Coss Ear2
lakbima.lk
COSS Ear 1

ඔහු මධ්‍යම පළාතේ වාණිජ බැංකුවක කළමණාකරුවෙකි.  ඔහුගේ වයස අවුරුදු 45 ක් පමණ වේ. ක්‍රිස්තියානි පියෙකුට දාව බෞද්ධ මවකගේ කුසින් උපන් ඔහු අධ්‍යාපනය ලබා ඇත්තේ කන්ද උඩරට සුප්‍රකට කිතුණු පාසලකය. මව අනුව යමින් බෞද්ධ වත් පිළිවෙත් කෙරෙහි මහත් ඇල්මක් දැක්වූ ඔහු ඉන් පසුව බුදු දහම පිළිබඳ පොත පත කියවීමට ද යොමු වී ඇත. මේ වන විට විවාහක දෙදරු පියෙකු වන ඔහු ඉතා යහපත් සමාජ ආර්ථික පසුබිමකින් යුත් අයෙකි. ඔහුගේ බිරිඳද රජයේ උසස් තනතුරක් හොබවන්නියකි. සාමාන්‍ය ජීවිතයේ දී ඉතා ප්‍රසන්න ඇවතුම් පැවතුම් සහිත ඔහු තම බැංකුවට ගණුදෙනු කරුවන් ළංකර ගැනීමට රුසියෙකි.

එසේ තමන් හමුවට එන ධනවත් ව්‍යාපාරිකයන්ට ජීවිතය, සමාජය, ලෝකය ගැන විවිධ පාඩම් කියා දෙන මෙම බැංකු කළමණාකරු ඉන්පසුව ජීවිතයේ අනිත්‍ය බව, සංසාරය ආදිය පිළිබඳවද ඔවුනට  නොයෙකුත් ධර්ම කරුණු කියා දෙයි. ඔහුගේ මෙම කරුණු පහදාදීමේ හැකියාව කොතෙක්ද යත් කිසිදු ස්වාමීන් වහන්සේ  නමකටවත් ඔහු තරම් හොඳින් දම් දෙසිය නොහැකි බව පවසන්නෝද හිඟ නොවෙති. මෙසේ තමන් ලත් බුදු දහම පිළිබඳ දැනුමෙන් ජීවිතයේ අනිත්‍ය බව, සංසාරය සහ නිර්වාණය පිළිබඳව දහම් කරුණු ඉදිරිපත් කරන ඔහු තමන්ට අතිශය සමීප වූවන්ට මෙබඳු දහමක් දෙසයි.

"දැනට අපි බුදු දහම කියලා හඳුන්වන දේ පිරිසිදු බුදු දහම නොවේ. පිරිසිදු බුදු දහම පොත පතින් වත්, කවුරුන් කියන දේකින් වත් ඉගෙන ගන්න බැහැ. ඒක ඉබේටම ප්‍රඥාවට නතුවෙන්න ඕන දෙයක්. මීළඟට බුදු වෙන මෛත්‍රී බුදුහාමුදුරුවො ගැන බණ පොත් වල තිබෙන කාරණා පට්ටපල් බොරු. නමුත් මුළු බෞද්ධ සමාජයම ඒවයින් මුලා වෙලා තියෙන්නේ. වැඩි දෙනෙකුට නොකියනව නම් මම ඒ ගැන වැදගත් රහසක් කියන්නම්."

බැංකු කළමණාකරු තම ගණුදෙනු කරුවන් අතරින් තමන්ට වඩාත් සමීපතම වූවන්ට එසේ කියා මෙලෙස ද කියයි.

 "මම තමයි මෛත්‍රී බුදුහාමුදුරුවො හැටියට ඊළඟට ‍ලෝකෙට පහළ වෙන්න ඉන්නෙ. නමුත් මේ කථාවට වැඩි ප්‍රසිද්ධියක් දෙන්න එපා. කවුරුවත් ඒක විශ්වාස කරන එකක් නැහැ."

 කෙසේ හෝ තමන් හමුවට පැමිණි ධනවත් ව්‍යාපාරිකයක් කිහිප දෙනෙකුට ඔහු හෙළි කළ මෙම විස්මිත රහස එම ව්‍යාපාරිකයන් අතරේ මුනුමුනුවක් සේ ශීඝ්‍රයෙන් පැතිරෙන්නට විය. අවසානයේ එම බැංකු කළමණාකරු ලවාම ඒ සම්බන්ධයෙන් වැඩි විස්තර දැන ගැනීමට එම ව්‍යාපාරික කිහිපදෙනෙකුට අවශ්‍ය විය. එනිසා තම හිතමිතුරු පවුල් වල පිරිසක් එක්ව මහනුවරට නොදුරු මහවැලි ගඟ ආසන්නයේ තිබූ සංචාරක නිකේතනයක ඔවුහු මෙම 'මතු බුදුවන බෝසතාණන්' ගේ දෙසුමක් සංවිධානය කළහ.

 එවිට ඊට එක්වූ ඔහු කියා සිටියේ මෙම දෙසුම සංවිධානය කරන ලද්දේ සාංසාරික වශයෙන් මෛත්‍රී බුදුන් වන තමන් හමුවේ මතු නිවන් දැකීමට පෙරුම්පුරා සිටින මහා භාග්‍යවන්තයින් පිරිසක් බවය. ඒ අනුව එම දෙසුම අවසානයේ ඔහු විසින් ඔවුනට 'නිල තල' ප්‍රදානයක් ද සිදුකරන ලදී.

 ඒ අතර සැරියුත් හිමියන් වශයෙන් එක් පුද්ගලයෙකු නම් කරන ලද අතර මුගලන් හිමියන් වශයෙන් තව පුද්ගලයෙකු නම් කරන ලදී. ඉන් පසුව සුදවුන් රජු, මහාමායා දේවිය, අනේ පිඬු සිටු තුමා, කොසොල් රජතුමා ආදී නිළ තල ද ඔහු විසින් පත් කරන ලද අතර ඊට අමතරව විශාකාව, සුජාතාව, මල්ලිකාව, ආදී වශයෙන් තවත් තනතුරු කිහිපයක් ඔහු විසින්ම ප්‍රදානය කරන ලදී.

ඉන්පසුව ඊළඟ මාසයේත් එම හෝටලයේම පෙරවරුවක මෙම දහම් හමුව පැවැත්වීමටත්; එය අවසානයේ එම දහම් හමුවට එක්වන පිරිස සඳහා නිර්මාංශ ආහාර වේලක් ලබා දීමටත්; එසේ ඔහු වෙතින් නව තනතුරු ලත් ව්‍යාපාරිකයන් කිහිප දෙනෙක් ඉදිරිපත් වූහ. ඒ අනුව දෙවන දහම් හමුවේ දී ඊට තවත් ව්‍යාපාරිකයන් කිහිපදෙනෙකු එක් වූ අතර ඔවුහු මෙම දහම් හමුව දැඩිව විවේචනය කරන්නට වූහ. ඒ මෙය මුළුමනින් බෞද්ධ විරෝධී ක්‍රියාවක් බව පවසමිනි.  එවිට එසේ 'මතු බුදු වන බෝසතාණන්' එසේ විවේචනය කළ පිරිස දේවදත්ත, චිංචිමානවිකාව, සච්චක බමුණා ලෙස නම් කරමින් ඔවුන් ඒ දහම් හමුවෙන් පිටමං කරන ලද්දේ තම අනුගාමිකයන්ගේ සාධුකාර හඬ මධ්‍යයේය.

කෙසේ හෝ ඉන්පසු සෑම මාසයකම පෙරවරුවේ මෙම දහම් හමුව පැවැති අතර ඒ සඳහා මූල්‍ය අනුග්‍රහය ලබා දීමට ඔහුගේ මීළඟ බුදු සසුනේ තනතුරු ලත් ව්‍යාපාරිකයින් කිහිප දෙනෙක් ඉදිරිපත් වූහ.

මෙම බැංකු කළමණාකරුගේ අනුගාමිකයන් අතරින් ප්‍රමුඛතම සාමාජිකයෙකුගේ නැන්දනිය මිය යන ලද්දේ ඔය අතරය. ඉන් පසු එහි හත් දවසේ මතක බණ සඳහා මෙම පිරිස සමඟ එම 'මතු බුදු වන බෝසතාණන්' ද සහභාගී විය. එදින එම දම් දෙසුම පැවැත් වූ හිමි නම මෛත්‍රී බුදුන් ගේ පහළ වීම පිළිබඳව යමක් කීමට සූදානම් වූවා පමණි; බණ අසන පිරිසේ සිටි 'බෝසතානෝ' හනික අසුනෙන් නැගී සිටියහ.

"අනේ හාමුදුරුවනේ; පින් සින්ද වෙයි ඔය පට්ට පල් බොරු නවත්ත ගන්න; මෙතන ඉන්න කිසිම කෙනෙක් ඒවා විශ්වාස කරන්නේ නැහැ."

ඔහු කෑ ගසන්නට විය.

නමුත් ‍එම මිය ගිය කාන්තාවගේ පවුලේ ඥාතීන් සහ සෙසු ඥාති මිත්‍රාදීන් මෙම 'බෝසතාණන්' පිළිබඳ නොදැන සිටීම නිසා ඔහු එම පිරිසෙන් ගුටි නොකා බේරුණේ අනූ නමයෙනි.

එසේම මෙම කලහය අතරට පැමිණි 'බෝසතාණන්ගේ' බිරිඳ මෙසේ කීවාය.

"මගේ මහත්තයා හැම අතින්ම හොඳ කෙනෙක්; නමුත් මෙයා හිතාගෙන ඉන්නේ එයා මතු බුදු වන මෛත්‍රී බෝධි සත්වයෝ කියලා. මෙයා ඉන්න හැටියට ඒක අහන සමහරු ඒක පිළිගන්නවා. නමුත් අපිට නම් තේරෙනවා මෙයාගේ මොකක් හරි මානසික විකෘතියක් කියලා. කොහොමත් අපි වුණත් එයාගේ මතයට විරුද්ධ වෙච්ච හැටිය එයා පුදුම විදිහට කේන්ති ගන්නවා."

බිරිඳගේ එම ප්‍රකාශය හමුවේ ඔහු කියා සිටියේ තම බිරිඳ සාංසාරික වශයෙන් තමන්ට සතුරුව ක්‍රියා කරන්නියක බවත් තමන් බුද්ධත්වයට පත්වූ පසුද ඇය තමන්ට සතුරුකම් කරන බවත්ය.

ඒ කෙසේ හෝ මේ පුද්ගලයාට වැළඳී ඇත්තේ 'අභිමාන මෝහය' (Grandiose Delusion) නම් මානසික රෝගය බවත් එම රෝගය වැළඳුණු අය හට සාමාන්‍ය ජීවිතයේ සෙසු කටයුතු වල දී ‍එය බල නොපාන බවත් එහි පැමිණ සිටි ඒ පිළිබඳව තතු දත් අයෙකු පහදා දුන් අතර ඔහු වැඩිදුටත් කියා සිටියේ මෙම පුද්ගලයන් මෙසේ  තමන් එල්බ ගත් වැරදි විශ්වාසය පදනම් කර ගත් කරුණේ දී පමණක් අතිශය සංවේදී වන බවත් කෝප වන බවත් ය. ඒ කෙසේ හෝ මනෝ වෛද්‍යවරයෙකු හමුවී කලක් ප්‍රතිකාර ගතහොත් ඔහුගේ මෙම මානසික විකෘති තාවය දුරු වෙතැයි ඇතැමුන් පැවසුවද ඒ සඳහා ඔහුගේ අනුගාමිකයන් මේ දක්වා ඔහුට කිසිදු අවසරයක් දී නැත. ඊට හේතුව ඔහුගේ එම මානසික රෝගය සුව වුවහොත් ඔහු පවසන ඊළඟ බුදු සසුනේ තමන්ට හිමි තනතුරු අහිමි වන නිසාද විය හැක.

 

තිලක් සේනාසිංහ

වත්මන් ශ්‍රී ලාංකීය ජන සමාජයේ දික්කසාද වීම් සහ පවුල් අර්බුද පැන නැගීම සම්බන්ධයෙන් කලා කරුවන්, ක්‍රීඩකයන් ඇතුළු ජනප්‍රිය පුද්ගලයන් ද සෘජුවම වගකිවයුතු බව පේරාදෙණීය විශ්වවිද්‍යාලීය සමාජ විද්‍යා අධ්‍යනාංශයේ මහාචාර්ය දයා අමරසේකර මහතා පවසයි.

මේ ඒ සම්බන්ධයෙන් ඔහු වෙතින් කළ වැඩිදුර කරුණු විමසීමකි;

  • අපේ රටේ දික්කසාද ඇතුළු පවුල් අර්බුද වැඩිවීම කෙරෙහි කලා කරුවන් ඇතුළු ජනප්‍රිය පුද්ගලයන් සහ මාධ්‍ය වගකිවයුතු වන්නේ කෙසේද?

මේකට හැම ජනප්‍රිය පුද්ගලයෙක්ම, හැම මාධ්‍යක්ම එකසේ වගකිවයුතු නැහැ; නමුත් ඔවුන්ගෙන් වැඩි පිරිසක් තමන්ගේ ජනප්‍රියත්වය තහවුරු කරගැනීම සඳහා කරන ක්‍රියාවන් සහ ඒවා මාධ්‍යය මගින් පතුරුවා හැරීම මේ තත්ත්වයට ඉවහල් වන බව පැහැදිළිවම පෙනෙනවා.

  • ඒ තත්ත්වය වඩාත් විස්තර කළොත්?

 ලෝකය පුරාම කලා කරුවන් ඇතුළු ජනප්‍රිය පුද්ගලයන්ගේ පෞද්ගලික තොරතුරු දැන ගැනීම කෙරෙහි සාමාන්‍ය ජනතාව තුළ විශාල උනන්දුවක් තිබෙනවා. ඒ කලා කරුවන් කෙරෙහි සමහරුන් දක්වන්නේ අසීමිත භක්ත්‍යාදරයක්. ඒ අනුව ඔවුන්ගේ ජීවන පැවැත්ම, ජීවන චර්යාවන් අගය කිරීමට සේම ඒවා අනුකරණය කිරීමට ද ජීවිත පරිඥාණය අඩු රසිකයන් කටයුතු කරනාවා. නමුත් කලා කරුවන් ඇතුළු බොහෝ ජනප්‍රිය පුද්ගලයන් මාධ්‍ය මගින් ජනතාව අතරට පත්කරන්නේ තමන්ගේ ජීවිත පිළිබඳ සැබෑ අභ්‍යන්තරික තත්ත්වය නොවේ.

  • මොකක්ද ඒකට ‍හේතුව?

කලා කරුවන් ඇතුළු ජනප්‍රිය පුද්ගලයන් කියන්නේත් මේ සමාජ ප්‍රපංචයේම එක්තරා පැතිකඩක්. ඔවුන් සමාන්‍ය ජනතාවගෙන් ව්‍යුක්ත ඊට වඩා වෙනස් ජීවන රටාවක පසුවෙනවා ය කීම මිථ්‍යාවක්. නමුත් බොහෝ කලා කරුවන් තමන්ගේ පවුල් ජීවිත සම්බන්ධයෙන් කරනු ලබන විස්තර පුහු ආටෝපයෙන් සහ අතිශෝක්තියෙන් පිරුණු ඒවා බව ඒ කරුණු කෙරෙහි විමසිල්ලෙන් බලන විට පෙනී යනවා.  කොටින්ම ඔවුන් සමහරවිට තම ‍පවුල් ජීවිත සම්බන්ධයෙන් කියන්නේ පට්ටපල් බොරු.

  • ඔවුන් එසේ වංක ලෙස කටයුතු කරන්නේ ඇයි?

ඒක වංක බවකටත් වඩා වර්තමානයේ පවතින ජනප්‍රිය සංස්කෘතියේ දුර්දාන්ත ලක්ෂණයක් ලෙස හැඳින්වීමයි නිවැරදි. මෙහිදී ඔවුන් තමන්ගේ ජීවිත වල යථාර්තය සඟවා තමන්ගේ ජීවිතය හා සම්බන්ධ කරුණු ව්‍යාජ, ආටෝපකාරී ලෙසින්  ඉදිරිපත් කරන්නේ තමන් පිළිබඳ අලෙවි ප්‍රවර්ධනයට හෙවත් තමන්ව මාකට් කරගැනීම සඳහායි. වර්තමාන අධිපරිභෝජන සමාජයේ මේ 'මාකටින්' කියන දෙය ප්‍රධාන පුරුෂාර්ථයක් වශයෙන් සැලකෙනවා. ඒ නිසා එම ක්‍ෂේත්‍රවල පැවැත්ම සඳහා තමන්ව මාකට් කර ගැනීමත් ජනප්‍රිය සංස්කෘතිය තුළ වැදගත් අවශ්‍යතාවයක් ලෙස හඳුන්වන්නට පුළුවන්.

  • ඒ විදිහට ව්‍යාජ ප්‍රකාශ කිරීම තුළින් රසිකයන්ට සිදුවන අයහපත් බලපෑම කුමක්ද?

බොහෝ රසිකයන් ඒ ජනප්‍රිය පුද්ගලයන්ගේ ප්‍රකාශ හා තමන්ගේ ජීවිත සංසන්දනය කිරීමට පෙළඹෙනවා. කිසියම් ජනප්‍රිය කාන්තාවක් ඇගේ සැමියා පිළිබඳව කරන අසීමාන්තික පුහු වර්ණනාව දකින ජීවිත පරිඥාණයෙන් තොර කාන්තාවක් ඒ කලා කාරිය කියන 'කල්පිත සැමියා' සහ තම සැමියා සංසන්දනය කිරීමට පෙළඹිය හැකියි. බොහෝ විට ඒ ව්‍යාජ තොරතුරුවලට රැවටෙන ඇයට ඒ කලා කරුවාගේ සැමියා දෙවියෙකු ලෙසත්; තමන්ගේ සැමියා රාස්සයෙකු ලෙසත් පෙනී යා හැකියි. නමුත් එහි ඇති ඇත්ත තත්ත්වය නම් තමන්ගේ සැමියා රාස්සයෙක් නම් ඒ කලාකරියගේ සැමියා පරාස්සයෙකු බව ඇය මාධ්‍යයට හෙළි නොකිරීමයි. ඇතැම්විට ඒ කලා කාරිය ගෘහස්ථ ප්‍රචණ්ඩත්වයට ලක්වන කඳුළින් පිරි ජීවිතයක් ගතකරන තැනැත්තියක විය හැකියි. මෙසේ තමන්ට ජීවිතයේ අහිමි තත්ත්වයන් පිළිබඳව සත්‍ය සඟවා ඒ සම්බන්ධ ව්‍යාජ තොරතුරු පුන පුනා ප්‍රකාශ කිරීම මනෝ විද්‍යාවේ අධිහානිපූරණය (Overcompensation) නමින් හැඳින්වෙනවා.

නමුත් මේ කටුක යතාර්ථය තේරුම් නොගන්නා සාමාන්‍ය රසිකයන් එම ව්‍යාජ ප්‍රකාශ මත පදනම්ව තම ජීවිත වල්මත් කර ගැනීම බොහෝ විට දක්නට ලැබෙනවා.

  • සාමාන්‍ය අයගේ යුග ජීවිත වලට වඩා කලා කරුවන් ඇතුළු ජනප්‍රිය පුද්ගලයන්ගේ යුග ජීවිත අවුල් සහගත බවක් සමහරුන් කියනවා.

සරල ග්‍රාමීය සමාජ ක්‍රමයක දී යුග ජීවිතයකට එළඹිය හැකි ගැටළු අර්බුද වලට වඩා සංකීර්ණ නාගරික සමාජ ක්‍රමයක  යුග ජීවිතයක ඇතිවන ගැටළු අර්බුද බහුලයි. විශේෂයෙන් කලා කරුවන් ඇතුළු ජනප්‍රිය පුද්ගලයන් අතිශය සමාජශීලී වීම  ජනප්‍රියත්වය මත පදනම් කර ගනිමින් ඔවුන්ට ඇති සමාජමය ඉල්ලුම ආදිය නිසා යුගදිවියක් පවත්වාගෙන යාමේදී ඔවුන්ට මුහුණ දෙන්නට සිදුවන ගැටළු අභියෝග බහුලයි. ඒ සඳහා මනා සිහිබුද්ධියෙන් කටයුතු නොකිරීම මත ඔවුන්ගේ විවාහ බිඳී යාමේ වැඩි නැඹුරුවක් තිබෙනවා. මෙය එක් එක් ආකාර වලින් ලොවටම පොදු තත්ත්වයක්.

  • නමුත් දික්කසාද වන කලා කරුවන් නැවත විවාහ වීමේදීත් පෝරුවේ චාරිත්‍ර පවා අනුගමනය කරනු අපට මාධ්‍ය මගින් දැක ගන්නට පුළුවන්.

ඒක අතිශයින් නරක තත්ත්වයක්; විවාහ වී දරුවන් පවා සිටින මව්වරු පියවරු නැවත සාම්ප්‍රදායික විවාහ මංගලෝත්සවයක වැදගත්ම අංගයක් වන පෝරුව පවා යොදා ගනිමින් විවාහ වීම මතුපිටින් හාස්යෝත්පාදක කරුණක්. නමුත් ඔවුන් පිළිබඳ භක්ත්‍යාදරයෙක් පසුවන රසිකයන් ඒ කලා කරුවන්ගේ එවැනි ක්‍රියාත් ඇගයීමකට ලක් කීරීමටත් ඒවා සාධාරණය කිරීමටත් ඇතැම් විට ඒවා අනුකරණය කිරීමටත් පෙළඹෙන්න පුළුවන්. මේක සමාජ අපගමනයට නිසැකලෙසම තුඩු දෙන කරුණක්.

විශේෂයෙන් කලා කරුවන් තම දෙවන තුන්වන විවාහ මෙලෙස ආටෝපකාරී අයුරින් ඉදිරිපත් කිරීමෙන් විවාහය සම්බන්ධව ඇති ගෞරවනීය ආකල්පය අප ජන සමාජයෙන් තුරන් වී යන්නට පුළුවන්. එය සමාජයට ඉතා අහිතකර තත්ත්වයක්.

  • සමහර කලා කරුවන් තමන්ගේ විසිපස්වන විවාහ සංවත්සර ආදියත් මංගල්‍යයක ස්වරූපයෙන්ම සමරන අවස්ථාවන් අපි මාධ්‍ය මගින් දකිනවා.

ඕනෑම කෙනෙකුට තමන්ගේ විවාහ සැමරුම ඕනෑම ආකාරයකට සිදුකර ගත හැකියි. නමුත් බොහෝ කලා කරුවන් මේවා කරන්නේ තමන්ගේ විවාහක බැඳීම මුල්කරගත් අවංක අභිලාශයකට වඩා ඒ තුළිනුත් තමන් පිළිබඳ අලෙවි ප්‍රවර්ධනයක් ඇතිකර ගැනීමේ බලාපොරොත්තුවෙන්. ඒ වගේම ගැටළු අර්බුද බහුල විවාහ ගත කළ පුද්ගලයන් පවා තමන්ගේ විවාහ ජීවිතයේ සාර්ථකත්වය ‍සමූජය හමුවට ව්‍යාජ ලෙස ඉදිරිපත් කිරීම පිණිසත් මෙවැනි ආටෝපකාරී උත්සව ගන්නා බව අපට පෙනෙනවා.

  • නමුත් එමගින් සමාජය සිදුවන අයහපත කුමක්ද?

වයස්ගත පිරිමින් මනමාලයන් ලෙසත්, ඔවුන්ගේ බිරියන් මනමාලියන් ලෙසත් බොළඳ රංගනයක යෙදීම තුළින් ඔවුන් වැඩිහිටි බවේදී හිමිකරගත යුතු ගෞරවයට, ගාම්භීරත්වයට බරපතල හානි සිදුකරගන්නවා. ඒ නිසා තමන්ගේ පෞද්ගලික ජීවිතයේ ගැටළු අර්බුද සමාජයෙන් වසන්කර ගැනීමට හෝ තමන් සම්බන්ධයෙන් අලෙවිප්‍රවර්ධනයක් ඇති කර ගැනීමට හෝ ඔවුන් එසේ කටයුතු කිරීම යෝග්‍ය නොවන බවයි මගේ වැටහීම.

අනෙක දූ දරුවන් දීග තළ දෙන වයස්වල සිටින වැඩිහිටි මාපියන් මනමාලයන්, මනමාලියන් සේ හැසිරීම ඒ දූ දරුවන්ගේ වයස්වල හිමි උරුමයන් පවා අයථාලෙස උදුරාගැනීමක් ලෙසයි මා දකින්නේ.  

 

දමයන්ති ගමගේ

 

‘ෆේස්බුක්’ කියන්නේ නම කියූ මණින් අද උපන් දරුවාගේ සිට සිහිකල්පනාවක් ඇති මහල්ලා දක්වාම දන්නා දෙයක්. කිසිදු සීමා මායිමක් නොමැතිව ලොව පුරා (ඇතැම් රටවල තහනම් වුවත්) විහිදී පවතින සමාජ ජාලයක්. අදින් අවුරුදු 13 කට පෙර එනම් 2004 පෙබරවාරි 4 වැනිදා මාර්ක් සකර්බර්ග්, එඩුවාඩෝ සැවරින්, ඇන්ඩෲ මැකොලම්, ඩසටින් මොස්කොවිට්ස් සහ ක‍්‍රිස් හග්ස් යන අය එකතු වී ආරම්භ කළ මෙහි වර්තමාන ප‍්‍රධානියා වන්නේ මාර්ක් සකර්බර්ග්. සාමාන්‍ය පරිශීලකයන් තමන්ගේ අන්තර්ජාල දත්ත වියදම් කරමින් මෙය භාවිත කරන අතරේ 2016 වසර වන විට ෆේස්බුක් සමාගම එ් පරිශීලකයන් බිලියන 2 හරහා ලබා ඇති ආදායම ඇමෙරිකානු ඩොලර් බිලියන 27,638ක් වෙනවා. මේ අතරින් ශුද්ධ ආදායම ඇමෙරිකානු ඩොලර් බිලියන 10,217ක් වෙනවා. 2017 ජුනි 30 වැනිදා වෙද්දී මෙහි සේවය කළ සේවකයන්ගේ සංඛ්‍යාව 20,658ක්. ඉන්ස්ට‍්‍රග‍්‍රැම්, මෙසෙන්ජර්, වටස්ඇප්, ඔකුලස් වී.ආර් යන එ්වා මෙහි උප සමාගම් විදියට හඳුන්වා දෙන්නට පුළුවන්. ඇමෙරිකා එක්සත් ජනපදයේ කැලිෆෝර්නියා ප‍්‍රාන්තයේ මෙන්ලෝ උද්‍යානයේ මූලස්ථානය පිහිටුවා ඇති ෆේස්බුක් ආයතනය ගැන මේ සඳහන් කළ තොරතුරු බොහෝ දෙනෙක් දන්නා එ්වා වන්නට ඇති ඉඩකඩ බොහොමයි. නමුත් බොහෝ දෙනෙක් දන්නේ නැති බවට ඉඩ කඩක් ඇති තොරතුරු ද තිබෙනවා. මේ කියන්න යන්නේ එ් වගේ විස්තර ටිකක්. 

 
ෆේස්බුක් එකේ මුල්ම මුහුණ 
 
ෆේස්බුක් කියන එක කෙළින්ම සිංහලයට හැරෙව්වොත් කියවෙන්නේ ‘මුුහුණුපොත’ කියලා. තවත් අය ‘වත පොත’ වගේ නම් දාගෙන ඉන්නවා. කොහොම වුණත් මෙහි සාමාජික වෙන සෑම කෙනෙකුටම තමන්ගේ මුහුණේ පැහැදිලි පින්තූරයක් මෙයට දැමීමේ අවස්ථාව තිබෙනවා. මේ විදියට මුලින්ම මුහුණක් දාපු කෙනා තමයි ‘අල් පැසිනෝ’ කියන්නේ. ඔහු ඇමෙරිකානු රංගන ශිල්පියෙක්. නමුත් එ් පින්තූරය දැම්මේ ඔහු නෙවෙයි. එ්ක කළේ ෆේස්බුක් සමාගමින්මයි.
 
ෆේස්බුක් නිල් පාට ඇයි? 
ෆේස්බුක් එකේ ආරම්භකයා වගේම වර්තමාන ප‍්‍රධානියා වන මාර්ක් සකර්බර්ග් වර්ණ අන්ධතාවයෙන් පෙළෙන්නෙක්. ඔහුට රතු - කොළ කියන වර්ණ හොදින් පෙනෙන්නේ නැහැ. මේ නිසා ඔහුට හො`දින් පැහැදිලිව පෙනෙන නිල්, මෙහි මූලික වර්ණය ලෙස යොදාගෙන තිබෙනවා. එ් වගේම විශ්වාසය සහ සුරක්ෂිතභාවය නිරූපණය කරන්නට ලොව පුරා භාවිත වන වර්ණයක් තමයි නිල් කියන්නේ. මේ නිසා මාර්ක් සකර්බර්ගේ වර්ණ අන්ධතාවය පැත්තකින් තිබ්බත් මේ පාට ෆේස්බුක් එකේ මූලධර්ම එක්ක හොදින් ගැළපෙනවා.
 
ෆේස්බුක් ලාංඡනය 
 
මේ ලාංඡනය නිර්මාණය කළේ මාර්ක් සකර්බර්ගේ මිතුරකු වගේම මෙහි ආරම්භයට දායාක වුණු ඇන්ඩෲ මැකලම්.
 
‘ලයික්’ බොත්තම 
 
ෆේස්බුක් හි කවුරුන් හෝ දමන ලද දෙයකට අපගේ කැමැත්ත පළ කරන්නේ ‘ලයික්’ (Like) බොත්තමෙන්. කොහොම වුණත් ෆේස්බුක් හි මෘදුකාංග ඉංජිනේරුවකු වූ ඇන්ඩෲ බොස්වර්ත් මෙය මුලින්ම නිර්මාණය කළේ වෙනත් නමිකින්. එය හ`දුන්වනු ලැබුණේ ‘ ඕසම්’ (Awesome) නමින්. අනෙක් මෘදුකාංග ඉංජිනේරුවන් ද මෙයට මහත් කැමැත්තක් පළ කළා. නමුත් 2007 වසරේ දී මාර්ක් සක්ර්බර්ග් එය නිෂේධ කරමින් ‘ලයික්’ බොත්තම හඳුන්වා දුන්නා. අද එය ෆේස්බුක් පරිශීලකයන් මහත් කැමැත්තකින් භාවිත කළත්, එදා මාර්ක් ගත්තු තීරණය ගැන ෆේස්බුක් ආයතනයේ බොහෝ දෙනෙක් එ් තරම් කැමැත්තක් දැක්වූයේ නැති බව ඇන්ඩෲ බොස්වර්ත් පවසනවා.
 
ෆේස්බුක් දත්ත ප‍්‍රමාණය 
 
ෆේස්බුක් වෙබ් අඩවියට හැම මොහොතකම එකතු වන පින්තූර, වීඩියෝ ආදියේ ප‍්‍රමාණය මෙතෙකැයි කියා කියන්න බැහැ. එ් සියල්ල ෆේස්බුක් ආයතනයේ දත්ත සේවා පරිගණකවල තැන්පත් වෙනවා. මේ වන විට මේ පරිගණකවල තැන්පත්ව ඇති පරිශීලක දත්ත ප‍්‍රමාණය ‘පෙටාබයිට්’ 300ක් පමණ වෙනවා. පෙටාබයිට් එකක් කියන්නේ ගිගාබයිට් මිලියන 1ක ප‍්‍රමාණයක්. ලෝකයේ භාවිත වන භාෂාවන්ගෙන් වගේම පැරණි, අභාවිත භාෂාවන් පවා මෙහි අඩංගුව පවතිනවා. මේ නිසා සමස්ත මිනිස් වර්ගයාගේ විශාලතම ලේඛන එකතුව ෆේස්බුක් ලෙසත් ඇතැමුන් හඳුන්වනවා. 
 
ෆේස්බුක් වර්ධනය 
 
සෑම මිනිත්තු 15කටම වරකත් ෆේස්බුක් සමග එකතු වන පරිශීලක සංඛ්‍යාව 7,246ක් පමණ වන බව ගණන් බලා තිබෙනවා. 
 
පෝස්ට් දමන්න හොඳම වෙලාව 
 
ෆේස්බුක් භාවිත කරන ඔබට එයට පෝස්ට් එකක් දමන්න වෙලාවක් කලාවක අවශ්‍ය නැති බව ඇත්ත. නමුත් ෆේස්බුක් ආයතනයම කියන විදියට එ්ක එහෙම නෙවෙයි. ඔවුන් පවසන්නේ රෑ 10ත් 11ත් අතර කාලයේ දමන පෝස්ට්වලට 88% ක වැඩි අවධානයක් ලැබෙන බවයි. එ් වගේම ප‍්‍රශ්නාර්ථයකින් අවසන් වන පෝස්ට්වලට 162% ක වැඩි අවධානයක් ලැබෙන බවත් ඔවුන් සොයාගෙන තිබෙනවා.
 
වැඩියෙන්ම බෙදාහදා ගැනීම් 
 
ෆේස්බුක් වෙබ් අඩවියේ වැඩියෙන්ම හුවමාරු වෙන්නේ මොනවාද? පින්තූර කියා බොහෝ දෙනෙක් හිතුවොත් ඇත්තටම එ්ක එහෙම නෙවෙයි. වැඩියෙන්ම හුවමාරු වෙන්නේ වීඩියෝ. එ් වගේම 2014 වසරේ දී පමණක් ෆේස්බුක් පරිශීලකයන් දිනකට වීඩියෝ බිලියන 1 කට වඩා නරඹා තිබෙනවා. වර්තමානයේ එම ප‍්‍රමාණය දිනකට බිලියන 4කටත් වඩා වැඩියි.
 
සකර්බර්ගේ බොරුව 
 
ෆේස්බුක් නිර්මාණය කළ මාර්ක් සකර්බර්ගේ විස්තර තියෙන තැන සඳහන් වෙන්නේ ඔහු හාවර්ඞ් සරසවියේ පරිගණක විද්‍යාව හදාරා උපාධියක් ලබා ගත් ශිෂ්‍යයකු බවයි. නමුත් එ්ක බොරු කතාවක්. ඇත්තටම ඔහු එයින් උපාධියක් ගත්තේ නැහැ. ෆේස්බුක් ආයතනයේ වැඩකටයුතු අධික වීම නිසා ඔහුට එයින් ඉවත් වන්නට සිදු වුණා.
 
ෆේස්බුක් හොරකම් 
 
ෆේස්බුක් නිසා සොරකමකට ලක් වූවන්ගේ සංඛ්‍යාව බොහොමයි. බොහෝ දෙනෙක් තමන් එ් මොහොතේ සිටිනා ස්ථානය දක්වා ‘ස්ටේටස්’ යාවත්කාලීන කරන්නට පුරුදුව සිටිනවා. මෙයින් ප‍්‍රයෝජනය ගන්නා සොරු එම පුද්ගලයන්ගේ නිවාස කොල්ල කනවා. ලොව පුරා මංකොල්ලකරුවන්ගෙන් 80%ක්ම ෆේස්බුක් ස්ටේටස් පරීක්ෂා කරන බව සොයා ගෙන තිබෙනවා.
 
ෆේස්බුක් අපරාධ 
 
ලොව වටා සිදුවන අපරාධවලින් 40%ක්ම ෆේස්බුක් සමග සම්බන්ධයක් ඇති බවට සොයාගෙන තිබෙනවා. ෆේස්බුක් නිසා හ`දුනාගත් පුද්ගලයන් අතින් මිය යන සංඛ්‍යාව ද දිනෙන් දින වැඩි වන බවට වාර්තා ලැබෙනවා. මිනිසුන් ඝාතනය කිරීමේ මානසික උන්මාදයකින් පසුවන්නන් එ් සඳහා ගොදුරු සොයාගැනීමේ ඉල්ලමක් ලෙස ෆේස්බුක් භාවිතා කරනවා.
 
තහනම් රටවල් 
 
ඇතැම් රටවල් ස්ථිර ලෙසත්, ඇතැම් රටවල් තාවකාලික ලෙසත් ෆේස්බුක් තහනම් කොට තිබෙනවා. චීනය, ඉරානය, උතුරු කොරියාව ආදිය ස්ථිර ලෙසම ෆේස්බුක් තහනම් කොට තිබෙනවා. ඊට අමතරව බංග්ලාදේශය, ඊජිප්තුව, ජර්මනිය, ඉන්දියාව, මැලේසියායාව ආදී තවත් රටවල් ගණනාවක් වරින් වර තාවකාලිකව ෆේස්බුක් තහනම් කොට තිබෙනවා.
 
නිරංජන් චාමින්ද කරුණාතිලක

හැංගි මුත්තම් සෙල්ලමක් අතරදී වයස අවුරුදු 10 ක වන පාසල් සිසුවියක දුෂණය කළ බව කියන 16 හැවිරිදි පාසල් සිසුවෙකු අත්අඩංගුවට ගෙන ඇති බව හලාවත පොලීසිය කියයි.

අතවරයට පත්ව ඇති දැරිය සහ සැකකරු අසල්වැසියන් බව ද පොලීසිය කියයි. සිද්ධිය වූ දින දැරිය, සැකකරු සහ තවත් දරුවන් කීප දෙනෙකු හැංගි මුත්තන් සෙල්ලම් කර ඇත. එසේ සෙල්ලම් කරමින් සිටින අතර තුර දැරිය ඇදක් යට සැගවී තිබේ. එම අවස්ථාවේදී සැකකරු විසින් ඇඳ යටට විත් දැරියට අතවර කර ඇති බව මූලික විමර්ශණ වලදී හෙලිවී ඇත.

නමුත් ඒ බව ඇය මුලදී කිසිවෙකුටත් පවසා නැත.

මේ අතර දැරිය අධ්‍යාපන ලබන පාසලේම වෙනත් සිසුවියක්ද පසුගිය දිනක අතවරයට ලක්ව ඇත. ඒ සම්බන්ධයෙන් සැකකරුවෙකු හලාවත පොලීසිය විසින් අත්අඩංගුවට ගෙන අධිකරණයට ඉදිරිපත් කිරීමෙන් අනතුරුව රක්ෂිත බන්ධනාගාර ගත කර තිබේ.

එම සිද්ධිය දැන ගෙන ඇති දැරිය තමන්ට ද සිදුව ඇත්තේ මෙවන් සිද්ධියක් බව වටහා ගෙන එම අතවරය සම්බන්ධයෙන් පාසලේ ගුරුවරියක් දැනුවත් කර තිබේ. එම ගුරුවරිය දැරියගේ මව්පියන් කැදවා මේ බව දැනුම් දීමට කටයුතු කර ඇත. ඒ අතර සිද්ධිය දැන ගෙන ඇති දැරියගේ ඥාතියෙකු මේ බව ජාතික ළමා ආරක්ෂණ අධිකාරියට දැනුම් දීමට කටයුතු කර තිබේ.

ජාතික ළමා ආරක්ෂණ අධිකාරිය විසින් කරන ලද දැනුම් දීමක් මත සිදු කරන ලද විමර්ශණයකින් අනතුරුව සැකකරු පොලීසිය විසින් අත්අඩංගුවට ගෙන ඇත.

පොලීසිය විසින් මෙසේ අත්අඩංගුවට ගෙන ඇත්තේ හලාවත - මුගුණුවටවන, මාලිගාවත්ත ප්‍රදේශයේ පදිංචි අයෙකි.

මේ අතර, හලාවත පොලීසියේ නිලධාරීන් පිරිසක් පසුගියදා මුගුණුවටවන - මාලිගාවත්ත ප්‍රදේශයේදී නීති විරෝධී ලෙස මත් පැන් තොගයක් ත්‍රිරෝද රථයකින් ප්‍රවාහනය කරමින් සිටි අයෙකු අත්අඩංගුවට ගෙන තිබේ. එම අවස්ථාවේදී එහි සිටි කීප දෙනෙකු පොලිස් නිලධාරීන් විසින් පරීක්ෂා කර ඇත. පාසල් දැරියට අතවර කිරීම සම්බන්ධයෙන් අත්අඩංගුවට ගෙන ඇති පාසල් සිසුවාද ඒ අතර සිට තිබේ.

තමාව පරීක්ෂා කළ පොලිස් නිලධාරියා  තමන් ඇඳ සිටි සරම කඩා දැමූ බව පවසමින් සැකකාර සිසුවා පාසල් යාම ප්‍රතික්ෂ්ප කර ඇත. නමුත් පොලිස් නිලධාරියෙකු සැකකාර සිසුවාගේ සරම කඩා දමා නොමැති බවත්, සිසුවා පාසල් යාම ප්‍රතික්ෂේප කර ඇත්තේ දැරියට අතවර කිරීමේ සිද්ධියෙන් පසුව බවත් විමර්ශණ වලදී අනාවරණය වී ඇති බව හලාවත පොලීසියේ නිලධාරියෙක් පැවසීය.

අතවරයට පත්ව ඇති දැරිය වෛද්‍ය පරීක්ෂණයක් සදහා හලාවත මහ රෝහලට ඇතුළත් කර ඇත.

සැකකාර සිසුවා හලාවත දිසා අධිකරණයට ඉදිරිපත් කිරීමට නියමිතය.

ජුඩ් සමන්ත

පුරුෂ ලිංගික උද්දීපනය සඳහා ගනු ලබන පෙති වර්ග වලින් අකල් මරණ සිදුවන බවට සමාජය පුරා පොදු කතිකාවක් පවතී.

පසුගිය දිනවල හෘදයාබාධ වලින් මිය ගිය තරුණයන් කිහිප දෙනෙකුගේ මරණ සම්බන්ධයෙන් සමාජය පුරා පැතිර ගිය පොදු රාවයක් වූයේ ඔවුන් මෙම ලිංගික උත්තේජන පෙති පානය කිරීම නිසා  හෘදයාබාධ වලට ලක් වී මිය ගිය බවය.

මේ තත්ත්වය යටතේ මෙහි විද්‍යාත්මක සත්‍යය අනාවරණය කරගනු පිණිස අපි රත්මලාන ශ්‍රීමත් ජෝන් කොතලාවල ආරක්ෂක විශ්වවිද්‍යාලයීය වෛද්‍ය පීඨයේ ජ්‍යෙෂ්ඨ කථිකාචාර්ය හෘද රෝග විශේෂඥ වෛද්‍ය නාමල් විජයසිංහ මහතා වෙත මෙම ප්‍රශ්න කිහිපය යොමු කළෙමු.

  • පුරුෂයන්ගේ ලිංගික උත්තේජනය සඳහා බටහිර වෛද්‍ය විද්‍යාව මඟින් නිර්දේශ කළ පෙති වර්ග තිබෙනවාද?

ඔව්; ඒ සඳහා Sidenafil, Tadalafil වැනි ඖෂධ වර්ග තියෙනවා.

  • මේ දෙකෙහිම ක්‍රියාකාරීත්වය එක හා සමානද?

මුල් ඖෂධයේ ක්‍රියාකාරීත්වය පැය ගණනක් දක්වාත්, දෙවෙනි ඖෂධයේ ක්‍රියාකාරීත්වය දින ගණනක් දක්වාත් බලපැවැත්වෙනවා. මේ අතරින් බහුලවම භාවිතා වන්නේ මුලින් සඳහන් කළ ඖෂධයයි.

  • Sidenafilයන ඖෂධය මෑතක සිට ජනප්‍රිය වූවක් නේද?

මේ ඖෂධය මුලින්ම නිෂ්පාදනය වී ඇත්තේ 1989 වසරේ; ඒ අධික රුධිර පීඩනය, පපුවේ ඇන්ජයිනා කැක්කුම ආදී රෝග වලට ප්‍රතිකාරයක් වශයෙන්. නමුත් එය භාවිතයට ගැනීමෙන් පසුව එහි අතුරුඵලයක් ලෙස එමගින් පුරුෂයන් හට ලිංගික උත්තේජනයක් ලැබෙන බව අනාවරණය වුණා. පුරුෂ ලිංගික බෙලහීනතාව මැඩලීම සඳහා නිර්දේශ කරන ඖෂධයක් ලෙස මෙය භාවිතයට ගැනුණේ ඊට වසර දහයකට පමණ පසුවයි.

  • එහෙත් මෙවැනි ඖෂධ වලින් පුද්ගලයන්ට මරු කැඳවන බවට සමාජය පුරා පැතිර යන රාවය කුමක්ද?

මෙම ඖෂධයේ ක්‍රියාකාරීත්වය මත ඒවා භාවිතා කරන පුද්ගලයන්ගේ රුධිර ගමනාගමනය ශීඝ්‍රයෙන් පහළ බැසීම නිසා එවැනි අන්තරාකාරී තත්ත්වයක් ඇතිවෙන්නට පුළුවන්.

  • සියළුදෙනා කෙරෙහි ඒ අවදානම බල පෑ හැකිද?

බොහෝවිට සුළු වෙහෙස මහන්සියක දී ඇන්ජයිනා කැක්කුම ඇතිවන්නවුන් නයිට්රේට් (Nitrate) ගණයේ ඖෂධ ලබාගන්නවුන් මෙම අවදානමට වැඩිපුර ලක් විය හැකියි.

  • හෘදයාබාධ සඳහා බයිපාස් සහ ඇන්ජියෝ ප්ලාස්ටි සැත්කම් වලට ලක් වූවන් මෙම පෙති පෙති පාවිච්චි කිරීම සුදුසුද?

කවුරුන් හෝ මෙම පෙති භාවිතයට ප්‍රථම වෛද්‍යවරයෙකු හමුවී උපදෙස් ලබා ගැනීම ඉතාම වැදගත්. එහිදී වෛද්‍යවරයා රෝගියාගෙන් කරුණු විමසා අවශ්‍ය නම් අදාල පර්යේෂණද සිදුකොට ඒ පෙති සහ ඒවා භාවිතයට ගත යුතු මාත්‍රාව නිර්දේශ කරනු ඇති.  එසේ නොමැතිව තමන්ගේ හිතුමනාපයට මෙවන් පෙති භාවිතා කිරීමේ දී කිසියම් අවදානමක් තිබෙනවා.

  • මෙම පෙති භාවිතයෙන් හෘදයාබාධයකින් කිසිවෙකු මිය ගිය විට එම හෘදයාබාධයට මෙම පෙති ඉවහල් වූ බව මරණ පරීක්ෂණයේ දී අනාවරණය කර ගත හැකිද?

මූලික පශ්චාත් මරණ පරීක්ෂණයක දී විමසා බැලෙනුයේ මරණයට ආසන්න සහ දෘශ්‍යමාන හේතු පමණයි. එහෙත් එම මරණය සම්බන්ධයෙන් පශ්චාත් මරණ පරීක්ෂණයෙන් තහවුරුවූ සොයාගැනීමට (Finding) අමතරව වැඩිදුර සොයාගතයුතු යමක් ඇතැයි හැගේ නම් මිය ගිය තැනැත්තාගේ රුධිර සාම්පල් මරණය සිදුවී පැය දහයක් ඇතුළත රසායනාගාර පරීක්ෂණ සඳහා යොමු කළ යුතු වෙනවා. එවිට මිය යන අවස්ථාවේ ඒ තැනැත්තාගේ රුධිරයේ ඇති රසායනිකයන් වෙන්ව හඳුනාගත හැකියි. ඒ අනුව හෘදයාබාධයකින් මිය ගිය තැනැත්තෙකු වුව මිය යන මොහොතේ මේ ඖෂධය භාවිතා‍ කොට තිබිණිද යන්න එම රසායනාගාර පරීක්ෂණ මගින් මනාව තහවුරු කර ගත හැකියි.

  • ලිංගික උත්තේජනයක් වශයෙන් නොමැතිව වෙනත් රෝග සඳහාත් තවමත් මේ ඖෂධය භාවිතා වෙනවාද?

ඔව්; පෙනහළු රුධිර පීඩනය(Pulmonary Hypertension) සහිත රෝගීන්ට මෙම ඖෂධයෙන් සුළු මාත්‍රාවක් ලබා දෙනවා.

  • මෙම ඖෂධය වැඩි මාත්‍රාවකින් ගැනීමෙන් සිදුවිය හැකි වෙනත් හානි මොනවාද?

ප්‍රධාන වශයෙන් රුධිර පීඩනය පහළ බැසීම නිසා සිදුවන හානි ඒ අතරින් ප්‍රධානයි. විශේෂයෙන් මෙය සිට්රේට් (Sitrate) සහිත ඖෂධයක් නිසා නයිට්රේට් (Nitrate) සහිත ඖෂධ භාවිතා කරන රෝගීන් මෙම පෙති භාවිතයේ දී වැඩි අවදානමකට ලක්වෙන්න පුළුවන්.

  • ඒ හැරුණු කොට මෙම පෙති අධිමාත්‍රාවක් ගැනීමෙන් ලිංගික ප්‍රාණවත් වීම පාලනය නොවන තත්ත්වයක් ඇති බවට සමහරුන් මත පළ කරනවා මෙහි සත්‍යයක් තිබේද?

ඔව්; එසේද සිදුවිය හැකියි.

  • ඒ සඳහා වන ප්‍රතිකර්මය කුමක්ද?

ඒ සඳහා ඇති පහසුම ප්‍රතිකර්මය වන්නේ රෝහලක දී ලිංගේන්ද්‍රිය පද්ධතිය තුළ ගලා යන අධික රුධිරය ඉදිකටුවක් වැනි ශෛල්‍ය උපකරණයක් මාර්ගයෙන් ශරීරයෙන් ඉවත් කිරීමයි.

 

දමයන්ති ගමගේ

සිනමාවේ හැමදාමත් දුෂ්ටකම් කරන විල්සන් කරූ පසුගිය දවස්වල ඉරාජ්ගේ මියුසික් වීඩියෝ එකක රඟපාලා කවුරුත් ගරු සරු කරන ගායන ශිල්පී වික්ටර් රත්නායකයන්ටත් දුෂ්ටකමක් කළාද කියලා සමහරු අහන්න ගත්තා. ඒත් අපිත් එක්ක මේ කතා බහට එක්වූ විල්සන් කරූ නම් කිව්වේ ඊට හාත්පසින්ම වෙනස් කතාවක්. 
 
විල්සන් කරූ කියන නළුවා සිනමාවට පැමිණීම අහඹු සිදුවීමක් කියලයි අපි අසා තිබෙන්නේ. එය ඇත්තක්ද?
ඇත්තටම මම නළුවෙක් වෙන්න හිතාගෙන හිටපු කෙනෙක් නොවෙයි. සුදාර් මතිස් අධ්‍යක්ෂණය කළ “හදවත් නැත්තෝ” චිත්‍රපටයේ රොබින් ප්‍රනාන්දු එක්ක සටන් ජවනිකාවකට සුදුසු නළුවෙක් හොයනකොට අපේ ගෙවල් පැත්තේ හිටපු සිනමා තිරනාටක රචකයකු වන පුණ්‍යදාස බුලත්සිංහල මහතා තමයි මම ගැන කියලා තියෙන්නේ. ඒ අනුව මම ඒ අධ්‍යක්ෂවරයා හමු වුණා. ඒ විදියට තමයි මගේ ගමන පටන් ගත්තේ. ඒ 1972 අවුරුද්දේ. 
 
එදා මෙදා තුර ඔබ රඟපෑ නිර්මාණ ගැන කතා කළොත්? 
මම චිත්‍රපට 250ක විතර රඟාපාලා තිබෙනවා. ටෙලි නාට්‍ය 15ක විතර රඟපාලා තියෙනවා. Music video එකකත් රඟපෑවා. 
 
ඒ අතරින් වඩාත්ම සතුටක් ලැබුවේ කුමන නිර්මාණයකට සම්බන්ධ වෙලාද? 
මාලනී ෆොන්සේකාගේ “සසර චේතනා” චිත්‍රපටයේ නිකලස්ගේ චරිතය තමයි මගේ රංගන ජීවිතයේ වැඩියෙන්ම තෘප්තියක් ලැබූ චරිතය. ඒ රංගනයට ඒ වසරේදී රංගන කුසලතා සම්මානයකුත් ලැබුණා. ඒ චරිතය ගැන ඒ දවස්වල බොහෝ දෙනා අතරේත් කතා බහට ලක් වුණා. 
 
ඔබ රඟපෑ එකම එක Music video එකත් සමාජය තුළ දැඩි කතා බහට ලක් වුණා. ඒ රංගනය ගැන අද ඔබ සතුටු වෙනවාද? 
රඟපෑ චිත්‍රපට 250 හා ටෙලි නාට්‍ය 15 ගැන නම් සතුටු වෙනවා. හැබැයි රඟපෑ එකම එක ර්භඵඪජ මඪඤඥධ එක ගැන නම් කිසිම සතුටක් නැහැ. 
 
එතකොට ඔබ ඔය කියන මියුසික් වීඩියෝ එකේ රඟපෑවෙත් අසතුටින්ද? 
රඟපාන්න යන විටදීවත් රඟපාන විටදීවත්  කිසිම අසතුටක් තිබුණේ නැහැ. ඒත් ඒ Music video එක නිකුත් වෙලා හතරවටින් ප්‍රතිචාර එද්දි තමයි ඒ දුක ඇතිවුණේ.
ඒ Music video එක වික්ටර් රත්නායකගේ ජීවිත කතාව බවට හැම තැනම ප්‍රචාරය වෙද්දී තමයි මමත් ඒක බැලුවේ. සොසේජස් දර්ශන, කෙසෙල් ගෙඩි දර්ශන දැක්කේ ඒ වේලාවේ. වික්ටර් රත්නායකයන්ව මමත් කිරුළපන ප්‍රසංගවලට කැඳවා තිබෙනවා. ඒ දරුවොත් මට හිතවත්. එතුමාට අපහාස වන නිර්මාණයකට කියලා දන්නවා නම් මම එතැන ඒ කටයුත්ත කරපු හැමෝටම ගහලා කැමරා ආම්පන්නත් ‍පොඩි කරලා තමයි එතනින් එන්නේ. 
 
ඒ කියන්නේ ඉරාජ් ඔබව රැවැට්ටුවා? 
ඔව්, ඒ ගැන මම එයාගෙන් ඇහුවා. එයා කියනවා මේක වික්ටර්ට අපහාස කරන්න කරපු video එකක් ‍නෙවෙයිලු. ඒක වික්ටර්ගේ කතාවට සම්බන්ධ කරගෙන තියෙන්නේ බලන අයලු. 
 
අද සිදුවන මේ වගෙ දේවල් දකින විට ඔබට එදා සිනමාව ගැන මොකද හිතෙන්නේ? 
එදා අපි ෂුටිං ගියේ විනෝද ගමනක් යනවා වගේ. හරිම සතුටින් තමයි ලොජ් වෙලා හිටියේ. අපි “සංඛපාලි” රූගත කරද්දී ඊට ටිකක් දුරින් තමයි “බඹරු ඇවිත්” කළේ. සමහර දාට විජය, කලං එහෙම බඹරු ඇවිත් ෂුටිං ඉවර වෙලා, රෑට අපි ඉන්න හොටෙල් එකට එනවා. රෑ 2 විතර වෙනකල් සින්දු කියලා විනෝද වෙලා යන්නේ. 
 
අද නළු නිළියන් හා එදා සිටි නළු නිළියන් අතර වෙනස ඔබ දකින්නේ කොහොමද? 
දක්ෂ අය අදත් ඉන්නවා. ඒත් එදා තිබුණු ප්‍රේක්ෂක ප්‍රතිචාර අද නැහැ. අද චිත්‍රපටයක් ටෙලි නාට්‍යයක් ෂූටිං කරන්න ගියාම පාරේ යන අය ඒ දිහා බලල හැරිලා යනවා. ඒත් එදා ගාමිණි ෆොන්සේකා, මාලනී ෆොන්සේකා, එනව කියලා දැන ගත්තම පළාතේ අය පිරෙනවා. බයිසිකල් දහස් ගණනක් එක පෙළට නවත්තලා මිනිස්සු කට්ටිය නැවතිලා ඉන්නවා. හෝට‍ලේට එනවා. බයිසිකල් බලාගන්න වෙනම අය ඉන්නවා. ඒ අය ඒ කටයුත්ත කරලා දවසට ලොකු ගාණක් එකතු කරගන්නවා. 
 
ඒ කා‍ලේ රූගත කිරීම්වලට ගියාම අමතක නොවන අත්දැකීම්වලට මුහුණ දෙන්නත් ඇති නේද? 
ඒ වගේ අවස්ථා නම් ගොඩක් තියෙනවා.
 
එකක් දෙකක් කියන්නකෝ බලන්න? 
“සංඛපාලි“ රූගත කළේ වැල්ල ආශ්‍රිත ප්‍රදේශයක. දවසක් අපි ෂූටිං කරන්න සූදානම් වෙලා ඉන්නවා. ඔය වෙලාවේ ඒ පළාතේ චණ්ඩි වගයක් ඇවිත් අපේ නිළියන්ට ගල් කැටවලින් ගහන්න පටන් ගත්තා. ගාමිණී ෆොන්සේකා මහත්තයා ඒ අය ළඟට ගිහින් කාරුණිකව කතා කරලා කිව්වා. ඒ වැඩේ නවත්වන්න කියලා. ඊට පස්සේ ඒ අය අපිත් එක්ක ගැටුමට ආවා. ගාමිණී මහත්තයයි මමයි ඒ චණ්ඩින්ට පන්න පන්නා පහර දුන්නා. ඊට පස්සේ ඒ බොරු චණ්ඩි පැත්ත පළාතේ ආවේ නැහැ. 
 
ඔබ සැබෑ ජීවිතේදීත් චණ්ඩියෙක්ලු නේද? 
ඉස්කෝ‍ලේ 2-3 පන්තිවල ඉඳන් හැමදාම ගෙදරට නඩු එනවා. කාට හරි ගහලා. හැබැයි කවදාවත් අසාධාරණ කම් කරලා නැහැ. කාට හරි අසාධාරණයක් වුණොත් මම ඊට විරුද්ධව සටන් කරනවා. 
 
සිනමාවේදී හැමදාම දුෂ්ටකම් කරද්දී රසිකාවියන්ගේ ආදරය ලැබෙන්නේ නැහැ නේද? 
අහිංසක පිරිමින්ට කැමති ගැහැනුත් ඉන්නවා. දඩබ්බර චණ්ඩින්ට කැමති ගැහැනුත් ඉන්නවා. මට කැමති රසිකාවියොත් හිටියා. ආදරය ඉල්ලලා විවාහ යෝජනා කරලා ලියුම් එවපු ගෑනු ළමයිනුත් හිටියා. 
 
නිළියන්ගෙන් ආදර යෝජනා ඇවිත් නැද්ද? 
නැහැ. ඒ හැමෝම මගේ යාළුවෝ. 
 
ජීවිතය තනිකඩව ගෙවීම ගැන අද මොකද හිතෙන්නේ? 
මම යාළු මිත්‍රයෝ වට කරගෙන ඉන්න කෙනෙක්. මේ නිදහස විඳින්නේ තනිකඩව ඉන්න හින්දා කියලා හිතෙනකොට සතුටක් දැනෙනවා. ඒත් ගෙදරදී තේ එකක් බොන්න හිතුනම තනියමනේ තේ එක හදාගන්න වෙන්නේ. ඒ වගේ වෙලාවට නම් හිතෙනවා බිරිඳක් හිටියා නම් හොඳයි කියලා. හැබැයි ඉතින් විවාහ නොවී සිටීම ගැන නම් මම පසුතැවෙන්නේ නැහැ. තනිකඩව ජීවිතය ගෙව් එකම කෙනා මම ‍නෙවෙයිනේ. 
 
ආරියවංශ කුලතිලක

 

IMAGE

බසයේදී දුන් බොරු විවාහ පොරොන්දුවෙන් පවුල්ජීවිතේ 'හබක්'

IMAGE 2018 Feb 23 12:25
ඔහු අගනුවර ප්‍රසිද්ධ සමාගමක විධායක නිලධාරියෙකි. වයස අවුරුදු 40 ඉක්මවූ ඔහුට රූමත් බිරිඳක් සහ...
Views - 3630

අහිමි පෙම ඉල්ලා පෙම්වතියට ප්‍රසිද්ධියේ ගුටි ඇනලා

IMAGE 2018 Feb 23 10:42
පැරණි පෙම්වතියගෙන් අහිමි වූ ආදරය නැවත ඉල්ලා එය නොලැබුණු විට නාරාහේන්පිට ප්‍රදේශයේදී ඇයට...
Views - 2411

සංසාර සිහිනයේ ගී සංකල්පනය මම 'ටැබ් එකේ ටයිප් කරපු' එකක්

IMAGE 2018 Feb 21 12:00
සනුක වික්‍රමසිංහ ගායනා කරන “සංසාර සිහිනේ” කලක පටන් බොහෝ ගීත දර්ශකවල පෙරමුණ ගෙන තිබෙන...
Views - 3563

මම නාට්‍ය කලාවෙ ඉන්නේ ඒ ගැන තියන 'උණ' නිසයි

IMAGE 2018 Feb 21 11:53
වේදිකාව, පුංචිතිරය සහ සිනමාව යන මාධ්‍ය ත්‍රිත්වයෙහිම සිය ප්‍රතිභාව ප්‍රකට කළ කලාකරුවකුවන...
Views - 2124

බිරිඳ රැකියාවක් නොකිරීම මගේ සාර්ථකවයට හේතුවක්

IMAGE 2018 Feb 20 14:38
“සිරස ජූනියර් සුපර් ස්ටාර්..” තරගය ගැන මුලින්ම අප ඔබගෙන් විමසන්න කැමතියි.. ඇත්තෙන්ම “සිරස...
Views - 7208

බිරිඳට පින් තකා සුනඛයන්ට දිනපතා සහල් කිලෝ 08ක දනක්

IMAGE 2018 Feb 20 14:23
මිනිසා තිරිසනුන් වන අවස්ථාත් තිරිසනා මිනිසුන් වන අවස්ථාත් අපට බොහෝ විට දක්නට ලැබුණද...
Views - 4434

Please publish modules in offcanvas position.