Home    |    Daily Lakbima    |    Sunday Lakbima    |   Rajina |    Archive    |    Advertise With Us    |     Careers Email - [email protected] youtube
Coss Ear2
lakbima.lk
COSS Ear 1
                                                                                        එසැනින් පුවත් | ගොසිප් | විශේෂ පුවත් | සුන්දර ලක්බිම | ව්‍යාපාරික පුවත්     

මෙම පොසොන් සමයේ අනුරාධපුරය, පොලොන්නරුව ඇතුළු පූජනීය නගර අශ්‍රිතව හා වන්දනා කරුවන් වැඩි පිරිසක් ගමන් ගන්නා ප්‍රධාන මාර්ග ආශ්‍රිතව දඩමස් නමින් බලු මස් විකිණීමේ මහා පිරිමාණයේ ජාවාරමක් පිළිබඳව තොරතුරු වාර්තා වේ.

මේ සඳහා ආසන්නතම ප්‍රවෘත්තිය වාර්තා වන්නේ මාදුරුඔය-පොලොන්නරුව ප්‍රධාන මාර්ගයේ අරලගංවිල ප්‍රදේශයෙනි. දිඹුලාගල ප්‍රාදේශීය සභාවට අයත්  ට්‍රැක්ටර් මගීන් අරලගංවිල ප්‍රදේශයට ගෙන ආ දිඹුලාගල ප්‍රාදේශීය සභා බල ප්‍රදේයේ  කැලිකසල අතර තිබී සුනඛයන්ගේ හිස් 2000කට වැඩි ප්‍රමාණයක් තිබීම මුල් කොට එහි වැසියන් පසුගිය 5දා මාදුරුඔය පොලොන්නරුව ප්‍රධාන මාර්ගය හරස් කොට උද්ඝෝෂණයක නිරත වූහ.

පසුගිය කාලයේ අප්‍රකටව පැවැති දඩමස් නමින් බලු මස් විකිණිමේ මෙම මිලේච්ඡ ජාවාරම මුල් වරට අනාවරණය වනුයේ  පසුගිය ඇසළ උත්සව සමයේ කතරගම ප්‍රදේශයෙනි.

සෙල්ල කතරගම වතුරුවාරාම පාරේ තිබී සුනඛයන්ගේ හිස් සහිත පොහොර උරයක් ප්‍රදේශ වාසීන්ට හමු වීමත් කතරගම කොච්චිපොතාන ප්‍රදේශයේ එක්තරා ස්ථානයක අධිශිතකරණයක් තුළ මුවන් ගේ කුර සමඟ තබා ඇති බලු මස් විකිණිමක් පිළිබඳව අනාවරණය වීමත් සමඟම අහිංසා ශ්‍රී ලංකා සත්ව හිමිකම් සහ සුභසාධන සංවිධානය ඒ සම්බන්ධයෙන් ස්ථානීය ගවේෂණයක් කොට ඇත.

එහිදී කතරගම කිරිවෙහෙර රාජමහා විහාරාධිපති පූජ්‍ය කොබවක ධම්මින්න ස්වාමින් වහන්සේ පවසා ඇත්තේ කතරගම වන්දනාවේ පැමිණෙන සමහර බැතිමතුන් නගරයේ ත්‍රිරෝද රථ රියදුරන්ගේ සිට වැසිකිලි ශෝධකයන්ගෙන් පවා දඩමස් පිළිබඳ විමසා සිටීම නිසා සමහරුන් බල්ලන් මරා දඩමස් ලෙස අලෙවි කිරීමට පුරුදුව සිටි බවකි.
මේ අතර මීට මඳ කලකට පෙර බදගිරිය තම්මැන්නාව වැව් රක්ෂිතයේ ස්ථානයක තිබී මුවන්ගේ සහ සුනඛයන්ගේ ශරීර කොටස් එකම ස්ථානයකින් හමුවීම මත මුව මස්  සහ බලුමස් කවලම් කර විකිණිමේ ජාවාරමක සුලමුල හම්බන්තොට වනජීවී නිලධාරීන්ට අනාවරණය කරගත හැකි විය.

ඉදිරි පොසොන් සමයේද ශීතකරණ තුල තැන්පත් කළ පොලීතින් පැකට් වල ඇසිරූ දඩමස් සහ ආහාර වශයෙන සකස් කළ දඩමස් ලෙස මෙම බලුමස් ජාවාරම මහා පරිමාණයෙන් සිදුවිය හැකි බව අහිංසා ශ්‍රී ලංකා සංවිධානය අනතුරු අඟවයි. 

වන සතුන් දඩයම් කිරීම සේම දඩමස් ළඟ තබා ගැනීම වන සත්ව සහ වෘක්ෂලතා ආඥා පනතට බරපතල වරදක් බැවින් මෙලෙස දඩ මස් ලෙස හඟවා බලුමස් අලෙවි කිරීම වෙළෙදුන් සහ ගණුදෙනු කරුවන් අතරේ අප්‍රකටව සිදුවේ. මෙය දණ්ඩ නීති සංග්‍රහයේ 400 වගන්තියේ වංචාව ලෙසින් හා එහිම 266 වගන්තිය යටතේ ආහාර පානවල තත්වය යන චෝදනා වලට අයත් බැවින් මෙසේ අලෙවි කරන පුද්ගලයන් අධිකරණය හමුවට පත් කිරීමට පොලීසියට බලය තිබේ.

ඊට අමතරව පාරිභෝගික ආරක්ෂක පනත යටතේ මෙවනි ජාවාරම් කරුවන්ට එරෙහිව නීතිමය ක්‍රියා මාර්ග ගැනිමේ බලයක් එම අධිකාරියක්ට තිබේ.

එසේම මහජන සෞඛ්‍ය පරීක්ෂක වරුන්ටද මෙවන් ජාවාරම් වලට එරෙහිව නීතිමය පියවර ගත හැක.

ඒ අනුව මෙවර වන්දනාවේ යාමේදී දඩමස් ඉල්ලා සිටීමෙන් මුළු මනින් බැහැර වීමෙන් මෙම වංචාවෙන් සහ පිළිකුල් සහගත ආහාර වලින් වැලකී සිටීමට ඔබට අවස්ථාව හිමි වනු ඇතැයි  අහිංසා ශ්‍රී ලංකා සංවිධානය දන්වා සිටී.









දමයන්තී ගමගේ

පසුගිය සති අන්තයේ දිවුලපිටිය සහ කඩවත යන ප්‍රදේශවල පවුල් දෙකක් කතරගම වන්දනාවේ ගියහ. ඒ එම පවුල් දෙකේ තරුණයකුගේත් තරුණියකගේත් ළඟදී සිදුකිරීමට නියමිත විවාහ මංගල්‍යය සාර්ථක කර ගැනීම සඳහා කතරගම දෙවියන්ට බාරයක් වීම සඳහාය. එම විවාහපේක්ෂිත තරුණිය, තරණයා, ඔවුන්ගේ මාපියන්, සොයුරු සොයුරියන් ඇතුළු දාහතර දෙනෙක් එම වන්දනා නඩයට අයත්ව සිටියහ.

මුලින්ම කතරගම කිරි වෙහෙර වැද පුදාගත් ඔවුහු ඉන් පසුව කතරගම දෙවොලට පැමිණ විවාහ මංගල්‍යයෙන් පසු ඔප්පු කිරීම පිණිස කතරගම දෙවියන්ට බාරයක් ද වූහ.

ඉන් පසු මෙම පිරිස ආපසු රථ ගාල බලා එමින් සිටිය දී දෙවොලට වන්දනාවේ යන පිරිස් අතරේ සිටි තරුණයකු දුටු තරුණිය එක්වරම තිගැස්සුණාය. ඒ සමඟම ඒ තරුණයා ද තරුණිය දැකීමෙන් මහත් සතුටට පත්ව ඉදිරියට අවුත් ඇගේ දෑතින්ම අල්ලා ඇය තමන් වෙතට ළං කර ගත්තේය. ඔහු නව පරපුරේ ජනප්‍රිය ටෙලි නළුවෙකි.  එබැවින් කතරගම දෙවොලට වන්දනාවේ යන සෙසු බැතිමතුන්ද හැරි හැරී ඒ දෙස බලමින් යන්නට වූහ.

තම විවාහ අපේක්ෂිත තරුණයා ඇතුළු ඔවුන්ගේ වැඩිහිටියන් ඉදිරියේ වූ මෙම සිද්ධියෙන් තරුණිය මහත් තිගැස්මකට ලක් වූ අතර “මේ මම මැරි කරන්න ඉන්න මහත්තයා; මේ එයාගේ අම්මා, තාත්තා”  ආදී වශයෙන් එම නළුවාට තමන් සමඟ ගිය කණ්ඩායම හඳුන්වා දෙන්නට විය.

“මෙයාව කවුරුත් දන්නවනේ; මේ මගේ හොඳම යාළුවෙක්; ඉස්සර අපි එකට ඩ්‍රාමා කෝස් එකක් කරලා තියෙනවා.”
ඒ සමඟම නිදහසට කරුණු දක්වන්නාක් මෙන් එම තරුණිය තම අනාගත සහකරුට සේම තමන් සමඟ පැමිණි පිරිසට කීවාය.

එතෙක් සාර්ථකව නිමවෙමින් තිබූ මේ වන්දනා ගමනේ සතුට එතැනින්ම නිමා විය. වාහනයෙන් බසින මොහොතේ පවා එම තරුණයා හෝ ඔහුගේ පාර්ශවයේ කිසිවෙක් එම තරුණියගේ මුහුණ දෙසවත් නොබැලූහ. වන්දනා ගමන නිමවීමෙන් පසු එම තරුණියගේ මවට දුරකතන ඇමතුමක් ලැබුණි. ඒ තරුණයාගේ මවගෙනි.

“අපිට කොහොමත් කතරගම දෙවිහාමුදුරුන්ගේ පිහිට තියෙනවා; උන්වහන්සේට පින්සිද්ද වෙන්න තමයි අපේ ළමයා ඔය මර උගුලෙන් බේරුණේ; කතරගම දෙයියො ඔය නළු බට්ටව අපි ඉස්සරහට එව්වෙ නැත්තං අපේ කොල්ලට ගෙදර ගේන්න වෙන්නෙ මහපාරෙත් බයිස්කෝප් නටන ඉස්කුරුප්පුවක් තමයි.” තරුණයාගේ මව කෝපයෙන් කිව්වාය.

 “ඔයාලා ඕක ‍ඔච්චර ගණන් ගන්න එපා ඒ කොල්ලා අපේ දුවත් එක්ක ඩ්‍රාමා කෝස් එකක් කරලා තියෙනවා;එච්චරයි.” තරුණියගේ මව කීවාය.

“ඔයාගේ දුව ඌත් එක්ක ඩ්‍රාමා කෝස් එකක් කරන්න ඇති; ඒත් ඔයාගේ දුවව බැඳගත්තොත් අපේ කොල්ලට කරන්න වෙන්නෙ ඩ්‍රාමා කෝස් එකක් නෙමෙයි අනාත කෝස් එකක්.” තරුණයාගේ මව දුරකතනය විසන්ධි කළාය.

 

එස්.ටී.පී සිල්වා

 

සිය දිවි නසා ගැනීම පිළිබඳ වාර්තාකරණයේදී ෆේස්බුක් ඇතුළු සමාජ ජාල වෙබ් අඩවි සහ ඇතැම් ඉලෙක්ට්‍රොනික හා මුද්‍රිත මාධ්‍ය ක්‍රියා කරන ආකාරය සමාජයට අතිශයෙන් හානිදායක විය හැකි යැයි කැලණිය විශ්ව විද්‍යාලීය වෛද්‍ය පීඨයේ(රාගම) ජ්‍යෙෂ්ඨ මහාචාර්ය කේ.ඒ.එල්.ඒ. කුරුප්පුආරච්චි මහතා කියයි.

ඔහු මේ බව කියා සිටියේ ලක්බිම ඔන්ලයින් වෙත විශේෂ ප්‍රකාශයක් කරමිනි.

වැඩි දුරටත් අදහස් දැක්වූ මහාචාර්යවරයා මෙසේද කීය.

දිවි නසා ගැනීමක් කියන්නේ ජීවිතයේ ප්‍රශ්න ගැටුලු අර්බුද වලට විසදුම් සොයනු වෙනුවට ඒ ප්‍රශ්න ගැටලු අර්බුද එලෙසම තිබියදී ජීවිතයෙන් පලා යාමක්. නමුත් ඒ සංසිද්ධීය දෙස විවිධ පුද්ගලයන් විවිධ කෝණ වලින් දැකිය හැකියි.

නමුත් එවැනි සිද්ධීන් ජනතාව අතරට ගෙන යන මාධ්‍ය කරුවා එහිදී  දැඩි සංයමකින් සහ ශික්ෂණයකින් ක්‍රියා කළ යුතුයි.

එසේ නොමැති නම් එම දිවි නසා ගැනීම තුළින් සමාජය තුළ තවත් එවනිම දිවි නසා ගැනීම් (Copycat suicide) පෙළකට ඉඩ සැලසීම වළක්වන්නට බැහැ.

සාමාන්‍ය කෙනෙකු දිවි නසා ගැනීමේදී මාධ්‍ය මගීන් ලැබෙන ප්‍රසිද්ධිය වඩා රූමත්, ධනවත්, ජනප්‍රිය හෝ ඉහළ වෘත්තීන්හි නියළෙන පුද්ගලයන්ගේ දිවි නසා ගැනීම් සඳහා මාධ්‍ය මගීන් වැඩි ඉඩ කඩක් ලබා දෙනවා. ඒ එවන් සිද්ධීන් සම්බන්ධයෙන් ජනතාව තුළ පවත්නා ස්වභාවික උනන්දුව මුල් කොට ගෙනයි.

නමුත් කිසියම් රූමත් තරුණියක් දිවි නසා ගත් පසු ඒ ප්‍රවෘත්තිය සමඟ ඇගේ රූමත් බව විදහා දැක්වෙන ඡායාරූප ඉදිරිපත් කිරීමෙන් රූමත් බව කෙරෙහි ඇති සමාජමය ඉල්ලුම හා වටිනාකම ඒ දිවි නසා ගැනීම කෙරෙහි ද යොමු වන්නට පුළුවන්.

ඒ වගේම සමාජ පුරුෂාර්ථ වශයෙන් සැලකෙන උගත් ධනවත් ආදී තත්වයන් වල පසුවන්නවුන් සිදු කළ දිවිනසා ගැනීම් මාධ්‍ය මගීන් ප්‍රසිද්ධ කිරීමේදී ඔවුන් ගේ වටිනාකම හුවා දැක්වීමෙන්ද තවත් පිරිසක් තුළ ඒ දිවිනසා ගැනිීම් වලද කිසියම් වටිනා කමක් තිබෙන්නාක් සේ හැගී යා හැකියි.

ඒ නිසා එවනි දිවි නසා ගැනීම් පසු පස එබදු හෝ ඒ ආකරයේ දිවි නසා ගැනීම් කිහිපයක් සිදු වීමේ පැහැදිලි අවදානමක් තිබෙනවා.

මෙහිදී අදහස් දැක් වූ මහාචාර්ය කුරුප්පුආරච්චි මහතා මෙසේද කීය.

ෆේස්බුක් ඇතුලු නූතන සමාජ ජාලා වෙබ් අඩවි වල දිවි නසා ගැනීම්, හදීසි අනතුරු සහ අපරාධ ආදිය පිළිබඳ ජංගම දුරකථන ආදියෙන් ලබා ගත් ජායාරූප එලෙසින්ම ප්‍රසිද්ධ කොට තිබෙනු දකින්නට පුළුවන්. 

මේවා ද  සමාජයේ මානසික සෞඛ්‍යය කෙරෙහි දැඩි සේ අනර්ථකාරී ලෙස බලපෑ හැකියි.

පලමුව මේවා දැකීමෙන් සමහරුන් තුළ මානසික කම්පනයක් (Psychological trauma) ඇතිවිය හැකි අතර පසුව එය පශ්චාත් ක්ෂතික ආතති ආබාධය (Post-traumatic stress disorder) නම් මානසික රෝගී තත්වය දක්වාත් වර්ධනය විය හැකියි.

ඒ අතර තවත් සමහරුන් තුළ මේවා නිතර නිතර දැකීම නිසා ඒ සම්බන්ධයෙන් ඇතිවිය යුතු සාමාන්‍ය සංවේදීතාව පවා නොමැතිව විසංවේදීකරණය (Desensitization) නම් තත්වයට පත් විය හැකියි.

ඒ නිසා ෆේස්බුක් ඇතුලු සමාජ ජාලා විද්‍යුත් හා මුද්‍රිත මාධ්‍ය මගීන් දිවි නසා ගැනීම් පිළිබඳ කතා කරන සෑම විටම ඒවා වැලැක්විය හැකි ආකාරයට එම පුවත් හා ඡායාරූප සකස් කළ යුතු බව මහාචාර්ය කුරුප්පුආරච්චි මහතා කියයි.

දමයන්ති ගමගේ

සමාජයේ ඉහළ යැයි සම්මත වෘත්තීන් හි යෙදෙන්නවුන්ගේ ගුණ ගරුක භාවය සහ සදාචාරාත්මක බව පිළිබඳ විවෘත සමාජ කතිකාවක් ගොඩනැඟී ඇති වර්තමානයේ තම මියගිය දෙමාපියන්ට පින් පිණිස දිනපතා රාත්‍රී අටෙන් පසු හදිසි රෝගීන් රෝහල්වලට නොමිලේ ප්‍රවාහනය කරන ත්‍රිරෝද රථ රියදුරෙකු අපට හමුවිය.

ඒ ගනේමුල්ල,තිබ්බටුගොඩ, අංක 52 නිවසේ පදිංචි සරත් ප්‍රේමතිලකය. ජීවිතයේ තරුණ වියේ සිටම වෘත්තීය රියදුරෙකු ලෙස කටයුතු කළ සරත් 1987 සිට 97 දක්වා පුරා වසර දහයක් සෞදි අරාබියේ බරවාහන රියදුරෙකු ලෙස ද සේවය කොට ඇත. ඉන් පසු මෙහි පැමිණ වරින් වර  තමන්ගේම වාහන කිහිපයක් කුලී රථ සේවයේ යොදා තිබූ ඔහු දැනට වසර හතක පමණ සිට තමන් විසින් මිලයට ගත් ත්‍රිරෝද රථයක රියදුරු ලෙස සේවය කරයි.

ඔහු විවාහකයෙකු වන අතර දියණියන් තිදෙනෙකුගේ පියෙකි. බිරිඳ කලකට පෙර මියගොසිනි. තම අනගි සේවාව පිළිබඳව ඔහු මා හා විස්තර කළේ මෙලෙසිනි.

“මගේ තාත්තාගේ නම දාවිත් සිල්වා; තාත්තා මියගිහින් දැනට අවුරුදු දාහතරක් වෙනවා. අපි සාමානයෙන් කරන්නේ මැරුණු කෙනෙකු වෙනුවෙන් අවුරුදු පතා දානයක් දෙන එක; මම හිතුවා තාත්තා‍ වෙනුවෙන්ඊට වඩා වැඩි යමක් කරන්න ඕන කියලා. අගනුවරට- ගම්පහට කිට්ටු වුණත් තවමත් මේ පළාත්වල රෑට පොදුප්‍රවාහන පහසුකම් අඩුයි. ඒ හින්දා මම රෑ අටෙන් පස්සේ උදේ හය වෙකල් මගේ ත්‍රිවිලර් එකෙන් ගම්පහ රෝහලට හදිසි රෝගීන් නොමිලේ ප්‍රවාහනය කරන්න පටන් ගත්තා. හදිසියේ කවුරුහරි මට දුරකතන ඇමතුමක් දුන්නොත් හරි ඇවිත් කතාකළොත් හරි මම වෙලාව වැස්ස වගේ කිසි දෙයක් බලන්නේ නැහැ;  වැඩේ බාර ගන්නවා. අපේ අම්මත් මගේ මේ වැඩේ බොහොම අගය කළා. ඊට පස්සේ මීට මාස පහකට කලින් අපේ අම්මත් මිය ගියා. ඊට පස්සේ මම කල්පනා කළා තාත්තා වෙනුවෙන් වගේම අම්මා වෙනුවෙනුත් යමක් කරන්න ඕනෑ කියලා. ඒ අනුව දිනපතාම රෑ අටෙන් පස්සේ තාත්තා වෙනුවෙන් ගම්පහ රෝහලට රෝගීන් ප්‍රවාහනය කරපු මම අම්මා වෙනුවෙන් රාගම‍ රෝහලටත් රෝගීන් නොමිලේ ප්‍රවාහනය කරන්න පටන් ගත්තා. ඒ වගේම පණපිටින් ඉන්න දෙමව්පියන්ව මහළු මඩම් වල විතරක් නෙමෙයි මහ පාරේ පවා අතරමං කරලා යන සමාජයේ උසස් රැකියාවල් කරන පෝසත් දූ පුත්තු අනුව බලනකොට මම හිතනවා මම ඊට වඩා පෝසත් කෙනෙක් කියලා.”

සාමාන්‍යයෙන් බොහෝ දෙනෙකු මෙවැනි කටයතු කරන්නේ සමාජයෙන් ගරු නම්බු, තාන්න මාන්න, කිර්තිය ආදී දේවල් අපේක්ෂාවෙනි. ඔබත් එවැනි දේවල් අපේක්ෂා කරනවාද? කියා අප සරත් ගෙන් ඇසූ විට ඔහු දුන්නේ ඉතා කෙටි පිළිතුරකි.

එනම් ‘මගෙ බල්ලටවත් එපා’ යන්නය.

සරත්ගේ මෙම ක්‍රියාව ඉතා උතුම් එකකැයි මෙය කියවන ඔබ සිතනු ඇත. එහෙත් ඔහු කියන්නේ තමන්ගේ මෙම ක්‍රියාව මුල්කොට තමන්ට කිත් පැසසුම් වලට වඩා අවමන් ලැබෙන බවකි.

“සමහරු කියනවා මම ත්‍රීවිලර් රස්සාව හෑල්ලු කරනවා කියලා; තවත් සමහරු කියනවා තමන්ට රෑට කීයක් හරි හොයාගන්න තියන චාන්ස් එක මම නොමිලේ හයර් ගිහින් නැති කරනවා කියලා.;නමුත් ඒ නින්දා අපහාස වලට වඩා මට මගේ දෙමව්පියො ලොකුයි. ඒ දෙන්නා වෙනුවෙන් ඕන දුකක් දරාගන්න මට පුළුවන්.”

මේ අතර තමන් මේ යහපත් කාරිය සම්බන්ධයෙන් මුහුණ පෑ අකරතැබ්බ කීපයක් ගැනද සරත් විස්තර ක‍ළේය.


“මේ පහුගිය දවසක රෑ දොළහට විතර මම ටිකක් දන්න කෙනෙක් කෝල් එකක් දුන්නා සරත් අයියේ ලෙඩෙක් ඉන්නවා ගම්පහට ගිහින් දාන්න පුළුවන්ද කියලා. මම ඇහුවා කවුද ලෙඩා කියලා එතකොට ඒ කෝල් එක දීපු හාදයා කිව්වා ඇවිත්ම බලන්න කියලා. මම ඒ කියපු ගෙදරට යනකොට එතන පාටියක් ඉවරවෙලා... ඒ පාටියට ආපු කෙනෙක් කුදාර් වෙන්නම ගහලා; අනෙක් කට්ටිය මට කියනවා මේත් ලෙඩෙක් තමයි හැබැයි මෙයාව ඉස්පිරිතාලෙට නෙමෙයි ගෙදරට ගිහින් දාන්න කියලා. නමුත් මං ඒකට කැමති වුණේ නැහැ. පස්සේ කියනවා සල්ලි කීයක් හරි දෙන්නම්ලු. ඒත් මම කිව්වා මම මේ සල්ලි වලට හයර් යන වෙලාවක් නෙමේ; නොමිලේ හදිසි ලෙඩ්ඩුන්ව  ඉස්පිරිතාලෙ ගෙනියන එක විතරයි මේ වෙලාවට කරන්නේ කියලා.”

තමන් මවට සහ පියාට පිං පිණිස ගම්පහ සහ රාගම රෝහල් වලට නොමිලේ රෝගීන් ප්‍රවාහනය කරන බව ඔහු තම ත්‍රිරෝද රථයේ පිටුපස ප්‍රදර්ශනය කරයි.

“ඉතාම කලාතුරකින් කෙනෙක් පාරෙදි එහෙම මේක දැකලා මේක බොහොම හොඳ වැඩක් කියපු අවස්ථා කීපයක් තියෙනවා. නමුත් මම මේක කාගෙන්වත් ප්‍රශංසා බලාගෙන කරන දෙයක් නෙමෙයි හදවතට එකඟවම දෙමව්පියො වෙනුවෙන් කරන පින් කමක්. මම එච්චර ධනවතෙක් නොවුණත් මට ඒ ආත්ම තෘප්තිය රුපියල් කෝටියකටත් වඩා වටිනවා.” අවසානයේ සරත් කීය.


ප්‍රසංග පෙරේරා - ජා එල

දිනසේන රතුගමගේ උතුරේ සිටින පළපුරුදු පුවත්පත් කලාවේදියෙකි. වවුනියාවේ හුන් ඔහු ඉකුත් 25 වැනිදා අවිස්සාවේල්‍ලේ සීතාවකට ආවේ තවත් මාධ්‍ය සගයන් කීපදෙනෙක් සමගය. ඒ හිතවතියකගේ පියෙකුගේ  මළ ගෙදරට සහභාගි වීමටය. රතුගමගේ සමග අනුරාධපුර ප්‍රාදේශීය මාධ්‍යවේදී අතුල බණ්ඩාරත් කොළඹ පුවත්පත් කන්තෝරුවක සේවය කරන පුවත්පත්කලාවේදීහු දෙදෙනෙක්ද ඒ පිරිසේ හුන්හ. ඔවුන් ගිය මළ ගෙදර වැඩ අවසන් කිරීමට නියමිතව තිබුණේ විසිහය වැනිදාය. මේ නිසා විසිපස් වැනිදා මළගෙදරට ගිය ඔවුන්ට වෙනදාට වඩා පරිසරයේ වෙනස්කමක් දැනුණි. උහුලන්න බැරි සීතලක් එදා  ආවේය. එනමුත්  ඔවුන් එය ගණනකට ගත්තේ නැත. 
 
“දේහයට අවසන් ගෞරව දක්වලා ටික වෙලාවක් කතා කර කර ඉඳලා රෑ කෑමට ගියා. කෑම කාලා ඉවර වෙද්දී රෑ 9.30ට විතර වුණා. එතකොටම වැස්ස පටන් ගත්තා. ටික වේලාවක් යද්දී හිතා ගන්න බැරි තරමට වැස්සා. 10.30  විතර වෙද්දී අපි හිටපු ගෙදර මිදුල යටවෙන්න ගත්තා. ඒ වෙද්දී මළ ගෙදර හිටපු අසල්වැසියන් ගොඩක් දෙනා තමන්ගෙ ගෙවල්වලට මොකද වුණේ කියල බලන්න ගියා. මළ ගෙදර ඉතිරි වුණේ අපි කීප දෙනයි පවු‍ලේ ළඟම ඥාතීනුයි විතරයි. සේරම කට්ටිය 38 ක් හිටියා. රතුගමගේ වූ දේ විස්තර කරන්නේය.
මිදුලට ගලා ආ ජල දහර  ක්‍රම ක්‍රමයෙන් ප්‍රචණ්ඩ වෙමින් පවතී.  ‍පොල්, දෙල්, ආදී ගස්වල අතු කොළ ගෙඩි ආදිය වතුරේ ගසාගෙන යමින් තිබිණි. වතුර සමග බළලෙකුද ගසාගෙන ආවේය.  
“අනේ පව් පූසා ගිලිලා මැරෙන්න යන්නෙ යැයි” කියමින් පාසල් වයසේ සිටි දැරියක පූසාව ගොඩට ගැනීමට උත්සාහ ගත්තේය. ඒ සමග මාරාවේශයෙන් සිටි බළලා දැරියගේ අත සපා කෑවේය.
“වතුර වැඩි වෙද්දී හට් එකේ තිබුණ ප්ලාස්ටික් පුටු පාවෙන්න ගත්තා. ඊට පස්සෙ අපි එකතු වෙලා ප්ලාස්ටික් පුටු ගේ ඇතුළට දැම්මා.  ඒ වෙද්දි ගේ ඇතුළට වතුර දාලා. තව ටික වෙලාවකින් බලාගෙන ඉද්දි ජල මට්ටම උඩට යනවා. අපි මෘත දේහය තිබුණ පෙට්ටිය වහලා මෘත දේහය මේසයක් උඩ තිබ්බා. තවත් ටික වේලාවක් යද්දී වතුර මට්ටම මේසයේ සීමාවටත් ආවා. දැන් මොකද කරන්නෙ?
මෘත දේහය බේරාගන්න ක්‍රමයක් කල්පනා කළා. ඊට පස්සෙ ඇඳ ඇතිරිලි අරගෙන මිනී පෙට්ටිය ගැට ගහලා නිවසේ  වහ‍ලේ බාල්කයට ගැට ගැසුවා.
දැන් මෘත දේහය පරිස්සම්.  ඊට පස්සේ  කතා කළේ අපේ ජීවිත බේර ගන්නෙ කොහොමද කියලා. ඒ වෙද්දි අඩි 4-5 විතර වතුර මට්ටම ඇවිත්. එතකොට අපි දැක්කා බඩු මුට්ටු දාන්න හදපු කොන්ක්‍රීට් තට්ටුවක්. මේක ගේ ඇතුළේම තිබුණේ. බිමට අඩි 10ක් විතර උඩින් තමයි තිබුණේ. අපි හිටපු 38ම ඉනිමගක් තියලා කොන්ක්‍රීට් තට්ටුවට නැග්ගා. කොන්ක්‍රීට් තට්ටුවට උඩින් වහලක් තිබුණ නිසා තෙමුණේ නැහැ. කොහොමහරි තිබුණ ඉඩ හිටපු කට්ටියට හිටගෙන ඉන්න විතරයි ප්‍රමාණවත් වුණේ. රෑ 11.30  වෙද්දී වතුර මට්ටම අඩි 9 1/2  ක් විතර වෙලා තිබුණා. අපි කල්පනා කළේ තව දුරටත් වතුර මට්ටම උඩට ආවොත්  මොකද කරන්නෙ කියලා. එහෙම වුණොත් වහලට නගිමු කියල කතා වෙලා වහ‍ලේ ඉඩක් හදන්න උත්සහ කළා. 
කොහොම වුණත් රෑ 11.30 විතර වෙද්දී අපට තේරුණා අපේ ජීවිත අවදානම් කියලා. වාසනාවට ඒ වෙද්දී අපි ළඟ ජංගම දුරකථන කීපයක්ම තිබුණා.
“පිරිස අතර මාධ්‍යවේදීන් කීප දෙනෙකුම සිටි බැවින් ආපදා මධ්‍යස්ථානය, ‍පොලිස් හදිසි ඇමතුම් අංශය, ත්‍රිවිධ හමුදාව, පෞද්ගලිකව හඳුනන ඉහළ හමුදා ප්‍රධානීන් ඇතුළු විශාල පිරිසකට දුරකථන ඇමතුම් දෙමින් තමන් පත්ව සිටින අවදානම් තත්ත්වය ප්‍රකාශ කරන්නට වූහ. මේ අතර ඔවුන්  සේවය කළ මාධ්‍ය ආයතනද පිරිස බේරා ගැනීම සඳහා විවිධ උත්සාහයන් ගනිමින්  සිටියේය. මෙහිදී සෑම ස්ථානයකින්ම ලැබුණු උපදෙස වූයේ “ඔයාල බේරා ගන්න එනවා කලබල වෙන්න එපා” පමණකි.
රාත්‍රියේ උඩට නගින විට පිරිස විහිළු තහළු කරමින් නැග  සිටියද අලුයම 4.00 වන විට  අනෙකුට කතා නොකරන තත්ත්වයට පිරිස පත්ව සිටියෝය. ඇති වූ  ජීවිත බිය නිසාම සියලු දෙනා මුණිවත රැක්කෝය.
“හැබැයි මම කීවා අවුරුදු 30ක් අපිට කොටි ගැහුවා හැබැයි මේ වගේ අවිනිශ්චිතකමක්  බයක්නම් ඇති වුණේ නැහැ කියලා. කොටි ගහද්දී අපිට තේරෙනවා ඊළඟට කොටියා කරන දේ. ඒත් ස්වභාවධර්මයා මොකද කරන්නෙ කියලා හිතා ගන්න බැහැනෙ?” රතුගමගේ කියයි.
කොහොම හරි 26 දාට එළිය වැටුණා. ඒ වෙද්දි වතුර මට්ටම අඩි 02ක් විතර අඩුවෙලා තිබුණා. උදේ 7.45 විතර වෙද්දී  හමුදාවෙ කෙනෙක් පීනගෙන අපි හිටපු ගෙදරට ආවා. එයා ඇවිත් තමයි අපිට විස්තරය කීවේ. ඒ ප්‍රදේශයෙ  ගලා බසින සීතාවක  ඔය පිටාර ගලලා ඇති වූ සැඩ පහර  නිසා ‍පොඩි බෝට්ටු දාන්න බැහැ කියලා කීවා. ‍පොඩි බෝට්ටු කැඩෙනවා එහෙම නැතිනම් ගහගෙන  යනවා කියලා කීවා. ඒ නිසා නාවික හමුදාවේ යාන්ත්‍රික බෝට්ටු අරගෙන එන්නම් කීවා.  ගස් වැටිලා නිසා හෙලිකොප්ටර් අපි ඉඳපු තැනට පාත් කරන්නත් බැහැ කියලා කීවා. ආපු හමුදාවේ කෙනා අපේ විස්තර ලියාගෙන ඒ විස්තර ‍පොලිතින්  උරයක ඔතලා තොප්පියට යටින් බැඳලා ආපහු පීනාගෙන ගියා. ඊටත් පස්සේ උදේ 10.30ට විතර ආපදා නිලධාරීන් හමුදා සහ ‍පොලිස් නිලධාරීන් පිරිසක් අපි හිටපු තැනට පීනාගෙන ආවා. එයාලා  ළඟ තිබුණේ කඹ විතරයි. එයාලත් අපේ විස්තර අරගෙන බය වෙන්න එපා කියලා ගියා. කලින් දවසේ රෑ කොටුවුණු අපි දවල් 12 විතර වෙද්දී හොඳටම තෙහෙට්ටු වෙලා හිටියේ. රෑ කෑමට පස්සෙ වතුර හෝ කිසිම කෑමක් නැහැ. කොහොම හරි අපේ ජීවිත ගැන විශ්වාසය ඇති වුණේ  නාවික හමුදාවේ යාන්ත්‍රික බෝට්ටු අපි  ඉන්න තැනට ආවට පස්සේ ඒ වෙද්දී වෙලාව 26 දා දවල් 1.00 ට විතර ඇති. වතුර පාර සැර නිසා එයාලා කීවා 04කට වඩා යාත්‍රාවට නගින්න එපා කියලා. ඒ නිසා මුලින්ම අපි කළේ මෘත දේහය සමග පෙට්ටිය යාත්‍රාවට පටවන එක. ඊට පස්සෙ 03ක් නැග්ගා. දෙවන බෝට්ටුවට වයසක උදවිය. ඊට පස්සේ කාන්තාවන් ඒ විදිහට පිළිවෙළට ගිහින් අපි යාත්‍රාවට නගිද්දී හවස 3.00 විතර වුණා.
බෝට්ටුවෙන් ආවත් අපි ගියපු කාර්එක වතුරට යටවෙලා තිබුණේ. ලක්ෂ 63ක් වටිනා ඒ කාර් එක පාවිච්චි කරන්න බැරි තත්ත්වයට පත්වෙලා කියල  පස්සෙ දැන ගන්න ලැබුණා. ඒක අයිතිත් අපි එක්කම ගිය මාධ්‍යවේදියෙකුට මෘතදේහය වෙනත් ප්‍රදේශයක මල් ශාලාවක තැන්පත් කරලා ඒ ප්‍රදේශයේම හිමිනමක් වඩම්මලා පාංශුකූලය දීලා ආදාහන කටයුතු කළා කියලා පස්සෙ දැන ගත්තා. 
ඒ වගේමයි මිනිස්සුන්ගෙ මනුස්සකම, මේ විපත්තියේදී අපි හොඳට දැක්කා. මළ ගෙදරක ආපු මෝටර් රථයක තිබුණ මුදල් රුපියල් 49,000ක් වතුරෙ පාවෙද්දි ගමේ අය එකතු කරලා දුන්නා. වටිනා ජංගම දුරකථන  දෙකකුත් දීලා තිබුණා. ඒ වෙද්දි ගංවතුරට කොටුවුණ අයට කෑම දෙන්න ප්‍රදේශයේ විහාරස්ථානයක කෑම හරි ගස්සනවා කියලා කෑම කන්න අපටත් එන්න කීවා. ඒත් අපි කොළඹට ඇවිත් තමයි කෑම කෑවේ. එතකොට 27දාට අඳුරු වැටිලා යැයිද රතුගමගේ කියයි.
මෙම සිදුවීමේදී එකක් පැහැදිලියි. එනම් ගංවතුර අවදානම පිළිබඳව රජයේ පූර්ව සූදානමක් තිබි නැති බවය. රජය සැබෑ ලෙස ක්‍රියාත්මක වූයේ දින දෙකකට පසු එනම් 27 දාය. මාධ්‍යවේදීන් පිරිස තමන් හට තිබූ සබඳතා නිසා මෙලෙස දිවි රැක ගත්තද වෙනත් පිරිසක් මෙම අවදානමට මුහුණු දුන්නේනම් ප්‍රතිඵලය මීට වඩා වෙනස් වීමට ඉඩ තිබිණි.  අපේ කථානායක රතුගමගේ එදිනම රාත්‍රී කොළඹින් වවුනියාව බලා යන බස් රථයට නැග්ගේය.
“ඉස්සර අපි වවුනියාවේ ජීවත් වුණේ මරණය කොයි වෙ‍ලේද දන්නෙ නැහැ කියලා හිතාගෙන. ඒ නිසා වවුනියාවෙන් කොළඹ බස් එකට නගින්නේ නිදහස් ලෝකයකට යනවා වාගේ. හැබැයි එදා කොළඹින්  වවුනියාව බස් එකට නැග්ගේ ඒකෙ අනිත් පැත්ත හිතාගෙන.  දකුණ  කියන මරණ භූමියෙන් උතුර කියන නිදහස් ලෝකයට යනවා කියලා හිතාගෙන තමයි ආවේ” යැයිද රතුගමගේ  කියන්නේය.
 
සනත් ප්‍රියන්ත

පසුගිය දිනවල ඇති වූ ගංවතුරින් කැලණි ගඟ පිටාර ගැලීම නිසා කැලණිය, බියගම, දොම්පේ, වත්තල යන ප‍්‍රාදේශීය ලේකම් කොට්ඨාශවලට බරපතල ආපදා තත්ත්වයකට මුහුණ පෑමට සිදුවිය. වත්මන් ගම්පහ දිස්ත‍්‍රික්කයට අයත් සියනෑ සහ අලූත්කූරු කෝරල මායිමෙන් ගලා බසින කැලණි නදිය නිතර නිතර පිටාර ගැලීම නිසා ගංවතුර අවදානමක් ඇතිවීම සාමාන්‍ය දෙයකි. එනිසාම බියගම, මල්වාන, පහළ මාපිටිගම, උඩමාපිටිගම, පුගොඩ, තරාල, රන්වල, දංගල්ල ආදී ප‍්‍රදේශ මුල්කොට කැලණි ගඟේ ගංවතුර පිටාර කලාප කිහිපයක් ද ස්ථාපිත වී තිබේ. කැලණි නදියේ මෙම පිටාර ගැලීමේ ස්වභාවය මුල්කොට ප‍්‍රකට ජන කවියක් ද ඇත. 

‘‘කැලණි ගඟානෝ - නිතරම වතුර ගලානෝ

කෙටල පටානෝ - නිතරම උඩ යට යානෝ

මී හරකානෝ - නිතරම ඔලූව වනානෝ

ඇටිකිති ජානෝ - නිතරම ජෙග ජෙග ගානෝ ’’

සියනෑ කෝරළයේ හෝ ගම්පහ දිස්ත‍්‍රික්කයේ පමණක් නොව දිවයිනේ බොහෝ ප‍්‍රදේශවල වැඩිදෙනෙකු අසා පුරුදු මේ ජන කවිය අප රටේ සිටි සිවිල්සේවා නිලධාරියෙකු සහ විශිෂ්ට ජනශ‍්‍රැති පර්යේෂකයෙකු වූ නි.බ.මා. සෙනෙවිරත්නයන් විසින් 1964 වසරේ සම්පාදනය කළ ‘‘සිංහල කාව්‍ය සංග‍්‍රහය - මාතර යුගය’’ කෘතියෙහි (පිටුව 200) ද සඳහන් ය. මෙය ජාතික කෞතුකාගාර ප‍්‍රකාශනයකි.

මාතර (සාහිත්‍ය) යුගය ක‍්‍රි.ව. 1720 - 1830 දක්වා වන වසර 110ක කාල පරිච්ඡේදයක් පුරා දිව යන්නකි.

ඉහත සඳහන් ජන කවියෙහි මතුපිට අරුත වනුයේ වරින් වර පිටාර ගලන කැලණි ගඟ නිසා ගඟ දෙපස ඇති කෙටල පඳුරු වරින් වර දියෙන් යටවී යළිත් මතු වී පෙනෙන බව ය. මේ අතර ගඟ ආසන්නයේ බැඳ සිටින මී ගවයන් හිස වනන අයුරුත් ඇටිකිත්තන් යනුවෙන් හැඳින්වෙන ජලාශ‍්‍රිත කුඩා මැඬි විශේෂය නිතර හඬනගන අයුරුත් ඉන් පැවසේ.

නමුත් පසුගිය කාලයේ සියනෑ කෝරළයේ ජන ඇදහිලි සහ විශ්වාස පිළිබඳ ගවේෂණයක යෙදුණු මට එම ජන කවියෙන් මතුවන ඊට වඩා ගැඹුරු ද්වනිතාර්ථයක් පිළිබඳව අනාවරණය කර ගත හැකි විය. ඉන් පැවසී ඇත්තේ සියනෑ කෝරළයේ විසූ මහා ධනකුවේරයෙකුගේ ලිංගික ජීවිතය පිළිබඳව බව එහිදි අනාවරණය කර ගැනීමට මට හැකි විය.

ඔහු දහඅටවන සියවසේ අග භාගයේ හෝ දහනව වන සියවසේ මුල් භාගයේ දී සියනෑ කෝරළයෙහි විසූ බව සාධාරණ ලෙස අනුමාන කළ හැක. අක්කර සිය ගණනක පොල්වතු ඇතුළු සුවිසල් දේපළකට හිමිකරුවෙකු වූ මොහු තමන් යටතේ වැඩකරන සේවකකාරකාදීන්ගේ රූමත් අඹුවන් සොයා ගොස් ඔවුන් සමඟ අයථා සබඳතා පැවැත් වූ අයෙකි. ඔහුගේ ප‍්‍රතාපය නිසා මෙම සංසිද්ධිය සෘජුව කීමට නොහැකි වූ ජන කවියා ‘‘කැලණි ගඟානෝ නිතරම වතුර ගලානෝ’’ යනුවෙන් පවසා ඇත්තේ ඔහුගේ එම ලිංගික චර්යාවයි.

මෙහි "වතුර ගැලීම" යනුවෙන් අදහස් කරන්නේ ගං දිය පහළට ගලා ඒම නොවේ. එය පිටාර මට්ටම ඉක්මවා දෙපසට ගලා යාමයි. එහි පිටාර මට්ටම යනු සම්මතය වන අතර පිටාර මට්ටමෙන් ඉවතට ගැලීම යනුවෙන් ජන කවියා අදහස් කර ඇත්තේ එම ප්‍රභූ වරයාගේ අසම්මත ලිංගික චර්යාවම බව පැහැදිලිය.

එහි දෙවන පදයෙන් පැවසෙන ‘‘කෙටල පටානෝ නිතරම උඩයට යානෝ’’ යනුවෙන් පැවසෙනුයේ ඔහුගේ ලිංගික ආධිපත්‍යයට නතු වූ එම කාන්තාවන් පිළිබඳව ය. මෙහිදී ‘‘වතුර ගැලීම’’ සහ ‘‘උඩ යට යාම’’ යන්නෙන් ලිංගිකත්වය පිළිබඳ සියුම් ඉඟි පළ කෙරන අතර ඇතැම් විට වරින් වර හිමිවන ඔහුගේ ඇසුර නිසා එම කතුන්ගේ උඩඟු බව අඩුවැඩි වීම ද ජනකවියා එලෙසින් දකින්නට ඇත. යමෙකුගේ උඩඟු බව දැක්වීම පිණිස ‘‘දැන් එයා සෑහෙන්න උඩ ගිහින්’’ යනුවෙන් සමාජයේ පොදු වහරක් ඇති බව අපි කවුරුත් දනිමු.

මෙහි ඊළඟ පදයෙන් පැවසෙන ‘‘මීහරකානෝ නිතරම ඔලූව වනානෝ’’ යන්නෙන් එම බිරියන්ගේ සැමියන් පිළිබඳව පැවසෙන බව මෙහිදී අනාවරණය කර ගැනීමට මට හැකිවිය.  මක්නිසාද යත් එම ප‍්‍රභූවරයාගේ දාසකාරකාදීන් වන ඔවුනට තමන්ට සිදුවන කිනම් අසාධාරණයක් හෝ ‘‘ඔලූව වනා’’ අනුමත කිරීම හැරුණු කොට ඊට එරෙහිව නැඟීසිටීමේ හැකියාවක් එකල සමාජයේ නොතිබූ බැවිනි.

මෙහි වඩාත්ම උපහාසයක් ද්වනිත කරවනුයේ එහි ‘‘ඇටිකිති ජානෝ නිතරම ජෙග ජෙග ගානෝ’’ යන්නෙනි. මෙහි ඇටිකිත්තන් යනු කුඩා මැඬිවිශේෂයක් බව මම ඉහත සඳහන් කළෙමි. එහෙත් ඒ සමඟම යෙදෙන ‘‘ජානෝ’’ යන වචනයෙන් හැඟවෙනුයේ ජනතාව යන්න ය. ඒ අනුව එම ‘‘ඇටිකිති ජානෝ’’ යන්න අවශේෂ ජනයා ලෙස අර්ථකතනය කිරීමේ නොහැකියාවක් නැත.

සමාජයේ ප‍්‍රභූවරයෙකු විසින් ප‍්‍රසිද්ධියේ සිදුකරන මෙම සදාචාර විරෝධී ක‍්‍රියාවට, ලිංගික සූරාකෑමට ප‍්‍රසිද්ධියේ විරුද්ධ වීමට හෝ අභියෝග කිරීමට හැකි සමාජ පරිසරයක් මෙකල නොතිබුණි. එබැවින් අවශේෂ ජනයාට හැකි වූයේ ඒ පිළිබඳව නිරතුරුවම ඔවුනොවුන් අතරේ රහස් කතිකාවක් ගොඩනංවා  ගැනීමට පමණි.  කවියෙහි එය හැඳින්වෙනුයේ ‘‘ජෙග ජෙඟ’’ ගෑම ලෙසිනි.

මෙහි මා දුටු තවත් විශේෂත්වයක් තිබේ. අරාබි බසින් ලිංගික ක‍්‍රියාව හඳුන්වන පහත් ඕලාරික වදනක් වනුයේ ‘‘ජිගි ජිගි’’ යන්න ය. මෙය ජිගි යන්න ඉංග‍්‍රීසි ශබ්දකෝෂවල සඳහන් වන්නේ Haveing Sex යන්නෙහි අවියත් වදනක් ලෙසිනි.

තම ප‍්‍රදේශයේ ප‍්‍රභුවරයෙකුගෙන් සිදුවන ලිංගික සූරාකෑමක් පිළිබඳව කැලණි ගඟ මුල්කොට මෙසේ උපහාසාත්මක යටි අරුතක් පළ කළ ඒ අප‍්‍රකට ජන කවියාගේ චින්තනය, සෞන්දර්යාත්මක ප්‍රතිභාව කැලණි ගඟටත් වඩා ගැඹුරු බව නම් නොකියාම බැරිය.

තිලක් සේනාසිංහ 

IMAGE

ෆේස්බුක් එකෙන් ඔබේ හිතේ ලෙඩ ගැනත් කියන්න පුළුවන්

IMAGE 2017 Dec 15 10:42
ඔබටත් ෆේස්බුක් ගිණුමක් තිබෙනවාද? එසේ ගිණුමක් තිබෙනවා නම් ඔබ ඒ සඳහා දවසකට; සතියකට හෝ මාසයකට පැය...
Views - 1844

සුද්දන්ට උණවටුන එපා කරවන ඩිස්කෝ ඩාන්ස්

IMAGE 2017 Dec 14 07:56
ආචාර්ය ආතර් සී. ක්ලාක් විද්වතා පවසන ආකාරයට උණවටුන වෙරළ තීරය ලෝකයේ ඇති දර්ශනීය වෙරළ දොළහෙන්...
Views - 3265

ගැබිණි නිලධාරිනිය අධ්‍යක්ෂක හා 'හනිමූන්' ගිහින්

IMAGE 2017 Dec 13 10:33
ඔහු මෙරට ප්‍රමුඛතම සමාගමක අධ්‍යක්ෂ වරයෙකි. වයස අවුරුදු 40 ක් පමණ වන ඔහු දරු දෙදෙනෙකුගේ පියෙක්...
Views - 9028

2017 විශ්ව රූ රැජින ඩෙමී සහ අපේ ක‍්‍රිස්ටියානා

IMAGE 2017 Dec 13 10:17
ලෝක රූ රැජින තේරීමේ තරගයේ උණුසුම පහව යෑමටත් පෙර තවත් සුරූපිනියක් විශ්ව රූ රැජින ලෙස  කිරුළ...
Views - 4680

ඉන්දීය ක්‍රිකට් නායක විරාත් කෝලි නිලියක ගේ අත ගනී

IMAGE 2017 Dec 12 12:41
ඉන්දීය ක්‍රිකට් නායක විරාත් කෝලි ඊයේ (11) යුග දිවියට එළඹුණි. ඔහුගේ අතගත් මනාලිය වූයේ බොලිවුඩ්...
Views - 4847

පාතාලයට ඔත්තු දීමේ වරදට වෙඩි කෑ රූපලාවන්‍ය ශිල්පිනිය

IMAGE 2017 Dec 12 10:22
අතුරුගිරිය නගරයේ පිහිටි සයෝනාරා රූපලාවන්‍යාගාරයේ හිමිකාරිය වන හතළිස්හත් වියැති මංජුලා...
Views - 6574

Please publish modules in offcanvas position.