී ලියපු, ආචාර්ය රෝහණ වීරසිංහ සංගීතවත් කළ උසස් ගණයේ ගීතයක් තමයි මාරම්බරි කියන්නේ. එය උත්තරභාරතීය රාගධාරි සංගීතයෙහි එන ගඳල් කියන ගායන ෙශෙලීය පමණක් යොදාගෙන කරපු නව නිර්මාණයක්. ගීතය බොහෝ සෙයින් ජනතාව අතරට ගියා. බොහෝදෙනා හිතන දෙයක් තමයි උත්තර භාරතීය රාගධාරී සංගීතය අපට රසවිඳින්න බැහැ, අපි එය ඉගෙනගෙන නැහැ කියන එක. වික්ටර් රත්නායක මහතාගේ හෝපළු වනපෙත, සුනිල් එදිරිසිංහ මහතාගේ හංස රාජිණි, පී.වී. නන්දසිරි මහතාගේ කමලාසනී, අමරදේව හා සනත් නන්දසිරි සර් ගයන ජගදානන්දන කියන ගීත බොහෝම සරල ශාස්ත්‍රීය ගීත විදිහට තමයි හඳුන්වන්නේ. මේ ගීත ජනතාව හොඳින් රසවින්දා. ඒ වගේම මාරම්බරි කියන ගීතයත් මගේ ගමන් මගේ කඩයිමක් වුණා. ඒ හින්දම තමයි මාරම්බරි නමින් මගේ ජීවන තොරතුරු ඇතුළත් කරලා ‍පොතක් දයානන්ද රත්නායක කියන රචකයා  විසින් නිර්මාණය කළෙත්. මම ක්‍ෂේත්‍රයට ඇවිත් වසර 35ක් ගෙවුණාට පස්සේ තමයි මගේ ඒකපුද්ගල ප්‍රසංගයක් පටන් ගත්තේ. ඉතින් මම එතනදී කල්පනා කළා මට වාසනාව ගෙනාපු මාරම්බරි ගීතයේ නමින්ම මේ ප්‍රසංගය නම් කරන්න. අපේ සාහිත්‍යයේ එන රම්බා කියන දෙවඟන ගැන තමයි මාරම්බරි හරහා කතා බහට ලක්වෙන්නේ ඇත්තටම මාරම්බරි කියන්නේ මට වාසනාව ගෙනාපු වචනයක් කිව්වොත් නිවැරදියි. 
 
මෙවර මාරම්බරි ප්‍රසංගය සුවිශේෂී වන්නේ එය සියවැනි ප්‍රසංගය නිසාම පමණක් නොවෙයි නේද?
ඔව්. මෙවර සියවෙනි ප්‍රසංගයේදී මගේ දුව සාරන්‍යා ජයකොඩි ඒ වගේම පුතා චන්දීප ජයකොඩිගේ විශේෂාංගයකුත් ජනගත කරන්නට බලා‍පොරොත්තු වෙනවා.
මෙවර මගේ ප්‍රසංගයට මගේ දුව වගේම පුතාත් එක්වීම සුවිශේෂී අවස්ථාවක් විදිහට හඳුන්වන්න පුළුවන්.
 
ඔබත් ඔබේ ආදරණීය බිරිඳ චරිතා ප්‍රියදර්ශනීත් සංගීතය පිළිබඳව බොහෝ අත්දැකීම්  ලැබුවන්. ඔබ දෙදෙනාගේ දරුවන් දෙපළත්ඵ මෙවර මාරම්බරිට එක්වීම ගැන මොකද හිතන්නේ?
මගේ දුව සාරන්‍යා වගේම පුතා චන්දීපත් පුංචි කා‍ලේ සිටම කලාකාමී හැකියාවක් පෙන්නුම් කළා. ඒ අයගේ හැකියාවන් මුදාහරින්නත් අපි උදව් කරන්න ඕනේ. දුව සාරන්‍යා ආචාර්ය සෝමරත්න දිසානායකගේ සිරි රජ සිරි චිත්‍රපටයේ ප්‍රධාන චරිතයක් රඟපෑවා. පුතාත් චිත්‍රපට කිහිපයක සුළු චරිත රගපාලා පුතා වරක හොඳම සහය නළුවා විදිහටත් සම්මාන දිනාගත්තා. ඒ වගේම මම සංගීතවත් කළ අපේ යාළු පුංචි භූතයා කියන චිත්‍රපටයේ සහය සංගීත අධ්‍යක්ෂවරයා විදිහටත් පුතා කටයුතු කළා. ඉතින් පුතා වගේම දුවටත් මාරම්බරි හොඳ අවස්ථාවක් වේවි. අපි ඉතින් ජනතාව වෙත දරුවෝ දෙන්නා මුදාහරිනවා. ප්‍රේක්ෂකයෝ් තමා ඒ දෙන්නා කොයිතරම් දුර යනවද කියලා තීරණය කළ යුත්තේ.
 
අද පවතින ජනප්‍රිය සංගීත රැල්ල ප්‍රවීණයෙක් විදිහට ඔබ දකින්නේ මොන විදිහටද?
මම දකින විදිහට හැමදේම අලුත් විය යුතුයි. නමුත් පැරණි සම්ප්‍රදායන් පාගන්නේ නැතිව යම් මූලධර්ම, හොඳ දේ අරගෙන තමයි අලුත් දේවල් හොයාගෙන යන්න ඕනේ. කොහොමහරි කමක් නැහැ ප්‍රේක්ෂකයන්ට ආනන්දය වගේම ප්‍රඥාවත් ලබාදෙන නිර්මාණ සංගීතඥයෝ කරනවා නම් තමයි සංගීත ක්‍ෂේත්‍රයේ යම් දියුණුවක් දැකගත හැකිවන්නේ. 
 
අද සුභාවිත ගීතය වටා රොක් වෙන පිරිසේ විශාල අඩුවක් තිබෙන බව නිතර කතාබහට ලක්වෙන කරුණක්. ප්‍රවීණ සංගීතවේදියෙක් විදිහට ඔබ මේ පිළිබඳව දරන්නේ මොනවගේ අදහසක්ද?
ඔය කියන කාරණාවේ දෙපැත්තක් තියෙනවා. අද එදාට සාපේක්ෂව අති විශාල විද්‍යුත් නාලිකා සංඛ්‍යාවක් බිහිවෙලා තියෙනවා. නමුත් අපි සංගීතය පටන් ගන්න කා‍ලේ තිබුණේ ගුවන්විදුලිය විතරයිනේ. ඒ කා‍ලේ ගේය පද රචනාව හරියටම ප්‍රමිතිගත කරලා තමයි කාටහරි තනුව දාන්න හරි ගායනා කරන්න හරි භාරදෙන්නේ. තනුව දාලා ගායනා කළාට පස්සේ ගුවන් විදුලියෙන් නැවත සමීක්ෂණ කණ්ඩායමකට යොදවලා. ගේය පද රචනාවට තනුව උචිතද කියලා ඉතාමත්ම සූක්ෂමව බලලා තමයි ජනතාව වෙත මුදාහරින්නේ. අද මේ තත්ත්වය වෙනස් වෙලා. ඒ හින්දා සමහරවිට සුභාවිත ගීතය වටා රොක්වෙන පිරිස අද අඩුවෙන්න පුළුවන්.
 
රියැලටි වැඩසටහන් හරහා ගායක ගායකයන් විශාල වශයෙන් බිහිකළත් ඒ අතරින් දිගටම ක්ෂේත්‍රයේ රැඳෙන්නේ අතළොස්සයි. මේ ගැන ඔබේ අදහස මොකක්ද?
රියැලටි ප්‍රසංග පැවැත්වීම ඇත්තටම හොඳයි. මොකද සමහර විට ගමේ ඉන්න දරුවකුට ලොකු ආකර්ෂණයක් මේ හරහා දිනාගන්න පුළුවන්. නමුත් සමහර අවස්ථාවල මේවා කෙරෙන ආකාරය ගැන යම් යම් ගැටලු ඇතිවෙනවා. මොකද එස්.එම්.එස්. එකකින් තීරණය කරන්න බැහැ යම්කිසි කෙනෙකුගේ ගායන හැකියාව මොන වගේද කියලා. ඒ සඳහා හොඳ විනිශ්චය මණ්ඩලයක් ඉන්නම ඕනේ. අපට විනිශ්චය මණ්ඩලවලට ආරාධනා කරන හැම අවස්ථාවේදීම අපි කියන්නේ විනිශ්චය මණ්ඩලයට වැඩි අනුපාතයකුත් එස්.එම්.එස්.වලට අඩු අනුපාතයකුත්  තියෙනවා නම් තමයි අවසානයේ සැබෑම දක්ෂයෙක් බිහිවෙන්නේ කියලා. විශේෂයෙන් දිනන පිරිස එක පාරට කන්ද උඩින් තියන්නේ නැතිව ඒ අයට කන්ද නගින්න දෙන්න ඕනේ. එහි සුන්දර තැන් දුෂ්කරතැන් කියන සියල්ලම තේරෙන්නේ කන්ද නඟිනකොටනේ. එහෙම නැතිව හෙළිකොප්ටර් එකකින් ගෙනියනවා වගේ කන්ද උඩින් තැබුවාම වෙන්නේ, ඔහුට දුෂ්කරතා නොපෙනී යන එකයි..
 
සමන්මලී නැලිගම
 
ඡායාරූප - මංජුල පෙරේරා

“ඒ ලෙවල් ” චිත්‍රපටයට එක්වන විට ඔබ සාමාන්‍ය පාසල් සිසුවෙක් ඔබේ “ඒ ලෙවල් “ ප්‍රතිඵල නිකුත්වන විට ඔබ රටම දන්නා චරිතයක් . ඒ හින්දා ඔබේ ප්‍රතිඵල දැනගන්නට ඔබේ රසික පිරිස කැමති වේවි ..
මම පහුගිය 2017 දී වාණිජ විෂය ධාරාව ඔස්සේ තමයි උසස්පෙළට මුහුණ දුන්නේ . ආර්ථික විද්‍යාව සහ ගිණුම්කරණයට බි සාමාර්ථ දෙකකුත් ව්‍යාපාර අධ්‍යයනයට සී සාමාර්ථයකුත් මට ලැබුණාා .  

නැවත උසස් පෙළට මුහුණදීලා විශ්වවිද්‍යාල වරම් හිමිකරගන්න උත්සහ කරනවද..?..
නැවත උසස් පෙළ කරන්න අදහසක් නැහැ. දැනට විගණන ආයතනයක රැකියා පුහුණුවක යෙදිලා ඉන්නවා. එම පුහුණුව වසර දෙකකින් නිමාවුණාට පස්සේ ගණකාධිකරණ අංශයෙන් තවත් වැඩිදුර අධ්‍යාපනය ලබන්න තමයි හිතාගෙන ඉන්නේ .

රැකියා ස්ථානයේ වගේම මග තොටේත් දැන් ඉහළ රසික ප්‍රතිචාර ඇති...
“ ඒ ලෙවල්” නැරඹූ බොහෝ අය මට කතාකරලා සුබ පතනවා. චිත්‍රපටය ගැනත් අහනවා.

මේ විදියට රටේම ජනප්‍රිය නළුවෙක් වන්නට හීනයක් පුංචි සන්දියේ පටන්ම හිතේ තිබුණාද..?
පුංචිම කා‍ලේ විවිධ ප්‍රසංගවල රඟපාලා තිබුණට ලොකු පන්තිවලට එද්දි පාසල් වේදිකා නාට්‍යයකවත් රඟපාලා තිබුණේ නැහැ. “ ඒ ලෙවල් “ චිත්‍රපටයේ අනුත්තරගේ චරිතය රඟපාන්න ලැබිම අහම්බෙන් සිදු වූ දෙයක්

කොහොමද ඒ අවස්ථාව උදාවුණේ ..?
එක දවසක් අපේ ඉස්කෝ‍ලේ “ නාට්‍ය හා රංග කලාව“ උගන්වන ටීචර් ඇවිල්ල කිව්ව චිත්‍රපටියකට නළුවන් තෝරගන්න කට්ටියක් පාසලට එන හින්දා හැමෝම ඉස්කෝ‍ලේ ඇරිලා යන්නේ නැතුව නවතින්න කියලා. එදා දවල් මමයි යාළුවො දෙන්නෙකුයි වෙනත් වැඩකට ඉස්කෝලෙන් පිටට ගියා. අපි ආයෙම ඉස්කො‍ලේට එනකොට පාසල නිමාවෙලා ළමයි කට්ටියම අර සම්මුඛ පරීක්ෂනයේ . ඒ වෙලාවෙ තමයි අපිට මතක්වුණෙත් හවස නළුනිළි සම්මුක පරීක්ෂණයක් තියෙන බව . රඟපාන්න උනන්දුවක් නැතත් ටීචර් කිව්ව හින්දා අපිත්
   එතැනට ගියා.

ඒ වෙලාවේ ඒ සම්මුඛ පරීක්ෂණයට ඉදිරිපත්වෙලා ජයගන්න සචිරට පුළුවන් වුණා..
මම සම්මුඛ පරීක්ෂණයට ගියේ නැහැ. එළියට වෙලා බලාගෙන හිටියා. ඒ වෙලාවේ රොහාන් සර් (ඒ ලෙවල් අධ්‍යක්ෂ රොහාන් පෙරේරා) මාව දැකලා මට කතාකරල තමයි අදාළ සම්මුඛ පරීක්ෂණයට මාව යොමු කළේ  .

සම්මුඛ පරීක්ෂණයෙදී සචිරට කරන්න සිදුවුණේ  මොනවාද .. ?  
රොහාන් සර් මගෙත් එක්ක ගොඩක් වෙලා කතාකළා. අද චිත්‍රපටියට නළු නිළිියෝ තෝරන්න කට්ටියක් ඉස්කෝලෙට ආපු කාරණය තාත්තට කියන විදිය කරල පෙන්නන්න කිවුවා. මුහුණින් හැඟීිම් මතුකරලා පෙන්වන්න අවස්ථා කීපයක් ලබාදුන්නා . මම ඒවා කරල පෙන්නුවා. ඊට පස්සේ දුරකථන අංකයට ඉල්ලගෙන පස්සේ කතා කරන්නම් කිව්වා

චිත්‍රපටයක ප්‍රධාන නළුවා වෙන්න අවස්ථාව ලැබෙයි කියන හීනය ඒ වෙලාවේ ඇති වුණාද ...?
 නැහැ. එවැනි අදහසක්වත් තිබුණේ් නැහැ. පස්සේ මාවයි අපේ ඉස්කෝ‍ලේ තවත් ළමයි කීප දෙනෙක්වයි තෝරාගත්තු බව දැන්වුවට පස්සෙත් මට හිතුණේ මාව තෝරාගත්තේ අතිරේක චරිතයකට වෙන්න ඇති කියලා. මොකද ඒ වෙද්දි මම දැනගෙන හිටියා මේක උසස්පෙළ ළමයි පිරිසක් වටා යන කතාවක් බව. මම හිතුවේ මාව පන්තියේ ළමුන් අතර කෙනෙකුට තෝරාගන්න ඇති කියලා. පස්සේ තමයි දැනගත්තේ මාව තෝරාගෙන තියෙන්නේ ප්‍රධාන චරිතෙට බව.  

සචිරගේ සාමාන්‍ය තොතුරු කතාකළොත්  .?
මගේ ගම නුවර කටුගස්තොට. ඉගෙනගත්තේ කටුගස්තොට සාන්ත අන්තෝනි විද්‍යාලයෙන් . දැන් නම් ඉන්නේ මාළඹේ අයියලාගේ ගෙදර. එහෙ ඉඳන් තමයි විගණන ආයතනයේ රැකියාවට යන්නේ .

චිත්‍රපටයේ ඔබ පාසල් ප්‍රේමවන්තයෙක් .. දැන් රසිකාවියන්ගේ ආදරණීය ප්‍රතිචාරත් ලැබෙනව ඇති. පෞද්ගලික ජීවිතයේත් ප්‍රේමවන්තයෙක්ද .. ?
අන්තර්ජාලයේ මුහුණු‍පොත හරහා නම් ගෑනු ළමයින්ගේ ප්‍රතිචාර තියෙනවා. ඒත් මම පෞද්ගලික ජීවිතයේදී තවම පෙම්වතෙක් වෙලා නැහැ.

“ ඒ ලෙවල්” චිත්‍රපටයෙන් පසු වෙනත් නිර්මාණවලට එකතුවුණේ නැද්ද .. ඉදිරියේදී නළුවකු විදියට දිගු ගමනක් යන්න අදහසක් නැද්ද .. ?
 වෙනත් නිර්මාණ සඳහා නම් තවම දායකවෙලා නැහැ. මගේ රැකියාව කරන අතරේ හොඳ නිර්මාණයකට ආරාධනා ලැබුණොත් පිටපත බලලා රොහාන් සර්ගෙනුත් අහලා ඒකට එකතු වෙනවා.   

 ආරියවංශ කුලතිලක

කාන්තාවන්ට මත්පැන් මිලට ගැනීම සහ අලෙවි කිරීම සඳහා වාරණයක් මෙරට නීතියේ පවතින බව බොහෝ අය දැනගත්තේ. මුදල් ඇමැති මංගල සමරවීර විසින් එකී වාරණය ඉවත් කිරීමට ගැසට් නිවේදනය නිකුත් කළ පසුවය. ජනාධිපතිවරයා විසින් එකී ගැසට් නිවේදනය අවලංගු කළ පසුව අද වන විට කාන්තාවකට මත්පැන් මිලට ගැනීම හා විකිණීමේ අයිතිය පිළිබඳ හඬක් රට තුළ නැගී ඇති අතර එය අද දවසේ රටේ කතාබහට ලක්වූ ප්‍රධානතම මාතෘකා අතුරින් එකක්ව ඇත. ප්‍රකට සිනමා නිළි සමනලී ෆොන්සේකා ඇතුළු එකොළොස් දෙනෙකු මේ වනවිට ජනාධිපතිවරයාගේ තීරණය අභියෝගයට ලක් කරමින් ශ්‍රේෂ්ඨාධිකරණයට මූලික අයිතිවාසිකම් පෙත්සමක් ගොනුකොට ඇත. අප මේ ගැන වැඩිදුර විස්තර සමනලීගෙන් විමසුවෙමු.
 
කාන්තාවන්ට මත්පැන් අලෙවිය හා මිලදී ගැනීම සම්බන්ධව පවත්නා නීතිය පිළිබඳව අද දවසේ ප්‍රබල කතිකාවතක් මතුවෙලා. මේ වනවිට ඔබත් මේ ප්‍රශ්නය වෙනුවෙන් හඬ නගන්නියක්. 
මේක මත්පැන් පිළිබඳ ප්‍රශ්නයක් නමෛයි. රටක පුරවැසියකු විදියට කාන්තාවක් වීම නිසාම සමානාත්මතාව නැතිවීම ගැටලු සහගතයි. උදාහරණයක් විදියට දෙමළ ජාතිකයකු වීම හෝ මුස්ලිම් ජාතිකයකු වීම හෝ කාන්තාවක වීම හෝ නිසා සමාජය තුළ හිමිවිය යුතු ‍පොදු හිමිකම් නැතිවනවා නම් මම හඬ නගනවා. ඒත් ඒ හඬ නැගීම තුළ තියෙන්නේ කාන්තාවන්ට බොන්න ඕනෑ, බිලා පාරේ වැටිල ඉන්න ඕන කියන අදහස ‍නෙවෙයි. අපි එකොළොස් දෙනකු එක්වී කරන මේ කටයුත්තේදී මාව පමණක් කේන්ද්‍රගත කරලා මගේ හඬ නැගීමක් ලෙස මෙම පුවත ප්‍රචාරය වීම ගැන නම් මම තරයේ විරුද්ධයි.  
 
කවුද ඒ පිරිස...?
නිශාන්ති බණ්ඩාරනායක, එම්.ඩී.ජේ.බි.ප්‍රනාන්දු, චන්දිමා රචිනි ජිනදාස, දීපාංජලී අබේවර්ධන, සබ්‍රිනා එසුපුලී, සාරන්‍යා සේකරම්. රන්දුලා ද සිල්වා, මේනකා ගල්ගමුව, සුජාතා ගමගේ, විශාකා පෙරේරා තිලකරත්න යන අය
 
ඔබ පැවැසුවා මෙය මත්පැන් මිලට ගැනීම හා අලෙවියට කාන්තාවන් සතු අයිතිය පිළිබඳ කරන හඬ නැගීමක් පමණක්ම නොවන බව
ඔව්, මෙය කාන්තාවන්ගේ මූලික අයිතිවාසිකම් උල්ලංඝනය කරන එක දෙයක් විතරයි. කාන්තාවන්ට සමතැන හිමිවිය යුතුයි. ඒ වෙනුවෙන් කරන සාකච්ඡාව අරඹන්න අද දවසේ සුදුසුම තැන මෙතැන. ඊට හේතුව අද දවසේ ඇති වී ඇති ප්‍රශ්නය මෙය නිසා.
 
මෙය බෞද්ධ රටක්. අපට සංස්කෘතියක් තියෙනවා. ඒ සංස්කෘතිය තුළ කාන්තාවට තිබෙන පිළිගැනීම අනුව ඇය මත්පැන් වෙනුවෙන් අයිතීන් ඉල්ලා සටන් වැදීම සුදුසුද?
ඔය සංස්කෘතිය ඇයට පමණද? ඒ සංස්කෘතිය රැකීමේ සහ ඉදිරියට ගෙන යාමේ පෙරගමන්කරුවා ඇය විතරමද? පිරිමින් බේබදුකමින් හැසිරෙන විට පිරිමින් ස්ත්‍රී දූෂණ, අපරාධ කරනවිට දේශපාලනඥයන්, දූෂණ හා මූල්‍ය වංචා සිදුකරන විට ඔය කියන සංස්කෘතික පරිහානිය සිදුවන්නේ නැද්ද? මා කී මේ අදහසටත් යම් අය වැරදි අර්ථකථන දෙන්න පුළුවන්. පිරිමින්ට බිලා පාරෙ වැටිල ඉන්න පුළුවන් නම් ගැහැනුන්ටත් එය පුළුවන් බව නමෛයි මම කියන්නේ. මම කියන්නේ සංස්කෘතිය රකින එක සමස්ත ජනතාවගේම වගකීම බව. ඊට පනවන සීමා ‍පොදු විය යුතු බව. මෙතැනදී අප මේ හඬ නගන්නේ ගැහැනුන්ට බොන්න ඉඩ දෙන්න කියලා ‍නෙවෙයි. කාන්තාවන්ගේ මූලික අයිතිවාසිකම් රැකලා ඇයට සමතැන හිමිවිය යුතු බව.
 
ඔබ නිළියක්. ‍පොදු ජනතාව නළු නිළියන්ට ආදරේ කිරීම, ඒ අයව පරමාදර්ශී චරිත බවට පත්කර ගැනීම ඕනෑම රටකට ‍පොදුයි. සමනලී ෆොන්සේකා මේ කරන හඬ නැගීම ඔබේ රසික පිරිස කෙබඳු ආකාරයට පිළිගනීවිද?
මම වෘත්තීය නිළියක්. මගේ රැකියාව මට ලැබෙන චරිතය හොඳින් රඟපාන එක. මට කවදාවත් ජනප්‍රිය නිළියක් වීමේ අවශ්‍යතාවය නැහැ. ජනතාවගේ ආදරය දිනා ගැනීම මට අවශ්‍ය නැහැ. මම නිළියක් නොවී සිටියා නම් ඒත් මේ මොහොතේ මම මේ හඬ නැගීමට එකතු වේවි. මගේ හඬ නැගීම කාන්තා අයිතිය ගැන බවත් ඒකට මේ අවස්ථාවේ සුදුසුම මාතෘකාව මෙය බවත්, මා පුන පුනා කියනවා.  
 
මෛත්‍රීපාල සිරිසේන ජනාධිපති කරවන්නට හඬ නැගූ අය අතර එදා ඔබත් සිටියා. අද ඔබ ඔහුට එරෙහිව නැගී සිටිනවා.
අප එදා ඒකරාශී වූයේ එවකට සිටි ජනාධිපති මහින්ද රාජපක්ෂයන්ගේ ඒකාධිපති පාලනයට එරෙහිව හඬ නගන්න. අපි හිටියේ ස්වාධීන වේදිකාවක. ඒ මොහොතේ තිබුණු විකල්පය මෛත්‍රීපාල සිරිසේන. නමුත් මේ ධනවාදී දේශපාලන ක්‍රමය යටතේ මෛත්‍රීපාල සිරිසේන රජය තුළිනුත් වැරදි විය හැකි බව අප එදා දැන සිටියා. තනතුරු ගන්න, වාසි ලබා ගන්න ‍නෙවෙයි අපි නැගී සිටියේ. ඒ හින්දා එදාම අපේ තීරණය වුණේ යම් දාක මෛත්‍රීපාල සිරිසේන රජයෙන් යම් වරදක් වුණොත් ඊට එරෙහිවත් නැගී සිටින බව. අද මේ සිදුවන්නේ එය. පැහැදිලිව කිව යුතු දෙයක් තියෙනවා. දේශපාලනයට පිවිසීමේ අරමුණින් මෙබඳු ක්‍රියාකරන අය ඉන්නවා. ඒත් මම එතැන නැහැ. 
 
ආරියවංශ කුලතිලක

ලබන දහ වැනිදා පැවැත්වෙන පළාත් පාලන ඡන්දයේදී දෙහිඅත්තකණ්ඩිය ප්‍රාදේශීය සභාව මෙරට මැතිවරණ ඉතිහාසය අලුත් කරන්නේදැයි දැන් බොහෝ දෙනෙක් බලා සිටිති. ඒ වෙන කිසිවක් නිසා නොවේ මෙරට මැතිවරණ ඉතිහාසයේ පළමු වතාවට ආදිවාසී කාන්තාවක් දෙහිඅත්තකණ්ඩිය ප්‍රාදේශීය සභාවේ සභික ධුරයක් වෙනුවෙන් තරගවදින නිසාය. යම් හෙයකින් ඇය ජයග්‍රහණය කළහොත් එය මෙරට මැතිවරණ ඉතිහාසයේ අලුත් පිටුවක ආරම්භයක් වන්නේය. ඇය ශිරෝමාලා විජේසේකරය. ‍පොදුජන පෙරමුණේ අපේක්ෂිකාවක ලෙස ‍පොහොට්ටුව ලකුණින් තරග වදින්නී දෙහිඅත්තකණ්ඩිය ප්‍රාදේශීය සභා බල ප්‍රදේශයට අයත්  හේනානිගල දකුණු හා අංචිකඩේ යන කොට්ඨාසයන් සඳහාය. තමන්ගේ දේශපාලන ආගමනය පිළිබඳව ශිරෝමාලා විජේසේකර වන ඇය පවසන්නේ මෙවැනි කතාවකි.
 
“මගේ තාත්තා ඌරු වරිගෙ පුංචි බණ්ඩා. අම්ම විජේසේකර මුදියන්සේලාගේ පේමවතී. අපේ පවු‍ලේ සහෝදර සහෝදරියන් නව දෙනයි. අම්මයි තාත්තයි නීතියෙන් විවාහ වී තිබුණේ නැති නිසා අපි අට දෙනකුටම දාලා තිබුණේ අම්මාගේ වාසගමයි. අපේ පවුල ජීවත් වුණේ දඹානේ ගුරුකුඹුර වැදි ගම්මානයේ. වර්තමාන ආදිවාසී  නායක ඌරුවරිගෙ වන්නියල ඇත්තෝ මගේ මාමණ්ඩිය වෙනවා. හේනානිගල වැදි නායක ගුණබණ්ඩාත් මගේ මාමණ්ඩි කෙනෙක්. මහවැලියෙ ඉඩම් ලැබුණට පස්සේ අපේ පවුල් කිහිපයක්ම හේනානිගල පදිංචියට ආවා.
මගේ දැන් වයස අවුරුදු 33යි. මම විවාහකයි. සාමාන්‍ය පෙළ දක්වා මම ඉස්කෝලෙ ගියා. පසුගිය සභාවටත් අපේ ආදිවාසී අයෙක් තේරී පත්ව සිටියා. ඒ තලා වරිගෙ පේමරත්න. ඔහු ජයග්‍රහණය කළේ  ස්වාධීන අපේක්ෂකයෙක් හැටියට. ඒ නිසා ප්‍රධාන පක්ෂවල නියෝජිතයන් සමග වාද විවාද කරල අපේ ගැටලු ඉදිරිපත් කරල ඒවාට සාර්ථක විසඳුම් ලබා ගැනීමට ඔහු ගත් උත්සාහයන් එතරම් සාර්ථක වුණෙත් නැහැ. නමුත් ඔහු ගත් උත්සාහයන් තවත් ජවසම්පන්නව ඉදිරියට ගෙනයාම මගේ කාර්යයේ ප්‍රධාන කොටසක් වෙනවා.
තම ජන කොට්ඨාසයවන ආදිවාසීන්ගේ ප්‍රශ්න ගැටලු ගැන කතා කරන්නට කවුරුත්ම නැති නිසා තම ජනතාව අසරණව සිටින  බව ශිරෝමාලාගේ අදහසයි.
මෙච්චර කාලයක් අපි අනුන්ට ඡන්දය දීලා ඔවුන්ගෙන් කෙරෙන තෙක් බලාගෙන හිටියා. ඒත් වැඩක් වුණේ නැහැ. මම නියෝජනය කරන කොට්ඨාසයේ පමණක් අපේ පවුල් 900ක් පමණ ඉන්නවා. වලංගු ඡන්ද 4000කට ආසන්නයි. ආදිවාසීන් වෙනුවෙන් පමණක් නෙවේ මුළු කොට්ඨාසයේම ජනතාව වෙනුවෙනුත් සමස්ත කාන්තාවන් වෙනුවෙනුත් හඬක් නැගීමට මම සූදානම් ඇය කියන්නීය.
ආදිවාසී ජනතාව වෙනුවෙන් මතෛක් නොවිසඳුණු ගැටලු පිළිබඳව ඇය මෙසේද පැවැසුවාය. වැදි ළමයි කියලා අපේ දරු දැරියන්ට පාසල්වලදී තවමත් කෙනෙහිලිකම් කරනවා. සුදුසුකම් ඇතත් අපේ තරුණ තරුණියන් රාජ්‍ය සේවයට බඳවා ගැනීමේදී දක්වන නොසැලකිලිමත් බව, අපේ අනු පවුල්වලට බෙදාදිය යුතු ඉඩම් පිට පළාත්වල අයට ලබාදීම, ජලාශවල ධීවර කර්මාන්තයේ යෙදෙන අපේ අයට විවිධ තහංචි දැමීම, මීපැණි මෙන්ම වන ඔසු සොයා වනගතවීමේදී බාධා එල්ල කිරීම්, ලබාදී ඇති ඉඩම්වලට මතෛක් නීත්‍යානුකූල බලපත් ලබා නොදීම්, අපේ පාරම්පරික සංස්කෘතික කටයුතු ඉදිරියටත් පවත්වාගෙන යාම සඳහා පහසුකම් සලසා නොතිබිම වැනි ගැටලු පිළිබඳව හඬක් නගා පිළියම් ලබා ගැනීමට උත්සාහ දැරීමත් මගේ අපේක්ෂාවයි ඇය වැඩිදුරටත් පවසන්නීය. 
 
එස්.එස්.එස්. ගුණරත්න

පොත් දොරට වැඩීමේ උත්සව අප බොහෝ දෙනෙකුට හොඳින් ‍හුරුපුරුදුය. ප්‍රසිද්ධ දේශනාගාර සහ ශාලාවල, පුස්තකාල වල සේම විහාරස්ථාන ආදියේ ද පොත් දොරටවැඩීමේ උත්සව පවත්වන බව අපි දනිමු.

එමෙන්ම ඉඳ හිට රෝහලක පැවැත්වෙන පොත් දොරටවැඩීමේ උත්සව ගැනද අපි වරින් වර අසා ඇත්තෙමු. එය බොහෝ විට එම රෝහලේ වෛද්‍යවරයෙකුගේ කෘතියක් එම රෝහල් ශ්‍රවණාගාරයේ දී දොරවැඩීමේ අවස්ථාවකි. එහෙත් රෝහලක ගිලන් යහනකදී රෝගියෙකු ලියූ පොතක් එම රෝහලේ දීම දොරටවැඩි අවස්ථාවක්  වේ නම් එය දුර්ලභ සිද්ධියකි.  එමෙන්ම එසේ ගිලන් යහනේ සිට පොත ලියූ රෝගියා විශේෂඥ වෛද්‍යවරයෙකු වීම අතිශය දුර්ලභ සිද්ධියකි.
මා හට මෙම අසාමාන්‍ය අත්දැකීමට මුහුණදීමට සිදුවූයේ පසුගිය 20 වන සෙනසුරාදා පෙරවරුවේ මාලඹේ නෙවිල් ප්‍රනාන්දු රෝහලේ  පළමු මහලේ ශෛල්‍ය වෛද්‍ය වාට්ටුවට අයත් අංක 1023  දරණ ගිලන් යහන අද්දරදීය. ඒ මේ වන විට එම රෝහලේ ප්‍රතිකාර ලබන විශේෂඥ ප්‍රජා වෛද්‍ය ආරියසේන යූ ගමගේ මහතා විසින් ගිලන් යහනේ දීම ලියන ලද "චීනයේ සෞඛ්‍ය සේවාව හැදෑරීමට ගියෙමි" යන කෘතිය එළි දැක්වීම මුල්කොට ගනිමිනි.දැන් කලෙක සිට Large B cell lymphoma නම් පිළිකා රෝගයෙන් පෙළෙන විශේෂඥ වෛද්‍ය ආරියසේන යූ ගමගේ මහතා තමන් විසින් ලියන ලද "මාපලගමයාගේ සංචාරක සටහන්" කෘති මාලාවේ හයවැන්න වන "චීනයේ සෞඛ්‍ය සේවාව හැදෑරීමට ගියෙමි" නම් කෘතිය එම ගිලන් යහන කේන්ද්‍ර කොට ගත් චාම් උත්සවයක දී එළි දැක්වීම විශේෂත්වයක් විය.මෙම කෘතියේ මුල්පිටපත ඔහු එම ගිලන් යහනේම සිට පිළිගන්වන ලද්දේ එහි ප්‍රකාශක සූරිය ප්‍රකාශන අධිපති අතුල ජයකොඩි මහතා වෙතය. වෛද්‍ය ආරියසේන යූ ගමගේ ගේ පාසල් සහ වෛද්‍ය විද්‍යාල මිතුරන් වන විශ්ව විද්‍යාල ප්‍රතිපාදන කොමිසමේ සභාපති මහාචාර්ය මොහාන් ද සිල්වා, පිළිකා රෝග විශේෂඥ මහේන්ද්‍ර පෙරේරා ඇතුළු වෛද්‍යවරුන්ද මේ වන විට ග්‍රන්ථ රැසක් ලියා පළකොට ඇති වෛද්‍ය ආරියසේන යූ ගමගේ ලේඛණ කලාවට යොමුකළ ලක්බිම උපදේශක කර්තෘ සුන්දර නිහතමානීද මෙල් ඇතුළු තවත් මාධ්‍ය සගයන් කිහිප දෙනෙකු සහ ඔහුගේ පවුලේ ඥාතීන් පිරිසක් ද මේ සඳහා එක්ව සිටියහ.මෙහිදී අදහස් පළ කළ පිළිකා රෝග විශේෂඥ මහේන්ද්‍ර පෙරේරා මහතා ප්‍රකාශ කළේ; වෛද්‍ය ආරියසේන යූ ගමගේ පාසල් සමයේත්, සරසවි සමයේත් තමන් විස්මයට පත් කළ පුද්ගලයෙකු වන අතර තමන්ගෙන් ජීවිතය ඉල්ලා හඬා වැටෙන සෙසු පිළිකා රෝගීන් හා සසඳන විට මෙවන් රෝගයක් වැළදී තිබියදීත් මෙවැනි උත්සාහයක් දැරීමෙන් ඔහු නැවතත් තමන් විස්මයෙන් විස්මයට පත්කොට ඇති බවය.එමෙන්ම තමන්ට මෙවන් රෝගයක් වැළඳී තිබියදී ගිලන් යහනක සිට ලියූ පොතක් ගිලන් යහනක සිට එළි දැක්වූ වෙනත් වෛද්‍යවරයෙකු සිටී දැයි තමන් නොදන්නා බව ද ඔහු පැවසීය. එමෙන්ම මේ වන විට වෛද්‍ය ගමගේ ගේ දකුණු අතේ ක්‍රියාකාරීත්වය තරමක් අඩපණ වී ඇති බැවින් මෙවර ඔහුගේ දකුණු අත වෙනුවට ඔහුගේ පාසල් මිතුරෙකු සහ ප්‍රවීණ ගත්කතුවරයෙකු වන මනෝ ප්‍රනාන්දුගේ සේවය ලබා ගෙන තිබේ.

කෙසේ හෝ මෙහිදී ගිලන්යහනේ වැතිර සිටින අතරේම රැස්වසිටි පිරිස ඇමතූ ආරියසේන යූ ගමගේ කියා සිටියේ විශේෂඥ ප්‍රජා වෛද්‍යවරයෙකු ලෙස ජනතාව දැනුවත් කිරීමේ වගකීම තමන්ට හැකි අයුරින් ඉදිරියටත් කරගෙන යාමට බලාපොරොත්තු වන බවය. "වෙදෙක් වුණත් ලෙඩෙක් වුණොත්" සහ පිළිකාව සම්බන්ධ තමන් පොත පතින් සහ රෝගියෙකු ලෙස ලත් අත්දැකීම් වලින් ඉදිරියටත් කෘති සම්පාදනය කිරීමට බලාපොරොත්තු වන බවද ඔහු පැවසීය.

එමෙන්ම ලෝකයේ රටවල් 40 ක පමණ සංචාරය කිරීමේදී මිලට ගත් ප්‍රජා වෛද්‍ය විද්‍යාව පිළිබඳ වැදගත් දුර්ලභ කෘතීන්  එකතුවක් මෙහිදී වෛද්‍ය ගමගේ විසින් නෙවිල් ප්‍රනාන්දු රෝහලට ‍පරිත්‍යාග කිරීමද විශේෂ සිද්ධියක් විය.








තිලක් සේනාසිංහ

IMAGE

සංසාර සිහිනයේ ගී සංකල්පනය මම 'ටැබ් එකේ ටයිප් කරපු' එකක්

IMAGE 2018 Feb 21 12:00
සනුක වික්‍රමසිංහ ගායනා කරන “සංසාර සිහිනේ” කලක පටන් බොහෝ ගීත දර්ශකවල පෙරමුණ ගෙන තිබෙන...
Views - 737

මම නාට්‍ය කලාවෙ ඉන්නේ ඒ ගැන තියන 'උණ' නිසයි

IMAGE 2018 Feb 21 11:53
වේදිකාව, පුංචිතිරය සහ සිනමාව යන මාධ්‍ය ත්‍රිත්වයෙහිම සිය ප්‍රතිභාව ප්‍රකට කළ කලාකරුවකුවන...
Views - 354

බිරිඳ රැකියාවක් නොකිරීම මගේ සාර්ථකවයට හේතුවක්

IMAGE 2018 Feb 20 14:38
“සිරස ජූනියර් සුපර් ස්ටාර්..” තරගය ගැන මුලින්ම අප ඔබගෙන් විමසන්න කැමතියි.. ඇත්තෙන්ම “සිරස...
Views - 3454

බිරිඳට පින් තකා සුනඛයන්ට දිනපතා සහල් කිලෝ 08ක දනක්

IMAGE 2018 Feb 20 14:23
මිනිසා තිරිසනුන් වන අවස්ථාත් තිරිසනා මිනිසුන් වන අවස්ථාත් අපට බොහෝ විට දක්නට ලැබුණද...
Views - 1955

ලංකාවේ අන්තිම රජු සැඟවූ නිධානය කෝ?

IMAGE 2018 Feb 19 11:34
මහනුවර රජ කළ රාජාධිරාජසිංහ රජුට බිසෝවරුන් කිහිප දෙනෙක්ම සිටියහ. ඔවුන් අතර අලමේලු අම්මා,...
Views - 3947

රඟපෑමෙන් සමුගත් හේතුව නදීකා කියයි

IMAGE 2018 Feb 19 10:41
“චංචල රේඛා” චිත්‍රපටයේ “දං චූටි” නාඳුනන කෙනෙක් එදා සිනමා ලෝලීන් අතර හිටියේ නැහැ....
Views - 5039

Please publish modules in offcanvas position.