lakbima.lk

කොළඹ හදවතේ සැඟවී තිබෙන රාජසිංහ සිරකුටිය

 

ලංකා රාජධානියේ අවසාන රජු ශ්‍රී වික්‍රම රාජසිංහය. දකුණු ඉන්දීය නායක්කර් වංශිකයකු වූ ඔහු ක්‍රි.ව. 1796-1815 කාලයේ මෙරට කන්ද උඩරට මහනුවර රාජ්‍ය පාලනය කළේය. ශ්‍රී ලංකා රාජ්‍ය පූර්ණ බ්‍රිතාන්‍ය යටත්විජිතයක් බවට පත්වූයේ රාජසිංහ රජු ඉංග්‍රීසීන්ගේ අත්අඩංගුවට පත්වීමෙන් පසුවය.

1798 දී රජකමට පත්වන ශ්‍රී වික්‍රම රාජසිංහ රජු 17 වසක් මෙරට පාලකයා ලෙස කටයුතු කර තිබේ. ඔහුගේ කෲර පාලනයත් උඩරට රදළයන්ගේ පාවාදීම හේතු කොට ගෙන උඩරට රාජධානිය අල්ලා ගැනීමට ඉංග්‍රීසීන් දියත් කළ දෙවැනි ආක්‍රමණය සාර්ථක වූයෙන් 1815 පෙබරවාරි මාසයේ මුල රාජසිංහ රජු බිසෝවරු සමග රාජ්‍ය අතහැර පලායාමෙන් පසුව කිසිදු ‍ලේ වැගිරීමකින් තොරව ඉංග්‍රීසීන්ට උඩරට රාජධානියේ බලය අල්ලා ගැනීම හැකිවිය. ඒ අනුව 1815 මාර්තු 02  වැනිදා ඉංග්‍රීසි ආණ්ඩුකාර රොබට් බ්‍රවුන්රින් හා සිංහල උඩරට ප්‍රධානීන් අතර මහනුවර මඟුල් මඩුවේදී අත්සන් කළ ගිවිසුමෙන් ලංකා රාජ්‍ය බ්‍රිතාන්‍ය යටත් විජිතයක් බවට පත්විය.

මේ අතර රාජ්‍යය අතහැර පලා ආ ශ්‍රී වික්‍රම රාජසිංහ රජතුමා බෝමුරේ ගල්ලැහැවත්තේ උඩුපිටියේ ආරච්චිලාගේ නිවසට පැමිණ තිබේ. එහි සැඟවී සිටි රජතුමා 1815 පෙබරවාරි 18 වැනිදා එක්නැලිගොඩ නිලමේ ප්‍රධාන හමුදා කණ්ඩායම් මගින් අත්අඩංගුවට ගෙන තිබේ. පසුව ජෝන් ඩොයිලිගේ උපදෙස් මත රජු ඇතුළු පිරිස කොළඹ කොටුවට ගෙන ආහ. ඒ 1815 මාර්තු 6 වැනි දාය.

මෙලෙස කොළඹ කොටුවට ගෙන එන ලද රජු එහි එක්තරා ස්ථානයක සිරකර තබන ලද බව සඳහන් වේ. මේ සිරකර තැබූ ස්ථානය ගැන නිශ්චිත පුරාවිද්‍යාත්මක සටහනක් නැතද වර්තමානයේ කොළඹ කොටුවේ සෙලින්කෝ මන්දිරය පිහිටි තැන දක්නට ඇති සිරකුටිය රාජසිංහ රජු සිරකර තැබූ සිරකුටිය බව විශ්වාස කෙරේ.

අඩි 10ක් තරම්වත් නැති මේ කුඩා භූමිය තුන්පැත්තක්ම හරි හතරැස්ය. එක් පැත්තක් ඕවලාකාර හැඩතිය. සිරකුටියට ඇතුළුවීමේ යකඩ දොර මේ ඕවලාකාර පැත්තේ පිහිටා තිබේ. මෙම සිරකුටියේ වහල සෙවිලි කිරීමකින් තොරව බිත්ති ආකාරයෙන්ම සකසා තිබිම විශේෂය. වහලද ගෝලාකාරය. කුටියේ එක් පසෙක රාජකීය ඇඳුමින් සැරසුණු රජුගේ ප්‍රතිමාවක් නෙළා ඇත. කුටිය තුළ රජතුමාගේ රජ බිසව වූ වෙන්කත රෙන්ගමාල් පිළිමතලාවේ අධිකාරම්, දළදා මාලිගාව, රජු ඉන්දියාවට පිටුවහල් කළ නැව, ඉන්දියාවේ වෙල්ලෝරයේ රාජසිංහ ස්මාරකය ආදියේ සිතුවම් දැකගත හැකිය.

මීට අමතරව සිර මැදිරියේ වම් පසින් සමරු ඵලකයක් නිර්මාණය කර තිබෙන අයුරු දැක ගත හැකිය. මෙම සිරකුටිය රාජසිංහ රජු සිරකර තැබූ කුටිය බව තහවුරු කෙරෙන සටහනක් ලෙස මෙම සමරු ඵලකය සාක්ෂි දරයි. එහි මෙලෙස සඳහන් වේ.

1798 සිට 1815 දක්වා ශ්‍රී ලංකාදීපයේ කන්ද උඩරට රජ කළ අන්තිම රජතුමා වන ශ්‍රී වික්‍රම රාජසිංහ රාජෝත්තමයාණන් එවකට මුහුදබඩ පළාත්වල පාලනය ගෙන ගිය බ්‍රිතාන්‍ය ආණ්ඩුකාර තැන වන ශ්‍රීමත් රොබට් බ්‍රවුන්රිග් විසින් කන්ද උඩරටට එරෙහිව කරන ලද ආක්‍රමණයකින් 1815 පෙබරවාරි 18 දින ඉංග්‍රීසීන්ගේ අත්අඩංගුවට පත්වී කොළඹට ගෙනැවිත් කොළඹ කොටුවේ ගාල්ලට අවතීර්ණය වන දොරටුව ආසන්නයේ වූ මන්දිරයේ රජුට වෙන් වූ මෙම සිරකුටියේ යුද්ධ සිරකරුවකු වශයෙන් තාවකාලිකව රඳවා තබන ලදී.

කපිතාන් ඕ බ්‍රයන්ගේ සුරක්ෂාව යටතේ කෝන්වෝල් රාජකීය නෞකාවෙන් සිහසුනෙන් පහ කරන ලද රජු හා බිසවුන් සහිත පිරිවර සමග කොළඹ වරායෙන් 1816-01-24 දින පිටුවහල් කර මදුරාසියේ වෙල්ලෝරයේ යුද සිරකරුවකු වශයෙන් ගත කර 1832-01-30 දින අභාවප්‍රාප්ත විය.

කෙසේ වුවද කොළඹට රැගෙන ආ ශ්‍රී වික්‍රම රාජසිංහ රජු රඳවා තැබුවේ මේ සිරකුටියේම ද යන්න තවමත් මතභේදයට තුඩුදෙන කරුණකි. කොළඹට රැගෙන ආ රජු ගාලු මුවදොර ආසන්නයේ තිබුණු විශාල නිවසක රඳවා තැබූ බවට වූ මතයක්ද පවතින්නේය. කුටියේ ප්‍රමාණය ගැන සැලකීමේදී වුවද එහි පුද්ගලයකු රඳවා තැබිමට ප්‍රමාණවත්ද යන ගැටලුව මතුවේ. එහෙත් ඇතැම් වාර්තාවල සඳහන් වන ආකාරයට රජු විශාල මන්දිරයක රඳවා සිටි බවත් මත් ලෝලියකු වූ රජු බිමතින් කලහකාරී ලෙස හැසිරෙන අවස්ථාවල මෙම සිරකුටියට දමා තිබූ බවත් පැවසෙයි.

මේ මතවාද කෙලෙස වුවත් මේ වන විට ප්‍රචලිතම මතය කොළඹ කොටුවේ සෙලින්කෝ ගොඩනැගිල්‍ලේ රථගා‍ලේ ඇති කුඩා කුටිය ශ්‍රී වික්‍රම රාජසිංහ රජු සිරකර තැබු කුටිය බවය. එහෙත් එතුළ ඇඳ ඇති සිතුවම් පසු කාලයකදී අඳින ලද ඒවා බව සැක නැත.

මාස දහයක කාලයක කොළඹ කොටුවේ සිරකර සිටි රාජසිංහ රජු සහ ඔහුගේ පිරිස 1816 ජනවාරි මාසයේ 24 වැනි දින ඉන්දියාවේ මදුරාසියට පිටුවහල් කර ඇත. පසුව මදුරාසියෙන් වෙල්ලෝරයට යවන ලද රජු මියගියේත් ඉන්දියාවේදීමය.

ප්‍රියංගිකා එදිරිසූරිය ආරච්චි

 

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.