Coss Ear2
lakbima.lk
COSS Ear 1
                                                                                        එසැනින් පුවත් | ගොසිප් | විශේෂ පුවත් | සුන්දර ලක්බිම | ව්‍යාපාරික පුවත්     

ඒ 1953 වසරය. ගම්පහ දිසාවට අයත් කඩවතට නොදුරු වෑබඩ නම් ග්‍රාමයේ ධනවත් ව්‍යාපාරිකයකුගේ දහඅට හැවිරිදි  පුත්‍රයකු හිටිහැටියේ තනිවම පැවිදි වේෂයක් ගත්තේය. මුලදී මෙය බොහෝ දෙනකුගේ කුතුහලයට සහ විස්මයට හේතුවූ බැවින් ගම්මු මෙම තරුණයා කරන කියන දේ පිළිබඳව විමසිලිමත් වූහ. එහිදී තනිවම පැවිදි බිමට පත් ඔහු එම ප්‍රදේශයේ ගෙයක් ගෙයක් ගානේ පිඬුසිඟා යන අයුරු නිරීක්ෂණය කළ ගැමියන්ට ඔහු සුසාන භූමි, අම්බලම්, පාළු නිවෙස් ආදියේ රාත්‍රී කාලය ගත කරන බවද පෙනිණ. ඒ අතරේ ඔහු ගැමියන්ට මෙබඳු බණක්ද දෙසීය. 
පින්වතුනි, 'අපේ සමාජයට මහා විශාල වැරදීමක් වෙලා තියෙනවා; බුදුරජාණන් වහන්සේගේ දේශනාවේ විදිහට ශ්‍රමණයන්ට මේ විදිහට පන්සල් හදාගෙන ජීවත් වෙන්න බැහැ. පන්සල කියන්නේ පාලි භාෂාවෙන් පන්නසාලා කියන එකට. ඒ කියන්නේ කොළ අතුවලින් හදා ගත්තු මඩුව කියන එක. ඒත් අද බලන්න පින්වතුනි අපේ හුඟක් හාමුදුරුවරු ජීවත් වෙන්නේ ඒ වගේ පන්සල්වලද එහෙම නැත්නම් මාලිගාවලද කියලා; ඒ හින්දා තමයි මම නියම පැවිද්දෙක් විදිහට බුද්ධශාසනයට ඇතුළත් වුණේ'
ඉහත සඳහන් ශ්‍රමණ වෙස් ගත් තරුණයා ගැමියන් හමුවේ කරන ලද එවන් විප්ලවකාරී ප්‍රකාශ නිසා ඔහු පිළිබඳ ප්‍රසිද්ධිය ඉතා කෙටි කලක් තුළ රට පුරා පැතිරිණ. ඒ අතර ඔහු සෘද්ධි බලයක් සහිත මහරහතන් වහන්සේ නමකැයිද සමහරෙක් කීහ. කෙසේ හෝ ආචාර්යවරයකු නොමැතිව තනිවම පැවිදි බිමට පත් මේ පුද්ගලයා බෞද්ධ භික්ෂුවක වශයෙන් පිළිගත නොහැකි යැයි එවක පුවත්පත් ආදියේ ද ලිපි පළවූ අතර ඔහු කියා සිටියේ එලෙස ආචාර්වරයකු යටතේ පැවිදි විය යුතුමය කියා නියමයක් බුදුසසුන තුළ නොමැති බවය. තවද රහත් ඵලය ආදී බුදු සසුනේ ඉහළම තනතුරු ලබා ගැනීම පිණිස ශීල, සමාධි, ප්‍රඥා ආදී ගුණධර්ම මිස සාම්ප්‍රදායික පැවිද්දක් අවශ්‍ය නොවන බවට ඔහු දැක්වූ අදහස කෙරෙහි එවක සමාජයේ බොහෝ දෙනකුගේ විශේෂ අවධානය යොමු විය.
හිටිහැටියේ ශ්‍රමණ වෙස්ගත් මෙම තරුණයාගේ මෙම විප්ලවීය ප්‍රකාශ මුල්කොට සමාජයේ විවිධ තරාතිරම්වල පිරිස් ඔහුගේ නව ශාසනයෙහි පැවිදි බව ඉල්ලා සිටියහ. ඔවුන් එලෙස පැවිදි කරවීම පිණිස එම තරුණයා ද  උනන්දු විය. කෙසේ හෝ 1953 වසර තුළ සමාජ කරළියට පැමිණි එම තරුණයාගේ සසුන වසරක් වන විට ඒ ආකෘතියේ ශ්‍රමණයන් හත්අටසියයකගෙන් සුසැදි වෙනම ශාසනයක් ලෙස ප්‍රසිද්ධ වූ අතර පසුව එය තාපස නිකාය ලෙසින් රට පුරා මහත් ප්‍රසිද්ධියට පත්විය. ඉතා කෙටි කලක් තුළ තාපස නිකාය ලැබූ මේ ප්‍රසිද්ධිය කොතෙක්ද යත් එම තාපස නිකායේ පැවිද්දන් සෘද්ධි බලමහිමයක් ඇත්තවුන් බව පැවසෙන කවි කොළ ආදිය  සාමාන්‍ය ජන සමාජයේ ශීඝ්‍රයෙන් පැතිර යන්නට විය. එම කවි කොළවලට පැවැති ජනතා ඉල්ලුම මුල්කොට කවි කොළකාරයෝ ඒවාට හැකිතාක් බොරු බේගල් එක් කළහ.
කෙසේ හෝ මෙරට සම්මත බුදු සසුනට; විශේෂයෙන් මහා සඟරුවනට එරෙහිව ක්‍රියාත්මක වන මෙම විකල්ප බෞද්ධ බලවේගය සම්බන්ධයෙන් සාමාන්‍ය ජනතාව මෙරට භික්ෂුන් වහන්සේ වෙතින් දිගට හරහට කරුණු විමසන්නට වූහ. එහිදී උන්වහන්සේලාට කීමට තිබුණේ මෙය බෞද්ධ විරෝධී, ශාසන විරෝධී බලවේගයක් බව පමණි. එහෙත් ඒ වන විට ශීඝ්‍රයෙන් ජනප්‍රිය වෙමින් පැවැති තාපස නිකායේ සාමාජිකයෝ මහමග යමින් ජනතාවට ධර්මය දේශනා කරන මුවාවෙන් 'අලජ්ජියා' 'බලුවමනයා' 'ගිරිකුණා' ආදී වදන්වලින් මෙරට මහා සඟරුවනට නින්දා පරිභව කිරීමට පටන් ගත්හ. 
1951 වසරේ එක්සත් ජාතික පක්ෂයෙන් ඉවත් වූ එස්.ඩබ්ලිව්.ආර්.ඩී. බණ්ඩාරනායක මහතා ශ්‍රී ලංකා නිදහස් පක්ෂය පිහිටුවා ගැනීමත් සමග මෙරට ප්‍රධානතම ජනකොටස වන සිංහල බෞද්ධයන් තමන්ගේ ඉල්ලීම්, හිමිකම් සහ අයිතිවාසිකම්ද ‍පොදි බැඳගෙන නව නායකයා වටා එක් රොක් වූහ. මෙලෙස තමන් වටා ගොනුවන ජන බලය දුටු ඒ දක්වා ලිබරල්වාදියකුව සිටි බණ්ඩාරනායක මහතා සිංහල, බෞද්ධ බහුතරයේ සිත් දිනාගනු පිණිස එම සිතුම් පැතුම්වලට ගැළපෙන නව දේශපාලන දර්ශනයකට අවතීර්ණ විය. එම සංක්‍රමණයේදී පෙරමුණ ගෙන ක්‍රියා කරන ලද්දේ මහා සංඝරත්නයයි. එනිසා එම සංඝ බලයට පහර දීම පිණිස බණ්ඩාරනායක මහතාගේ දේශපාලන විරුද්ධවාදීහු මෙම තාපස නිකාය 'බළල් අතක්' කරගත් බව පෙනෙයි. මේ අතර ශ්‍රමණයකුගේ පිරිසිදු බව තිබිය යුත්තේ සිතේ මිස ගතේ නොවන බවට නව මතයක් පළකළ මෙම තාපස නිකායේ පිරිස් දිය නෑම් ආදී කටයුතුවලින් වැළකී සිටි අතර කෙස් රැවුල් බෑම් ආදී කටයුතුවලින්ද බැහැරව සිටියහ. එමෙන්ම එකම සිවුර සති ගණන් මාස ගණන් නොසෝදා පෙරවීම නිසා ඔවුන් පිළිබඳ සාමාන්‍ය ජන සමාජය තුළ පිලිකුලක්ද මෝදු වන්නටද ඇත.
කෙසේ හෝ 1954 වසර පමණ වන විට මෙම තාපස නිකායට එරෙහිව එවක මෙරට වැඩ සිටි ප්‍රධාන පෙළේ භික්ෂුන් වහන්සේලා කිහිප නමක් ප්‍රසිද්ධියේ මත ප්‍රකාශ කරන්නට වූහ. එහෙත් එහිදී අප රටේ සිටි දේශපාලනඥයන්, උගතුන් සේම ධනවත් ව්‍යාපාරිකයන් කිහිප දෙනෙක්ද මෙම තාපස නිකායේ පක්ෂය ගෙන ක්‍රියා කළහ. මේ පසුබිම යටතේ බුදු සසුන වනසමින් ඊට මිථ්‍යා මත මුසු කරන මෙම තාපස නිකායට එරෙහිව මෙරට මහා සංඝරත්නය විසින් කොළඹ සිට කතරගම දක්වා පාගමනක් සංවිධානය කරන ලදී. ඒ 1954 වසරේදීය. මෙහිදී එම පාගමන යන අතරතුර මෙම තාපස නිකායේ සාමාජිකයන් එය කඩාකප්පල් කරවනු පිණිස කළුතර බෝධිය, මාතර බෝධිය යන ස්ථානවල මහ මග අවුරා සිටි අතර ඔවුන් එම ක්‍රියා හඳුන්වන ලද්දේ 'භාවනා වැඩසටහන්' ලෙසිනි. ඉන්පසුව මහා සංඝරත්නයේ පාගමන තිස්සමහාරාමයට පැමිණෙත්ම මෙම තාපස කල්ලි සාමාජිකයෝ තිස්සමහාරාම දාගැබ ඇහිරෙන ලෙසින් එවන්  භාවනා වැඩසටහනක් පවත්වමින් හිඳිනු දක්නා ලදී. සාමාන්‍යයෙන් පා ගමනින් මිස වාහනවලින් නොයන බවට ඒ දක්වා සපථ කොට සිටි ඔවුන් මෙලෙස කළුතර සිට මාතරටත් එතැනින් තිස්සමහාරාමයටත් යනු කිසිවකු දැක නොතිබූ අතර ඔවුන් විසින් පසුව එය ප්‍රචාරය කරන ලද්දේ තම ශ්‍රමණයන් සෘද්ධි බලයෙන් අහසින් ගමන් ගත් බවකි. කෙසේ හෝ පසුව එම තාපස නිකායට හිතැති ධනවත් ව්‍යාපාරිකයන් විසින් ඔවුන් රාත්‍රී කාලවල වාහනවලින් කළුතරින් මාතරටත් මාතරින් තිස්සමහාරාමයටත් රැගෙන ගිය බවද ඔවුන් අතරේ රා, අරක්කු, ගංජා, අබිං ආදියට ඇබ්බැහි වූ මානසික රෝගීන් සිටි බවද පසුව ප්‍රසිද්ධ විය.
එමෙන්ම මෙම තාපස නිකායට එරෙහි ඇතැම් ස්වාමීන් වහන්සේලා එහි කීර්තිය වැනසීම පිණිස එහි පැවිදි විම සඳහා උන්මන්තකයන් යොමු කළ බවටද ආරංචි පැතිරෙමින් තිබිණ.
ඊට පසුව මෙම තාපස නිකායේ ජනප්‍රියත්වය ශීඝ්‍රයෙන් පහළ බැස ගිය අතර අද වන විට එය මුළු රටේම වැඩිහිටියන්ගේ මතකයට පමණක් සීමා වූ සංසිද්ධියක් බවට පත්ව තිබේ.
 
තිලක් සේනාසිංහ

 ජනවාරි 03
මීගමුව කලපුව සංවර්ධන ව්‍යාපෘතිය සඳහා වෙන් කළ රුපියල් මිලියන 12කට අධික මුදලක් සාවද්‍ය සාපරාධී පරිහරණය හේතුවෙන් නියෝජ්‍ය ඇමැති සරත් ගුණරත්න මහතා දින 14කට රක්ෂිත බන්ධනාගාර ගත කිරීම.

 ජනවාරි 04
තිරසර යුගයක් සඳහා වන රජයේ ආර්ථික ප්‍රතිපත්ති ප්‍රකාශනය එළිදැක්වීම.

 ජනවාරි 11
රජයේ වාහන 40ක් සිය පවු‍ලේ සමීප ඥාතීන් හිතමිතුරන් විසින් භාවිතා කිරීමේ චෝදනාව මත විමල් වීරවංශ මහතා රක්ෂිත බන්ධනාගාර ගත කිරීම.

 ජනවාරි 17
අතුරලියේ රතන හිමියෝ පාර්ලිමේන්තුවේ ස්වාධීන මන්ත්‍රීවරයෙකු ලෙස කටයුතු කරන බවට නිවේදනය
කිරීම.
ආන්දෝලනයට තුඩු දී තිබූ කොට්ඨාස සීමා නිර්ණ වාර්තාව ඇමැති ෆයිසර් මුස්තාපා මහතාට බාර දීම.

 ජනවාරි 19
ජී.එස්.පී. තහනම ඉවත් කළ බවට යුරෝපා සංගමය නිල වශයෙන් නිවේදනය කිරීම.

 ජනවාරි 24
බැඳුම්කර ගනුදෙනුව පිළිබඳ සොයා බැලීම සඳහා ජනාධිපති කොමිසමක් පත් කිරීම.

 ජනවාරි 26
බැඳුම්කර ගනුදෙනුව සම්බන්ධයෙන් වූ කෝප් කමිටුවේ වාර්තාව නීතිපතිට බාර දීම.

 පෙබරවාරි 22
බැඳුම්කර ගනුදෙනුව පිළිබඳ විමර්ශන කිරීම සඳහා පත් කළ ජනාධිපති කොමිසම හමුවේ මහබැංකු අධිපති ආචාර්ය ඉන්ද්‍රජිත් කුමාරස්වාමි මහතා සාක්ෂි දීම.

 පෙබරවාරි 27
පාතාල කල්ලි නායක එම්.පී. අරුණ දමිත් උදයංග නොහොත් “සමයං” සහ ඔහුගේ ගෝලයන් පහක සහ බන්ධනාගාර නිලධාරීන් දෙදෙනකු ඝාතනය කිරීම.

 මාර්තු 08
මැති සබයේ කටයුතුවලට දිගින් දිගටම බාධා කිරීම හේතුවෙන් ඒකාබද්ධ විපක්ෂයේ නායක දිනේෂ් ගුණවර්ධන මහතාට සතියක කාලයකට මැති සබය තහනම් කිරීම.

 මාර්තු 13
එක්සත් ජාතික පක්ෂ රජයේ හිටපු සෞඛ්‍ය ඇමැතිවරියක වූ රේණුකා හේරත් මහත්මිය අභාවප්‍රාප්ත වීම.
සෝමාලියානු මුහුදු කොල්ලකරුවන් ලාංකිකයන් සිටි නැව පැහැර ගැනීම.

 අප්‍රේල් 14
මීතොටමුල්ල කසළ කන්ද නාය යෑම.

 අප්‍රේල් 25
ශ්‍රී ලංකා නිදහස් පක්ෂයේ දඹුල්ල ආසන සංවිධායක ධුරය දැරූ ජනක බණ්ඩාර තෙන්නකෝන් සහ පාතදුම්බර සංවිධායක ලොහාන් රත්වත්තේ යන මන්ත්‍රීවරු සංවිධායක ධුරවලින් ඉවත් කිරීම.
සිය පියා වන ජනක බණ්ඩාර තෙන්නකෝන් මහතා දැරූ සංවිධායක ධුරය ඉවත් කිරීම නිසා මධ්‍යම පළාත් අමාත්‍ය ප්‍රමිත බණ්ඩාර තෙන්නකෝන් මහතා අමාත්‍ය ධුරයෙන් ඉල්ලා අස්වීම.

 අප්‍රේල් 26
රෝහණ දිසානායක මහතා ශ්‍රී ලංකා නිදහස් පක්ෂ මාත‍ලේ සංවිධායක ධුරයෙන් ඉල්ලා අස්වීම.

 අප්‍රේල් 28
කුණු ඉවත් කිරීම අත්‍යවශ්‍ය සේවාවක් බවට පත් කරමින් ජනාධිපති මෛත්‍රීපාල සිරිසේන මහතා විසින් නිකුත් කළ ගැසට් නිවේදනය අනුමත කිරීමට හදිසියේ පාර්ලිමේන්තුව රැස් කිරීම.

 මැයි 3
එක්සත් ජනතා නිදහස් සන්ධානයේ ගාල්ල දිස්ත්‍රික් පාර්ලිමේන්තු මන්ත්‍රී ගීතා කුමාරසිංහ මහත්මිය ද්විත්ව පුරවැසිභාවය දැරීම නිසා මන්ත්‍රී ධුරය දැරිය නොහැකි බව අභියාචනාධිකරණය තීන්දු කිරීම.

 මැයි 9
‍පොලිස් මත්ද්‍රව්‍ය නාශක කාර්යාංශයේ නිලධාරීන් පිරිසක් ඉලක්ක කර පිළියන්දලදී වෙඩි තැබිමේ සිද්ධියෙන් ‍පොලිස් කොස්තාපල්වරයෙක් මිය ගිය අතර තවත් හයදෙනකු තුවාල ලැබිය.

 මැයි 10
උතුරුමැද පළාත් සෞඛ්‍ය හා දේශීය වෛද්‍ය අමාත්‍ය කේ.එච්. නන්දසේන මහතා එම ධුරයෙන් ඉවත් කර හේරත් බණ්ඩා මහතා පත් කිරීම.
උතුරුමැද පළාත් ප්‍රවාහන හා යෞවන කටයුතු ඇමැති එස්.එම්. රංජිත් මහතා එම අමාත්‍ය ධුරයෙන් ඉල්ලා අස්වීම.
වෙසක් පුර පසළොස්වක ‍පොහොය නිමිත්තෙන් බන්ධනාගාර ගතව සිටි රැඳවියන් 597 දෙනකුට ජනාධිපති සමාව දීම.

 මැයි 11
ඉන්දීය අගමැති නරේන්ද්‍ර මෝදි මහතා ශ්‍රී ලංකාවට පැමිණීම.
පාතාලයේ නායක මධුෂ්ට අයත් බව කියන කෝටි 200ක හෙරොයින් කිලෝ ග්‍රෑම් 200ක් ‍පොලිස් භාරයට ගැනීම.

 මැයි 15
තමා පාර්ලිමේන්තු මන්ත්‍රී ධුරය දැරීමට නුසුදුසු බව අභියාචනාධිකරණය දුන් තීන්දුව අවලංගු කරන ලෙස ඉල්ලා ගීතා කුමාරසිංහ මහත්මිය ශ්‍රේෂ්ඨාධිකරණය හමුවට යාම.

 මැයි 16
ක්‍රීඩා ඇමැති දයාසිරි ජයසේකර මහතා ශ්‍රී ලංකා නිදහස් පක්ෂ කැබිනට් ප්‍රකාශක ලෙස කැබිනට් මණ්ඩලය තීරණය කිරීම.
උතුරුමැද පළාතේ ප්‍රවාහන, ක්‍රීඩා හා කර්මාන්ත ඇමැතිවරයා ලෙස සුසිල් ගුණරත්න මහතා පත් කිරීම.

 මැයි 17
එම්.බි. සේමසිංහ හා ආර්.එම්.පී.බි. රත්නායක යන මහත්වරු උතුරුමැද පළාත් සභාවේ අමාත්‍ය ධුරවලින් ඉවත් කර සරත් ඉලංගසිංහ හා සම්පත් ශ්‍රී නිලන්ත යන මහත්වරු එම අමාත්‍ය ධුර සඳහා පත් කිරීම.

 මැයි 22
වත්මන් රජයේ පළමු කැබිනට් සංශෝධනය මුදල් හා ජනමාධ්‍ය අමාත්‍ය ධුරය මංගල සමරවීර මහතාට දීම.  විදේශ අමාත්‍ය ධුරය රවි කරුණානායක මහතාට බාර දීම. එහිදී කැබිනට් ඇමැතිවරු නවයක් හා රාජ්‍ය ඇමැතිවරයෙක් දිවුරුම් දුන්හ.

 ජූනි 05
රගර් ක්‍රීඩක වසීම් තාජුඩීන් මහතාගේ ඝාතනයේ සාක්ෂි වසන් කළ බවට චෝදනාව යටතේ වසරකුත් දින දොළහක් රක්ෂිත බන්ධනාගාර ගත කර සිටි හිටපු ‍‍‍ජ්‍යෙෂ්ඨ නියෝජ්‍ය ‍පොලිස්පති අනුර සේනානායක මහතා ඇප මත මුදා හැරීම.

 ජූනි 15
උතුරු පළාත් ප්‍රධාන ඇමැති සී.වී. විග්නේෂ්වරන් මහතාට එරෙහිව මන්ත්‍රීවරු 21කගේ අත්සනින්  යුත් විශ්වාසභංග යෝජනාව පළාත් ආණ්ඩුකාර රෙජිනෝල්ඩ් කුරේ මහතාට භාර දීම.

 ජූනි 19
කසළ බැහැර කිරීමේ සිද්ධියක් මුල් කර ගනිමින් ලංකා කම්කරු කොංග්‍රසයේ නායක ඇරුමුගම් තොණ්ඩමාන් මහතා නුවරඑළිය දිස්ත්‍රික් සංවර්ධන කමිටු සම සභාපති ධුරයෙන් ඉල්ලා අස්වීම.

 ජුලි 05
 සන්ඩේ ලීඩර් මාධ්‍යවේදිනි මෙල් ගුණසේකර මෙනවිය ඝාතනය කිරීමේ චෝදනාවට  වරදකරු වූ ඇන්ටන් ජෝර්ජ්ට කොළඹ මහාධිකරණය මරණීය දණ්ඩනය නියම කිරීම.

 ජූලි 10
 කන්කසන්තුරේ සිමෙන්ති කර්මාන්තශාලව අවට ගොඩ ගසා තිබූ අබලි යකඩ තොගයක් යුද  හමුදාව යොදාගෙන ඉවත් කිරීමේදී සිදුව ඇතැයි කියන දුෂණයන්
සම්බන්ධයෙන් ප්‍රකාශයක් සටහන් කර ගැනීමට හිටපු ආරක්ෂක ‍ලේකම් ගෝඨාභය රාජපක්ෂ මහතා මහාපරිමාණ වංචා දූෂණ සෙවීමේ කොමිසමට කැඳවීමය.
ජල සම්පාදන අමාත්‍යවරයාව සිටියදී අමතර ප්‍රදේශයේ ජලයබෙදා හැරීමේ ව්‍යාපෘතියකට අදාළව සිදුව ඇතැයි කියන දූෂණයන් සම්බන්ධයෙන් ප්‍රකාශයක් සටහන් කර ගැනීමට දිනේෂ් ගුණවර්ධන මහතා මහා පරිමාණ වංචා දූෂණ සෙවීමේ  ජනාධිපති කොමිසමට කැද¼වීම
මාත‍ලේ ප්‍රාදේශීය සංවර්ධන කමිටුවේ සම සභාපති ලෙස කටයුතු කළ  ජනක බණ්ඩාර  තෙන්නකෝන් මහතා එම තනතුරෙන් ඉවත් කර  නනදිමිත්‍ර ඒකනායක මහතා පත් කිරීම.

 ජුලි 19
පාර්ලිමේන්තු මන්ත්‍රී  රොෂාන් රණසිංහ මහතා ඒකාබද්ධ විපක්ෂයෙන් ඉවත් වීම.
 ස.තො.ස ගඩබාවට ගෙන යමින් තිබූ කන්ටේනරයක කොකේන් මත්ද්‍රව්‍ය කිලෝ 160ක් ‍පොලිස් භාරයට ගැනීම

 ජූලි 20
අතුරුදන් පුද්ගලයන් පිළිබඳ කාර්යාලය පිහිටුවීම, පරිපාලනය හා කර්තව්‍ය ඉටු කිරීම පිළිබඳ පනතට අදාළ ගැසට් නිවේදනයට ජනපති මෛත්‍රීපාල සිරිසේන මහතා අත්සන් තැබිම

 ජූලි 22
යාපනය මහාධිකරණ විනිසුරු එම්.ඉලංච්ෙලියන් මහතා ඉලක්ක කර වෙඩි තැබිමේ සිද්ධියෙන් එහිදී විනිසුරුවරයාගේ ආරක්ෂක නිලධාරියෙකු ජීවිතක්ෂයට පත් වූ අතර තවත්  නිලධාරියෙකු තුවාල ලැබිය.

 අගෝස්තු 02
 බැඳුම්කර කොමිසමේ සාක්ෂි ලබාදීමට රවි කරුණානායක මහතා පැමිණීම.

 අගෝස්තු 03
රවික රුණානායක මහතාට එරෙහිව ඒකාබද්ධ විපක්ෂයවිශ්වාසභංග යෝජනාව  කථානායක කරු ජයසූරිය මහතාට භාරදීම.

 අගෝස්තු 07
'ආවා' කල්ලි ප්‍රධානියා ‍පොලීසිය අත්අඩංගුවට ගැනීම.

 අගොස්තු 10
පාර්ලිමේන්තුවේදී විශේෂ ප්‍රකාශයක් කරමින් රවි කරුණානායක මහතා විදේශ කටයුතු අමාත්‍ය ධුරයෙන් ඉල්ලා අස්වීම.

 අගෝස්තු 12
 මීගමුව  කුරණ ප්‍රදේශයේදී ‍පොලිස් විශේෂ බළකා නිලධාරීන් හා පාතාල නායක මාකඳුරේ මදුෂ්ගේ ගෝලයන් අතර වෙඩි හුවමාරුවක්.

 අගෝස්තු 15
ශිරන්ති රාජපක්ෂ මහත්මිය කොළඹ අපරාධ පරීක්ෂණ දෙපාර්තමේන්තුවට කැඳවීම.
රෝහිත රාජපක්ෂ මහතා මුල්‍ය අපරාධ කොට්ඨාසයට කැඳවීම.
විදේශ කටයුතු ඇමැතිවරයා ලෙස තිලක් මාරපන මහතා දිවුරුම් දීම.

 අගෝස්තු 16
වසීම් තාජුඩීන් මහතාගේ ඝාතනය සම්බන්ධයෙන් අපරාධ පරීක්ෂණ දෙපාර්තමේන්තු යෝෂිත රාජපක්ෂ මහතාගෙන් ප්‍රශ්න කිරීම.

 අගෝස්තු 17
අගමැති රනිල් වික්‍රමසිංහ මහතාගේ දේශපාලන දිවියට වසර 40ක් පිරීම නිමිත්තෙන් බණ්ඩාරනායක සම්මන්ත්‍රණ ශාලාවේදී 'හෙට දකින රනිල් ' ඡායාරූප ප්‍රදර්ශනයක් ආරම්භ කිරීම.

 අගෝස්තු 23
 පළාත් සභා මැතිවරණය එකම දිනයකදී පැවැත්වීමට අදාළ 20 වෙනි ව්‍යවස්ථා සංශෝධන පනත් කෙටුම්පත  පාර්ලිමේන්තුවට ඉදිරිපත් කිරීම.
විජයදාස රාජපක්ෂ මහතා අධිකරණ හා බුද්ධ ශාසන අමාත්‍ය ධුරයෙන් ඉවත් කිරීම.

 අගෝස්තු 24
 සෞඛ්‍ය, ‍පෝෂණ හා දේශීය වෛද්‍ය ඇමැති දොස්තර රාජිත සේනාරත්න මහතාට එරෙහි විශ්වාස භංග යෝජනාව ඒකාබද්ධ විපක්ෂය විසින්  කථානායක කරු ජයසූරිය මහතාට භාර දීමය.

 සැප්තැම්බර් 06
 හිටපු ජනාධිපති ‍ලේකම් ලලිත්, වීරතුංග හා විදුලි සංදේශ නියාමන කොමිෂන් සභාවේ හිටපු අධ්‍යක්ෂ ජනරාල් අනුෂ වැල්පිට යන මහත්වරු බරපතළ වැඩ සහිතව වසර තුනක සිර දඬුවම් නියම වීම.

 සැප්තැම්බර් 12
 සංචාරක සංවර්ධන හා ක්‍රිස්තියානි ආගමික කටයුතු නියෝජ්‍ය ඇමැති ධුරයෙන්  අරුන්දික ප්‍රනාන්දු මහතා ඉවත් කිරීම.

 සැප්තැම්බර් 20
 හිටපු ජනාධිපති ‍ලේකම් ලලිත් වීරතුංග හා අනූෂ වැල්පිට යන මහත්වරුන් ඇප මත මුදා හැරීම.

 සැප්තැම්බර් 27
 යාපනය විද්‍යා දැරිය දූෂණය කර ඝාතනය කිරීමේ සිද්ධියට වරදකරුවන් වූ හත් දෙනෙකුට මරණීය දණ්ඩනය නියම කිරීම.

 ඔක්තෝබර් 10
 අධිකරණ නියෝග නොතකමින් හම්බන්තොටදී විරෝධතා පැවැත්වීම සම්බන්ධයෙන්, පාර්ලිමේන්තු මන්ත්‍රීවරුන් වන නාමල් රාජපක්ෂ, ප්‍රසන්න රණවීර හා පළාත් සභා මන්ත්‍රී උපාලි කොඩිකාර යන මහත්වරු අත්අඩංගුවට ගැනීම.
එක්සත් ජාතික පක්ෂයේ මහ‍ලේකම්, ඇමැති කබිර් හෂීම් හා  එහි සභාපති ඇමැති මලික් සමරවික්‍රම බැඳුම්කර කොමිසමේ සාක්ෂි ලබාදීම

 නොවැම්බර් 02
 ගීතා කුමාරසිංහ මහත්මියට පාර්ලිමේන්තු මන්ත්‍රීධුරය දැරිය නොහැකි බව  
ශ්‍රේෂ්ඨාධිකරණය දැනුම් දෙයි.

 නොවැම්බර් 16
කෝප් කමිටුවේ සාමාජිකයන් වන දයාසිරි ජයසේකර, අජිත් පී. පෙරේරා, සුජීව සේනසිංහ හා හර්ෂණ රාජකරුණා යන මහත්වරු අර්ජුන් ඇලෝසියස් සමග දුරකථන සංවාද පැවැත් වූ බවට බැඳුම්කර කොමිසම හෙළිදරව් කිරීම.

 නොවැම්බර් 20
 අගමැති  රනිල් වික්‍රමසිංහ මහතා බැඳුම්කර කොමිසමේ සාක්ෂි දීමට  පැමිණීම.

 නොවැම්බර් 23
පළාත් සභා හා පළාත් පාලන ඇමැති  ෆයිසර් මුස්තාපා මහතාට එරෙහිව ඒකාබද්ධ විපක්ෂය හා  ජනතා විමුක්ති පෙරමුණ කථානායකවරයාට විශ්වාසභංග යෝජනා දෙකක් භාර දීම.

 දෙසැම්බර් 05
 ජාතික නිදහස් පෙරමුණේ නියෝජ්‍ය නායක වීරකුමාර දිසානායක මතා ශ්‍රී ලංකා නිදහස් පක්ෂයේ සාමාජිකත්වය ගැනීම.

 දෙසැම්බර් 10
 ඒකාබද්ධ විපක්ෂය නියෝජනය කළ පාර්ලිමේන්තු මන්ත්‍රී ශ්‍රියානි විජේවික්‍රම මහත්මිය ශ්‍රී ලංකා නිදහස් පක්ෂයේ සාමාජිකත්වය ලබා ගැනීම.

 දෙසැම්බර් 18
 පළාත් පාලන මැතිවරණය පෙබරවාරි 10 ලෙස ප්‍රකාශයට පත් කිරීම

 දෙසැම්බර් 19
 නිමල් ලංසා මහතා ස්වදේශ කටයුතු නියෝජ්‍ය ඇමැති ධුරයෙන් ඉවත් වීම.

කමණී හෙට්ටිආරච්චි

පංච කල්‍යාණය ගැන කතා කිරීමේදී ඡවි නොහොත් චර්ම කල්‍යාණයට විශේෂිත තැනක් හිමිවේ. ස්තී‍්‍ර පුරුෂ ජාති ආගම් භේදයකින් තොරව සියලූ දෙනාම හමේ වර්ණය ගැන හා නීරෝගීකම ගැන ඉමහත් අවධානයක් යොමු කරයි. හමේ වර්ණය කළු සුදු හෝ තලඑළලූ විය හැක. ලප කැලැල්වලින් තොර පැහැපත් හමක් පවතීනම් රූප අලංකාරය මනාව ඔප්නැං වෙයි. ආයුර්වේදයට අනුව හමෙහි පැහැපත් බව වැඩිකරගැනීමට භාවිත කරන ඖෂධ බොහොමයකි .
සම අවලස්සන සහ රෝගී කරනා කුරුලෑ නැති කිරීම සඳහා පහත සඳහන් ඖෂධ යොදාගෙන  ඔබට ගෙදරදීම අත් බෙහෙතත් සාදා ගත හැක.
 
පිපිඤ්ඤා යුෂ තේ හැඳි 1 යි 
දෙහි යුෂ තේ හැඳි 1/2 යි 
එළකිරි මේස හැඳි 1 යි 
මේ සියල්ල එකට කලවම් කර කොහොඹ කොළ තැම්බූ වතුරෙන් ස්ටීම් කර කුරුලෑ ඇති තැන්වල ආලේප කර විනාඩි 10 කට පමණ පසුව සෝදා හරින්න. 
අපේ රට උෂ්්ණාධික රටකි. එනිසා නිතරම දහදිය දැමීම සිදුවේ. ගෙල, මුහුණ, කිහිලි, ඉකිලි අත්ල, පියයුරු ප‍්‍රදේශය සහ කලවා ආශි‍්‍රතව ද වැඩි වශයෙන් දහදිය දැමීම සිදුවේ. දහදිය දැමූ පසුව සෑහෙන වේලාවක් ගිය විට කිහිලි ඉකිලි ආදි ස්ථානවලින් දුගඳ හමා එයි. 
මේ සඳහා බෙලිකොළ, නිිදිකුම්බා, කොහොඹ කොළ තම්බාගත් වතුරෙන් සිරුර සෝදා හරින්න.
වෙනිවැල් ගැට තැම්බු වතුරෙන් ඇඟ සේදීමද ගුණදායකය. එමෙන්ම බෙලි කොළ ගෙන අඹරා තලපයක් සේ සාදා ඉකිලි කිහිලි යට ආලේප කර පැය භාගයකට පමණ පසු සෝදා හැරීම මගින්ද දහඩිය දුඟද දුරුකර ගත හැක. 
මුහුණේ ලප කැලැල් විවිධ හේතුන් නිසා ඇති වෙයි. එවැනි ලප කැලැල් සඳහා ආයුර්වේදීය ආලේපනයක් ලෙස පහත ඖෂධය භාවිත කළ හැක.
කෝමාරිකා යුෂ මේද හැඳි 2ක් , කරාබු නැටි 1 ක් , හොඳින් තලා කුඩු කර මී කිරි යොදය මේස හැඳි 1ක් දමා ලෙමන් බින්දු 2ක් මිශ‍්‍රකොට ආලේපනයක් සාදා කළු ලප කැලැල් මත ආලේප කරන්න. කපු පුඵන් කෑල්ලකින් පහසුවෙන් ආලේප කළ හැකිය. විනාඩි 20කින් සෝදා හරින්න.
අලිගැටපේර මදයේ ලෙල්ල ආශි‍්‍රතව ඇති කොළ පැහැයට හුරු මදය සුරා තලපයක් සේ සාදා මුහුණේ ආලේප කිරීම මහින්ද ඔබේ සම පැහැපත් වෙයි.
තවද කෝමාරිකා මදය ගෙන පැයක් පමණ ශීතකරණයේ තබා ගෙන එයට මී පැණි හා දෙහි යුෂ කලවම් කර මුහුණේ ආලේප කර පැය 2 කට වැඩි කාලයක් තබා ඇල්දියෙන් සෝදා හැරීමද ඔබේ මුහුණ පැහැපත් කරනා ක‍්‍රමයකි. 
හමෙහි වර්ණය වැඩිකරගැනීමට උපකාර වන වර්ණ කාරක ද්‍රව්‍ය රාශියක් ආයුර්වේදයේ ඇත. ඒ අතර රත්හඳුන්, සැවැන්දරා මුල්, කිරිබඳු අල, වැල් මී, ඉරමුසු, කහ, රංකහ, කස්තුරි, වෙනිවැල්ගැට වැනි එ්වා වෙයි. මේවා විවිධාකාරයෙන් ආලේපකර ගැනීිමෙන් හෝ ඇඟට ඇතුල් කර ගැනීිම මගින් හම පැහැපත් වීම සිදු වෙයි. 
මෙයට අමතරව හමෙහි අළුහම් තිබේ නම් එයද හම රෝගී කරන දිලීර තත්ත්වයකි. මේ නිසා හමෙහි පැහැය මෙන්ම දිලිසෙන ගතිය නැතිවේ. වරින් වර කැසීමට පටන් ගනී. මේ සඳහා වද කහ, සුවඳ කොට්ටං, අගිල්, ගම්මිරිස් සමව ගෙන තැඹිලි වතුරෙන් අඹරා මැටි භාජනයක දමා දින 7 ක් පොළොව යට වළලා තබා ගෑමෙන් සුදු වෙයි. 
කුෂ්ට දද ඇති විටකදී මදුරු තලා කොළ , පුෂ්කර ඇට පුලූස්සා ගත් අළු හා ගෙන්දගම් සමව ගෙන දෙහි ඇඹුලෙන් අනා ආලේප කිරීම සුදුසුය.
සමෙහි ඇතිවන අපිරිසිදු ලොම් ඉවත් කිරිම තුළිින්ද හම පැහැපත් වේ. මේ සඳහා හක්බෙලි කටු, ඔලිද කොළ විනාකිරි වලින් අඹරා අනවශ්‍ය රෝම වැඩිපුර ඇති තැන්වල ආලේප කර පංච වල්කන පොතු වන (නුගපොතු, බෝපොතු අත්තික්කා, ගංසුරිය, ඇහැළපොතු) වැනි ඖෂධීය ජලයෙන් මුහුණ සේදීමෙන් අනවශ්‍ය අපිරිසිදු රෝම ඉවත් වී සම පැහැපත් වී පිරිසිදු වේ. 
සම මතුපිට ඇති වන ඉන්නන්ද ඔබේ පෙනුම අවලස්සන කරයි. ඉන්නන් සඳහා කෝමාරිකා මද දෙහි ඇඹුලෙන් ගෑම හොඳ ඔසුවකි.
මේ දිනවල උදෑසන තද සීතල ගතියක් පැවැතියද දහවලේ ඇත්තේ දැඩි වියළි බවකි. මෙම දේශගුණික තත්ත්වය හම වියළී කොරල ඇති වීමට හේතුවෙයි. එවැනි අවස්ථාවල තල ස්වල්පයක් පිරිසිදුව කොටා රට ඉදි සමඟ මිශ‍්‍රකර දෙහි ගෙඩියක ප‍්‍රමාණයක් ආහාරයට ගැනීිමෙන් හමේ වියළි බව නැති කරගත හැක. 
 
දේශීය විකිත්සාවට අනුව සම පැහැපත් කර ගත හැකි ආලේපන පිළිබඳ වන මේ ලිපිය නාවින්න බණ්ඩාරනායක ආයුර්වේද පර්යේෂණායතනයේ ජ්‍යෙෂ්ඨ වෛද්‍ය නිලධාරී රුවිනී ප‍්‍රීතිකා මෙන්ඩිස් සමග සාකච්ඡා කර ලියවෙන්නකි.
 
චමිලා අල්විස්

මිනිස් වාසයක ඇති දැඩි වූ මාංශ භක්ෂක සතුන් යළි වනයට මුදාහැරීම ඉතා අසීරු කාර්යයකි. එහි අසීරු බව ලෝකයා දැන ගත්තේ ප්‍රකට පරිසරවේදිනියක වන ජෝයි ඇඩම්සන් විසින් රචිත Born free (සිංහල පරිවර්තනය - උපන්නේ නිදැල්‍ලේ - ජයන්ත විමලසේන) කෘතියෙනි. එය එල්සා නම් සිංහදේනුව යළි වනගත කිරීමට ගන්නා ලද අසීරු උත්සාහය පිළිබඳව ලියවූවකි. මේ උඩවලව ඇත් අතුරු සෙවණේ හැදී වැඩුණ පුල්ලී නම් කොටි දෙන වනගත කිරීමේ අත්දැකීම අලළා වනජීවී පශු වෛද්‍ය ප්‍රමුදිත දේවසුරේන්ද්‍ර ලියූ ලිපියකි. 
 
නගරයක පශු වෛද්‍ය වෘත්තියේ යෙදෙන්නෙකු සහ වනජීවී පශු වෛද්‍යවරයකු ලබන අත්දැකීම් අහසට ‍පොළව මෙනි. භාරකාරයන් කැටිව වාහනයකින් පැමිණෙන බලු බළලුන්ට ප්‍රතිකාර කිරීමත්, වනයේ නිදහසේ හැසිරෙන අලි ඇතුන්ට ප්‍රතිකාර කිරීමත් හාත්පසින්ම වෙනස්වීම ඊට හේතුවයි.
වනජීවී පශු වෛද්‍යවරයකු ලෙස කටයුතු කළ වසර දොළහ තුළ අලි ඇතුනගේ සිට මීමින්නන් දක්වා පුළුල් පරාසයක සතුනට ප්‍රතිකාර කර ඇති මා කොටින්ට ප්‍රතිකාර කර ඇත්තේ කිහිප විටකි. මේ අත්දැකීමට පාදක වනුයේද ප්‍රතිකාර පිණිස මා වෙත පැමිණි රෝගී කොටි පැටියෙකුගේ කථාවයි.
ඒ 2006 වසරයි. එවකට මම උඩවලව ඇත් අතුරු සෙවණේ පශු වෛද්‍යවරයා ලෙස කටයුතු කරමින් සිටියෙමි. දිනක් ප්‍රතිකාර පිණිස කොටි පැටවෙකු රැගෙන ආ පුවත මට සැලකළ සිටියේ ඇත් අතුරු සෙවනේ සේවකයෙකි. යාල අභය භූමියෙන් අප වෙත එවා තිබූ ඒ කුඩා පැටවා අතට ගත් සැනින් මට දැනුණේ උණු පාන් ගෙඩියක් තරම්වත් බර නැති බවයි. දෙසතියක් පමණ වයසැති මේ පැටවා ඉතා අසාධ්‍ය තත්ත්වයේ පසු විය.
කොටි පැටවාට දීමට ආහාරයක් නොවූ හෙයින් අපි පැය දෙකකට වරක් ලැක්ටොජන් ළදරු කිරි මිශ්‍රණය ලබා දුනි. එහෙත් කිරිවල ඇති නොගැළපීම නිස අවස්ථා කිහිපයකදී ඌට බඩ බුරුලට යෑමේ තත්ත්වයක් ඇති විය. කොටි පැටියා ටික කලක් අප සමග රඳවාගැනීමට සිදුවන බැවින් අපි ඇයට පුල්ලි ලෙස නම් තැබුවෙමු. පුල්ලි ගැහැනු සතෙකි. පුල්ලි නිසා මා මුහුණ දුන් අකරතැබ්බ බොහෝය. දිනක් මම ඇයට පණු බෙහෙත් දුන්නෙමි. සුළු වේලාවකදී ඇය හොඳටම අසාධ්‍ය තත්ත්වයට පත් වූවාය. කිරි බිම සම්පූර්ණයෙන් අතහැර දැමූ පුල්ලි බඩයෑම නිසා විජලන තත්ත්වයට පත් වූවාය.
එවකට ඇත් අතුරු සෙවනේ ප්‍රධාන පශු වෛද්‍යවරයා වූයේ වෛද්‍ය සුහද ජයවර්ධනය. මා වනජීවී දෙපාර්තමේන්තුවට බැඳී යන්තමින් වසරක් ගතවූවා පමණි. පුල්ලිට පණු බෙහෙත් දුන්නේ මා බැවින් මා තුළ වූයේ නොසන්සුන් බවකි. මා දුන් පණු බෙහෙත් ප්‍රමාණය නියමිත මාත්‍රාව ඉක්මවා ඇති බව වෛද්‍ය සුහද මා වෙත පවසා සිටියේ ඔහුට සුපුරුදු සැහැල්ලු ස්වභාවයෙනි. කෙසේ නමුත් ප්‍රතිකාරවලින් පසු වාසනාවකට මෙන් පසුදා උදේ වනවිට පුල්ලිට සුවය ලැබුණි.
අලි පැටවුන්  විසි ගණනක් සහ කාර්ය මණ්ඩලය පහළොවක් පමණ සිටින ඇත් අතුරු සෙවන මාගේ පළමු වනජීවී පාසල බඳු විය. එවකට නියාමකව සිටි එල්.බි. අනුර වෛද්‍ය සුහද ජයවර්ධන එනතුරු මාගේ පළමු වනජීවී උපදේශකයා විය. වසර තිහක පමණ අත්දැකීම් ඇති අනුර මා හට කියාදුන් කරුණු කාරණා අදටත් මා හට ඉතා වැදගත්  වේ. 
යළිත් අපි පුල්ලි දෙසට හැරෙමු. කමෛන් සුවපත් වූ පුල්ලි ඇත් අතුරු සෙවණේ කාර්ය මණ්ඩලයේ සුරතලෙකු බවට පත් වූවවාය. කොතෙක් අප හා මිතුරු වුවද ඇය වනයට මුදා හැරිය යුතුම විය. ඒ සඳහා විද්‍යාත්මක ක්‍රමවේදයක් වෛද්‍ය සුහද සොයමින් සිටියේය. අනෙකුත් රටවලද මේ සම්බන්ධව වූ අත්දැකීම් අධ්‍යයනය කර ඒ සඳහා ක්‍රමවේදයක් ඔහු විසින් ඉදිරිපත් කෙරුණි. ඊට පෙර ලංකාවේ කොටියෙකු කැලයට නියමානුකූලව මුදාහැරීමක් සිදු වී නොමැති බැවින් එය අපට අභියෝගයක් විය.  මා දන්නා තරමින් අහුන්ගල්‍ලේ පැවැති පුද්ගලික සත්වෝද්‍යානයේ කොටින් කැලයට මුදාහැරීමට ගත් උත්සාහය අසාර්ථක වී තිබුණි. රාණි නම් එම කොටි දෙන පසුව නෙළුව ප්‍රදේශයේදී දඩයක්කරුවකුගේ වෙඩි පහරින් මිය ගියාය.
කොටි පැටවා මුදා හැරීමට තීරණය කළේ උඩවලව ජාතික වනෝද්‍යානයටය. මිනිස් ජනාවාසයෙන් කිලෝමීටර 
දොළහක් පමණ ඈතින් වූ ප්‍රදේශයකදීය. ගෝනවිද්දගල සංචාරක නිවාසයට කිලෝමීටරයක් පමණ ඈතින් වූ සංචාරක රථ පවා ගමන් නොගන්නා ස්ථානයකි. පුල්ලි වනගත කිරීම අදියර කිහිපයකින් කිරීම අපේ අරමුණ විය.
දහවල් කාලයේ කොටි පැටවාව රැඳවීමට තාවකාලික දැල් කොටුවක් සැදවීම ඉන් එක පියවරකි. ඌව ඈත සිට නිරීක්ෂණය කිරීමට පහසු වන සේ ගසක පැලක් සාදා ටික කාලයක් සතාට ආහාර දීමට අපේ නිලධාරියෙකු දවස පුරා පැල තුළ රැඳවීය.
කොටි පැටවාට හා නිලධාරියාට අවශ්‍ය ආහාර දින දෙකකට වරක් පැල වෙත ගෙන යෑම සිරිත විය. උඩවලව ජලාශය අසල ස්ථානයක් තෝරාගත්තේ සතාටත් අපටත් අවශ්‍ය ජලය ඉන් සපුරාගත හැකි බැවිනි. තමා විසින් ආහාර සාදාගත යුතු අතර ඊට අවශ්‍ය වතුර පැල යට ගස අසල තබාගත යුතුය. පුල්ලිගේ ආහාරය වූයේ කුකුළු මස්ය. සෘජුෆෝම් පෙට්ටියක අයිස් සමග රැගෙන යන කුකුල් මස් දින දෙකක් නරක් නොවී තබාගත හැකි අතර දිනකට වරක් බැගින් පුල්ලිට ලබාදුනි.
මාස තුනක කාලයකට වැඩසටහන ක්‍රියාත්මක කිරීමට සැලසුම් කෙරුණි. වනය තුළ රැඳෙමින් අධීක්ෂණ කාර්යය වැඩි කාලයක් සිදු කරන ලද්දේ එවකට වනජීවී නියාමකවරයකු වූ චාමර සම්පත් විසිනි. මෙම ක්‍රියාන්විතය සිදුකරන කාලයේ දින දෙකකට සැරයක් යන සැපයුම් චාරිකාවට මාද නිතර සහභාගි විය. හැන්දෑවට වාහනයෙන් යන අප අවසාන කිලෝමීටර් කාලක පමණ දුර පයින් යා යුතු විය. මන්දයත් පුල්ලි වනයට හුර කරවීමට වාහන ශබ්ද බාධාවක් වන බැවිනි.
කෑම, බඩු ඇතුළු තවත් අඩුවැඩිය රැගෙන අපයන විට පෙර මග බලා සිටින චාමර අප පිළිගන්නේ බොහෝ ලෙන්ගතුවය. අනතුරුව ඉනිමගක ආධාරයෙන් අපි පැලට නගින්නෙමු. පැ‍ලේ සිට පුල්ලිව සිත්සේ නිරීක්ෂණය කරන්නෙමු. දිනකට වරක් පමණක් ආහාර දැමීම සම්පත් සිදුකරන අතර රාත්‍රියට කූඩුව විවෘත කර සතාට  කැලයට යාමට සලස්වයි. අප යන බොහෝවිට පුල්ලි කූඩුවේ සිටිනු දැකගත හැකිවිය. ගස මුදුනේ වූ චාමරගේ පැල අඩි විස්සයි විස්සක ප්‍රමාණයෙන් යුක්ත එකකි. එහි පස්දෙනෙකුට පමණ සුව පහසුවෙන් වාඩි වී සිටිය හැක. කෙළවර මැටි ගැසූ ළිපකි. ඒ තේ සාදාගැනීම පිණිසය. හඳ ඇති එක් රාත්‍රියක අපිද පැල තුළ ලැඟුම් ගත්තෙමු. මෙම ස්ථානයේදී අපිට ශබ්ද නගා කතා කිරීම තහනම්ය. ජලාශය හරහා හමන දැඩි සුළඟින් ඇතිවන අධික ශීතල අපට ගෙන ආවේ යම් තරමක් පීඩාවකි. එයට මුහුණ දෙනු වස් අප එනවිට වුවමනා අඩු වැඩිය රැගෙන ආවෙමු. සඳ එළිය සමග නිසි පදමට මීවිතද මුසුවූ කල මධ්‍යම රාත්‍රියේදී සුළඟ සමග එන සීතලට ඔරොත්තු දීමට අපට  එතරම් අසීරු නොවීය. උදෑසන වනවිට අලි කිහිපදෙනෙකු අපේ පැල ඇති ගස මුලය.  උන්ගේ හැසිරීමෙන් අපහට කිසිදු අනතුරක් නොමැතිබව පැහැදිලි වුණි. බිම ඇති වතුර බැරලයට නම් අලින් ගෙන් නොයෙකුත් අකටයුතුකම් සිදුවී තිබුණි. කොටියාට සෑදූ තාවකාලික දැල් කොටුවට අලින්ගෙන් හානි නොවීමට අපි හැමවිටම වග බලා ගත්තෙමු.
උඩවලව ජලාශය කෙළවරින් ඉර නැගෙනවිට මුළු ප්‍රදේශයම කොතරම් සුන්දරදැයි කීම පශු වෛද්‍යවරයකුට තබා සාහිත්‍යවේදියකුටද අසීරුය. මොණරුන්ගේ පිල් විදහීමත් මුව රෑන්වල දැඟලීමත් උඩවලව ජාතික උද්‍යානයට සුබ දවසක පෙරනිමිති පහළ කරයි. සීත‍ලේ ගැහෙමින් සිටි අපට චාමර සාදා දුන් කහට තේ එක ඒ මොහොතේ අමෘත පානයක් විය. සීමිත වූ වියළි ආහාර චාමරගේ පරිභෝජනයට ඉතිරි කර ඔහුගේ බලවත් ඉල්ලීමද නොසලකා  උදේ ආහාරයද නොගෙන අපි නැවත ඇත් අතුරු සෙවන බලා ගමන් ගතිමු.
ක්‍රම ක්‍රමයෙන් පුල්ලි වනයට හුරුවිය. ඇය මරා දැමූ තලගොයින් අපට නිරීක්ෂණය වූ අතර දහවල් කාලයේදීද කූඩුවට පැමිණීම අඩු විය. පසුව අපි කොටියාගේ කූඩුව හා තාවකාලික පැල එම ස්ථානයෙන් ඉවත්කර නිරන්තරයෙන්ම එම ප්‍රදේශය ගැන සෝදිසියෙන් සිටියෙමු.
ටික දිනකදී සංචාරක ජීප් රථවලට පුල්ලි අවස්ථා කිහිපයකදී නිරීක්ෂණය විය. පසුව ඌ ජීප් රථ ආසන්නයට පැමිණීම සිදු විය. මේ තත්ත්වය එතරම් සුදුසු නොවන බැවින් කොටියා තවදුරටත් ඈත කැලෑවකට රැගෙන යාමට තීරණය විය.
මේ කාලයේදී එල්ටීටීඊ ත්‍රස්තවාදීන් කහකුරුල්ලන් පැලැස්ස නම් උඩවලව රක්ෂිතයට ආසන්න ප්‍රදේශයකට ඇතුළු වී මිනිස් ඝාතන සිදුකරන ලදී. ඉන්පසු තාවකාලිකව උඩවලව ජාතික උද්‍යානය වසා තැබිණ. පසුව යුද හමුදා සෝදිසි මෙහෙයුම් සිදුකරන විට හමුදා බෆල් රථයක් පසුපස පුල්ලි පැමිණ ඇති අතර ඔවුන් විසින් එය අපට දන්වන ලදී. පසුව වෛද්‍ය සුහදගේ උපදෙස් මත ඇයව ප්‍රධාන පිවිසුමේ සිට කිලෝමීටර 20ක් පමණ දුරින් පිහිටි අලි දුටු ගලට රැගෙන යාමට තීරණය කරන ලදී. එම ගමනට මාද එක් විය. හමුදා බෆල් රථයක් තුළට දමාගත් කොටියා සමග අනුර, චාමර හා මා ද විය. පැය කිහිපයක ගමනකින් පසු අපි ඌව, අලි දුටු ගලෙහි කොටින් ගැවසුනු සලකුණු සහිත ගල්ගුහාවකට නිදහස් කරන ලදී. සහකරුවෙකු ලැබෙනතෙක් ඌට තනියම සිටීමේ හැකියාව හොඳින් ඇති බව අප කාටත් අවබෝධ විය.
ගල් ගුහාවේ පුල්ලි තනිකර අපි බෆල් රථයට නගින විටත් ඌ ලෙන්ගතුව අප දෙස බලා සිටි ආකාරය මා සිතේ තවමත් ඇඳී ඇත. අනාගතයේ දයාබර මෑණියන් කෙනෙකු වී කොටි පැටවුන් උඩවලව ජාතික  වනෝද්‍යානයට බිහිකෙරේවායි ප්‍රාර්ථනා කරමින් හමුදා රථයෙන් අපි ආපසු ගමන් ඇරඹීමු. ඉන්පසු මා අද වනතුර පුල්ලි  දුටුවේ නැත. නමුත් අවස්ථා කිහිපයකදී කොටියා එම ප්‍රදේශයෙන් නිරීක්ෂණය වී ඇත. අදටත් වසර දහයක් පමණ වයසැති කොටි දෙනක ලෙස ඇය වනයේ සැරිසරනු ඇත.

මුලින්ම අභිෂේකාගේ අලුත්ම ගීතය ගැන කතා කරමු?
මේ ගීතය නම් කරලා තියෙන්නේ නිස්සාර කියලයි. මෙය සංගීතවත් කළේ දිළුම් තේජාන් හෙට්ටිආරච්චි. ගීතය රූප රචනා කළෙත් ගායනා කරන්නෙත්් මමමයි.
ඇයි මේ ගීතයට නිස්සාර කියලා නම යෙදුවේ?
මේ ගීතයෙන් කියැවෙන්නේ ජීවිතයේ හා ආදරයේ නිස්සාර බව ගැන. ඒකයි හේතුව.
කොයි තරම් ගුණාත්මක ගීතයක් කළත් ඊට රූප රචනාවක් එකතු කිරීම අද ප්‍රවණතාවක් බවට පත් වෙලා. ඒ රූප රචනා සමහර වෙලාවට ගීතයට විතරක් නමෛයි සමාජයටත් හානි කරන අවස්ථා තියෙනවා නේද?
ඒ කතාව මමත් පිළිගන්නවා. මමත් මගේ ගීතය රූප රචනාවක් සමගින් පහුගිය 21 වැනිදා එළි දැක්වුවා. යූ ටියුබ් හරහා එය නරඹන්න පුළුවන්. මෑත කාලයේ රූප රචනා තුළ විවිධ රැලි බිහිවන හැටි මමත් දැක්කා. මල් සින්දු, ගෑනු ළමයින්ගේ ශරීරය පෙන්වන රූප රචනා සහිත ගීත යම් යම් චරිතවලට අපහාස කරමින්  කළ ගීත රූප රචනා මේ අතර තිබුණා. මගේ ගීතයවත් රූප රචනාවවත් ඒ රැලිවලට අදාළ නැහැ. මේ සඳහා මම තෝරා ගත්තේ අලුත්ම තේමාවක් හා අලුත්ම නළු නිළි යුවළක්. එය නැරඹුවොත් එහි ඇති වෙනස පෙනෙයි.
අභිෂේකා අලුත් ගීතයක් කළේ වසර දෙකකට පස්සෙයි. ඇයි අලුත් නිර්මාණයක් කරන්න ප්‍රමාද වුණේ?
මම ගායනයට ‍නෙවෙයි මගේ ව්‍යාපාරවලටයි මුල් තැන දෙන්නේ. ඒ හින්දා මම ගීත ගයන්නේ තෝරා බේරාගෙන. නිස්සාර ගීතය පටිගත කරලා කාලයක් වෙනවා. මගේ තාත්තා කිව්වා මගේ ගීත අතුරින් තාත්තා කැමතිම ගීතය මේක කියලා. තාත්තාගේ අභාවයත් එක්ක ඇති වූ කම්පනයත් ගීතය එළි දක්වන්න පමා කරන්න හේතු වුණා?
මේ දිනවල ඔබ ජූනියර් සුපර් ස්ටාර් විනිසුරුවරියක් විදිහටත් කටයුතු කරනවා?
ඔව්. ගොඩක් සතුටින් ඒ අවස්ථාවට මුහුණ දෙනවා. මුල් දවස්වල මට යම් යම් අයහපත් විවේචන ආවා. දැන් නම් හොඳ ප්‍රතිචාර ලැබෙනවා. තරගය තුළදී මම කියන දේවල්වලට ගොඩක් අය කැමතියි. මගේ තාත්තා තමයි ඒ හැමදේම මට කියලා දුන්නේ.
තරග බිම තුළදී තරග කරුවන් සම්බන්ධව අමතක නොවන සිදුවීම් නැද්ද??
 මෙහි තරග කරුවන් ජීවිතේ සංක්‍රාන්ති සමයක් ගත කරන අය. ඔවුන් ළමයිනුත් නොවෙයි. වැඩිහිටියනුත් ‍නෙවෙයි. හරිම සෘජු තීරණ ගන්න සංවේදී හිත් ඇති අය. අපේ එක වචනයකින් මානසිකව වැටෙන්න පුළුවන්. ඒ හින්දා අපි ඔවුන් සමග ගනුදෙනු කරද්දී හරි පරිස්සම් වෙනවා. ඇතැම් තරුණ හා වැඩිහිටි අය තරග වදින රියැලිටි තරගවලදී පරාජය දරාගන්න බැරි අය විනිසුරු මඩුල්ලටත් බැණලා අඬලා කෑ කෝ ගහන අවස්ථා මා දැක තියෙනවා. මේ තරගයේදීනම් එහෙම වෙන්නේ නැහැ. මේ ළමයි තුළ තියෙන විනය හැදියාව සහ දරා ගැනීමේ ශක්තිය මා අගය කරනවා.
ඒත් රියැලිටි තරගවලින් එන අය පවතින්නේ නැති බවට ඇතැමුන් චෝදනා නගනවා. තරග විනිසුරුවරුන් මතු කරන්නේ සැබෑ දක්ෂයින්ද කියන ගැටලුවත් මෙහිදී පැන නගිනවා.
රියැලිටි තරගවලින් ඇවිත් නැතිවෙලා ගිය අය වගේම පවතින අයත් ඉන්නවා. ප්‍රදීප් රංගන එවැන්නෙක්. ඔහු ගායනය වගේම තමන්ගේ වෘත්තියත් සාමාන්‍ය ජීවිතයත් සාර්ථකව පවත්වාගන යන කෙනෙක්. රියැලිටි තරගයෙන් එන අයට එක රැයින් අසීමිත ජනප්‍රියත්වයක් වගේම විශාල මූල්‍යමය වටිනාකමක් ලැබෙනවා. ඒක දරාගන්න පුළුවන් බුද්ධි මට්ටම හා නිහතමානීකමක්ද තරගකරුවන්ට තිබිය යුතුයි. මහ ‍පොළොවේ ජීවත් විය යුතුයි. ඒ තත්ත්වය රැක ගන්න බැරි වූ අයයි හිටිහැටියේ නැතිවෙලා යන්නේ.

ආරියවංශ කුලතිලක

ඔබේ අතගත් ජීවන සහකරු ගැන මුලින්ම සඳහන් කළොත්
ඔහු විදේශගතව ව්‍යාපාරික ක්ෂේත්‍රයේ නියැළෙන කෙනෙක්. අවුරුදු කිහිපයක ආදර සම්බන්ධයකින් තමා ඔහු මගේ සැමියා බවට පත්වෙන්නේ.
ඔබේ සැමියා තීක්ෂණ ගැන අයිශාරාට ඇත්තේ මොන වගේ හැඟීමක්ද?
මම හිතනවා මගේ තෝරා ගැනීම හරියට හරි කියලා. ඔහු මාව හොඳින් තේරුම් ගත්ත හොඳම සහකරුවෙක්. සහකරුවා කියන වචනයෙන් ඔහු ගැන හොඳින්ම හඳුන්වලා දෙන්න පුළුවන්. මොකද ඒ තරමටම ඔහු මගේ වැඩකටයුතුවලට විශාල සහයෝගයක් ලබා දෙනවා. මම හිතනවා බිරිඳක් විදිහට මම හරිම වාසනාවන්තයි කියලා.
කලා ක්ෂේත්‍රයේ බොහෝ දෙනාගේ විවාහ ජීවිත අසාර්ථක බව බොහෝ දෙනා කියන කතාවක්. ඔබට මේ ගැන කියන්න තියෙන්නේ මොනවාද..?

තේරුම් ගැනීම, අවබෝධය තියෙනවා නම් ඕනම කෙනෙක්ට විවාහ ජීවිතේ ලස්සනට ගෙනියන්න පුළුවන්. තීක්ෂණ ව්‍යාපාරික ක්ෂේත්‍රයට සම්බන්ධයි. මං වෘත්තීය නිළියක්. අපි දෙන්නා අතර හොඳ අවබෝධයක් තියෙනවා. ඉතිං අපි දෙන්නටම ගොඩාක් හොඳ සාර්ථක ජීවිතයක් ගතකරන්න පුළුවන් වේවි.
ඔබ ඉදිරියේ දී කලා කටයුතු සඳහා සම්බන්ධ වෙන්නේ මොන විදියටද..?
ලබන අවුරුද්දේ මම රඟපෑ අයිස්ක්‍රීම්, ‍පෝරිසාදයා කියන චිත්‍රපට තිරගත වීටම නියමිතයි. ඒ වගේම සනත් ගුණතිලක අධ්‍යක්ෂණය කළ මංගල තෑග්ග කියන ටෙලි නාට්‍යයත් ඉදිරියේදී එන්න තියෙනවා. නිරූපණය පැත්තට නම් ඒ තරම් යොමුවෙන්න අදහසක් නැහැ. සිනමාවට මූලිකත්වය දීලා ඉදිරියට යන්න තමා හිතාගෙන ඉන්නේ.

සමන්මලී නැලිගම

IMAGE

අයිවෝ ඩෙනිස් රෝහ‍ලේ

IMAGE 2018 Jan 17 10:59
මෙරට බිහි වූ විශිෂ්ටතම සංගීතඥයකු වූ සුනිල් ශාන්තයන්ගේ ගීත උරුමය ඉදිරි පරපුර වෙත රැගෙන ආ...
Views - 1071

ඡන්දය වෙනුවෙන් 'වඩියකට' ඉඩ දෙන්නැයි අපේක්ෂකයෝ ඉල්ලති

IMAGE 2018 Jan 16 10:42
තමන් කිසිදා  කසිප්පු පෙරීම නොකළ නමුත් මැතිවරණය අවසන් වන තුරු පමණක්  කාර්යාලය පිටුපස දින...
Views - 2803

අහඹු ගැබ් ගැනීම් වලකන පෙති ඇසුරුම් 20 අනුරපුර පාසලක

IMAGE 2018 Jan 16 09:59
පාසල ශුද්ධ පවිත්‍ර කිරීමේ ශ්‍රමදානයකට සහභාගී වූ මවකට අනුරාධපුර නගරයේ පාසලක තිබී අහඹු ලෙස...
Views - 3202

අන්තර්ජාල ඡායාරූපයේ සත්‍ය කතාව උදාරි හෙළි කරයි

IMAGE 2018 Jan 15 12:15
ප්‍රවේගය සිනමා පටයෙන් බොහෝ දෙනාගේ ආදරය දිනාගත් උදාරි පෙරේරාගේ තට්ට හිස සහිත ඡායාරූප පෙළක්...
Views - 4120

හොලිවුඩ් නිළියන්ටත් ලිංගික හිංසන

IMAGE 2018 Jan 15 11:49
වසර හැත්තෑ පහක කාලය තුළ අමුතුම ආකාරයේ ගෝල්ඩන් ග්ලෝබ් සම්මාන උළෙලක් පළමු වරට පසුගිය ඉරිදා...
Views - 2320

SMS මිස්කෝල් ෆෙස්බුක් නිසා කාන්තාවන් 26%ක් ගුටිකති

IMAGE 2018 Jan 15 08:37
සැමියා පහරදීම නිසා කාන්තාවන්ගෙන් සියයට විසිහයක් හිංසනයට ලක්ව ඇත්තේ ජංගම දුරකථනවලට එන කෙටි...
Views - 2709

Please publish modules in offcanvas position.

Web Analytics
X

Right Click

No right click