Home    |    Daily Lakbima    |    Sunday Lakbima    |   Rajina |    Archive    |    Advertise With Us    |     Careers Email - [email protected] youtube
lakbima.lk

                                                                                        එසැනින් පුවත් | ගොසිප් | විශේෂ පුවත් | සුන්දර ලක්බිම | ව්‍යාපාරික පුවත්     

චියර්ස් මංගල

පත්තර කන්තෝරුව ඇතුළට ආ ‍‍‍ජ්‍යෙෂ්ඨ පත්‍ර කලාවේදියා මහ හයියෙන් කෑගැහුවේය.
බියර් මිල අඩු කිරීම අපි ‍ලේසියෙන් අත අරින්න නරකයි, කොල්ලනේ. මම ලිව්ව මේකට විරුද්ධව රිදෙන්න ලිපියක්.
කන්තෝරුවේ තැන් තැන්වල සිටි පත්‍ර කලාවේදීහු එකිනෙකාගේ මුහුණු බලාගත්හ.
මුලින්ම කට ඇරුණේ පත්‍රයේ කාන්තා පිටුව භාර පත්‍ර කලාවේදිනියගේය.
මං හැමදාම කියන්නෙ ඕකා මහා පත්‍ර කලාවේදියා වුණාට අමු කුහකයා කියල ඈ කියා සිටියාය. නැත්නම් තමනුත් බියර් බොන එකා බියර් මිල අඩු කෙරුවට විරුද්ධ වෙන්නෙ මොකටද?
බෞද්ධ පිටුවේ සංස්කාරකවරයා ඒ කතාවට විරුද්ධ විය.
බියර් බොන මිනිහෙක්ම මේකට විරුද්ධ වීම වටිනවා ඔහු කියා සිටියේය. අපි කියනවට වඩා බේබද්දෙක්ම බිමේ නුගුණ කිව්වම ඒකෙ අගේ වැඩියිනෙ.
පත්‍රයේ දේශපාලන විචාරකයා මේ කතා අසා හයියෙන් හිනාවුණේය.
බියර් බොන ගමන් ඒකට විරුද්ධව කතා කරන්නෙ මොන ජාතියෙ එවුන්ද කියල තේරෙන්නෙ නැද්ද? ඔහු අනිත් අයගෙන් ඇසුවේය. මං ඕන ඔට්ටුවක් අල්ලනව ඕකා ඔය ලෑස්ති වෙන්නෙ හෙට අනිද්දට තියෙන ඡන්දෙට එන්න.
පත්තරේ ටැබ්ලොයිඩ් අතිරේකයේ සංස්කාරකවරයාද ඊට හිස වැනුවේය.
මිනිහ ඉතින් ජනප්‍රියත්වයම බලාගෙන ලියන ‍පොරක්නෙ ඔහු කීවේය. ඒක නිසා ඡන්දෙ ඉල්ලන්න නූනත් ඕක මාර්කට් වෙන්න කරන්න හදන වැඩක් බව නම් ෂුවර්.
කතාවට කන්දී සිටි සෞඛ්‍ය පිටුවේ සංස්කාරකවරයා කට ඇද කළේය.
බොලා නොදන්නවට මං නම් දන්නව ඕකෙ රහස ඔහු කියා සිටියේය. ඕකා දැන් ලෙඩින්. මං පත්තරේට ලියන දොස්තර කෙනෙක් ගාවටත් යැව්ව මේ ළඟදි.
පත්‍රයේ නියෝජ්‍ය කර්තෘ අන්තිමට කට ඇරියේය.
හාමුදුරුවරු ලියන්න ඕන ඒව අපි ලියල හරියන්නෙ නෑනෙ පත්තරේට ඔහු සිය අදහස දැක්වීය. මං ලොක්කත් එක්ක කතා කරල ඕකගෙ ඔය මඟුල් ලිපිය නවත්තනවා.
ඔහු ප්‍රධාන කර්තෘගේ කාමරයට ඇවිදගෙන යන විටද ‍‍‍ජ්‍යෙෂ්ඨ පත්‍ර කලාවේදියා සිටියේ එතැනය.
මිනිස්සු කසිප්පු බොන්නෙ කණ පැලෙන්න වදින්න ඕන නිසා ඔහු කර්තෘට කියමින් සිටියේය. මිල අඩු කරයි කියල උන් කීයටවත් බියර් බොන්නෙ නෑ චීෆ්.
ප්‍රධාන කර්තෘ හා නියෝජ්‍ය කර්තෘ මුවින් නොබැණ ඔහු කියන දේ අසා සිටියහ.
මේ ඉලව් යහපාලනයක් ගේන්න වැඩ කරල අපි ඇතිවෙන්න මිනිස්සුන්ගෙන් බැණුම් අහනවනෙ ඔහු වැඩිදුරටත් කියා සිටියේය. ආපු දවසෙ ඉඳන්ම මොනවද මේගොල්ලො මේ කරන විකාර?
ප්‍රධානීන් දෙදෙනා ඊටද පිළිතුරක් නොදී ඇහුම්කන් දී සිටියහ.
ඇයි දෙයියනේ මුන් දැන් අවුරුදු තුනක් තිස්සෙම කරන්නෙ මිනිස්සුන්ට හොඳට බොන්න වෙන වැඩනෙ ඔහු කියා සිටියේය. සයිටම් ප්‍රශ්නෙ, බැඳුම්කර මගඩිය, තෙල් හිඟේ, හම්බන්තොට විකිණිල්ල, මයිලෝවල සීනි ප්‍රතිශතය මේව අමතක කරන්න පුළුවන්ද බියර් පීප්පයක් බිව්වත්. යකෝ මංගල අපිට හොඳට බොන්න වෙන වැඩ කර කර බියර් මිල අඩු කරල මොකටද?

හැමෝටම තෙල් නැතුව ගියේ නෑ

මේ සතිය පුරාම වැසි වැස්සේය.වර්ෂාවෙන් වැඩියෙන්ම පීඩා විඳින්නේ මෝටර් සයිකල්වලින් යන්නන්ය. වාහනයක් තිබියදීත් ඔවුන්ට එය නතර කරගෙන වැස්ස පායන තුරු බලා හිඳින්නට සිද්ද වෙන නිසාය. මෙසේ සිටින්නන් දකින විට මට පහුගිය ඡන්දය දවස්වල වැස්සට අගුපිලකට ගොඩවී සිටි තරුණ ජෝඩුව මතක් විය.
යූඑන්පී ආණ්ඩුවක් ආවම අපිටත් කාර් එකක් ගන්න පුළුවන් වෙයි එහිදී කොල්ලා කෙල්ලට කියයි.
ඔවුන් ගත් කාරය බැලීමට මම ඒ ජෝඩුව සොයාගෙන ගියෙමි.
මා යන විට කොල්ලා ගෙදර කැබිනට්ටුව උඩ තිබූ රනිල්ගේ පින්තූරයට කොල පාට මල් මාලයක් පළඳවමින් සිටියේය.
අම්මට සිරි එහෙනම් ළඟදියි කාරෙකක් අරන් තියෙන්නෙ මට ඉබේටම කියවුණේය. යූඑන්පී ආණ්ඩුව ආපු ගමන් ගන්නනෙ හිටියෙ.
මගේ කතාවෙන් කොල්ලාගේ මුහුණ හැකිළී ගියේය.
රනිල් සර්ගෙ වොක්ස්වොගන් ෆැක්ටරියෙ මුල්ම කාර්රෙක අපිට දෙන්න නමත් රෙජිස්ටර් කරලයි තිබුණෙ. ඒත් කාරෙක ගන්න බැරි වුණා ඔහු කියා සිටියේය. සර් දුරදිග හිතා බලල කාර් නැති හැමෝටම කාර් අරන් දෙන වැඩේ නැවැත්තුවනෙ.
ඇයි ඒ?
ඇයි කියන්නෙ තෙල් ස්ට්‍රයික්කෙක නැගල ගිය හැටියට රටේ හැමෝටම කාර් දීල තිබුණ නම් මේ දවස් ටිකේදි ආණ්ඩුව කඩාගෙන වැටෙනවනෙ කොල්ලා කියා සිටියේය. කවද හරි මෙහෙම ප්‍රශ්නයක් වෙන බව සර් දුරදක්නා නුවණින් දැකපු නිසා යන්තම් ආණ්ඩුව බේරුණා.
කොටි තෙල් ටැංකිවලට ගහලවත් මෙහෙම ප්‍රශ්නයක් වුණේ නෑනෙ මමද කියා සිටියෙමි. අන්තිමේ ප්‍රභාකරන්ටත් කරන්න බැරිවෙච්ච වැඩක් අර්ජුණ කරානේ.
කොල්ලාද මගේ කතාවට එකඟ විය.
ඕක අහම්බෙන් වෙච්ච දෙයක් නමෛයි මං හිතන්නෙ. ලංකාව ප්‍රසිද්ධ වෙලා තිබුණෙ ක්‍රිකටුයි, කොටියි නිසානෙ ඔහු කියා සිටියේය. ඒක නිසා අර්ජුණ අයියට ඕනකම තියෙන්න ඇති කොටි සෙකන්ඩ් වෙන වැඩක් කරන්න.
ඒ කතාවෙන් පුදුම වූ මම කට ඇරගෙන කොල්ලාගේ කට දෙස බලාගෙන සිටියෙමි.
අර්ජුණ අයියගෙ ටැලන්ට්ටෙක මේ රටේ මිනිස්සුන්ට තේරෙන්නෙ නෑ. දැන් බලන්න 1996 එක දවසක මුළු රටම එක තැන නැවතිල බලාගෙන හිටියනෙ මෑන් අපිට වර්ල්ඩ් කප්පෙක ගේනව ඔහු කියා සිටියේය. මේ වෙනකොට වයසට ගිහින් නිසා හරි නම් මිනිහගෙ ෆෝම් එක නැතිවෙලා තියෙන්න ඕනනෙ. ඒත් බලන්නකො අවුරුදු 21 කට පස්සෙ මෑන් දවසක් ‍නෙවෙයි සුමානයක්ම රට එක තැන නවත්තලා තිව්ව ලස්සන.
මම සිනාසුනෙමි.
මාර වැඩේ තමයි අර්ජුණ කරේ නේද? මම කොල්ලාගෙන් ඇසුවෙමි. පාර්ලිමේන්තුවෙ කථානායකගෙ වාහනේට හිටන් තෙල් නැතුව ගියාලුනෙ.
ඒත් හැමෝටම තෙල් නැතුව ගියෙ නෑ බොස් කොල්ලා මට කියා සිටියේය. අර්ජුණ අයිය මහින්ද මහත්තයටයි, ඒකාබද්ධෙ අයටයි සුමානයක්ම දුවන්න ෆුල් ටෑන්ක් තෙල් ගහල දුන්නනෙ.

පාර්ලිමේන්තුව රැකගමු විමල්ට බෝම්බ ගසමු

යෝජිත ව්‍යවස්ථාව පරද්දන්නට 76 දෙනකු සොයා ගන්නට බැරි නම් එවැනි පාර්ලිමේන්තුවකට බෝම්බ ගැසීම හැර වෙන කළ යුතු දෙයක් නැතැයි විමල් වීරවංශ නොබෝදා කියා සිටියේය. ඔහු වැනි ඉතා හොඳින් හිතා මතා, වචන තෝරා බේරාගෙන, අවශ්‍ය දේ පමණක් කියන වියත් කථිකයකු කළ මේ අනපේක්ෂිත ප්‍රකාශයෙන් අහිංසක පාර්ලිමේන්තු මන්ත්‍රීවරු ඇතුළු රටම බියපත් වී සිටියි. මේ නිසා වීරවංශගේ ප්‍රකාශය ගැන රටේ විවිධ පුද්ගලයන්ගේ හා ආයතනවල අදහස් විමසීමට මානි කල්පනා කළේය.
 
මහාචාර්ය ලියනගේ....:-
අ‍පොයි ඒ මොන අපරාදයක්ද? මං ෆේස් බුක් එකෙත් ඔය ගැන දැම්මා. රටේ උගත්ම, බුද්ධිමත්ම 225 දෙනානෙ ඔතන ඉන්නෙ. ඔය මිනිස්සු ටික නැතිවුණොත් ඒ දැනුම් සම්භාරය රටට ලබාගන්න තව පරම්පරා කීයක් යයිද? මයිගෝඩ් කොච්චර උගත්තුද ඔතන ඉන්නෙ කියනවා නම් මං අහලා තියෙනවා ඒ සමහරු ඕ ලෙවලුත් පාස් කියලා.
 
ආචාර්ය.... දේවසිරි....:-
අයියෝ ඒක නම් වෙන්න දෙන්න බෑ. සිංහල රජ කාලෙ ඉඳන් තමන්ට පරම්පරාවෙන් පරම්පරාවට ලැබිච්ච වස්තුව නැති නාස්ති කරගෙන මේ රට නංවන්න දුක් විඳිමින් දේශපාලනේ කරන ඒ පරිත්‍යාගශීලීන්ට බෝම්බ ගහන්න අතක් උස්සන්න පුළුවන් මොන පාපතරයාටද? හරිනම් ඒ ජන කොටසේ තීරණාත්මක කාර්යභාරය අපි තේරුම් ගන්න ඕනනෙ. ඔය සත්ගුණවතුන් ටික මරා ගත්තොත් දේශපාලනේ කරලා හරි හම්බ කරගන්න හදන හිඟන, කාළකණ්ණි රැළක් එන්නත් බැරි නෑ ඔතනට.
 
දොස්තර ගුණදාස....:-
ඔය වීරවංශය කියන්නෙ සීගිරිවත් ගිහින් නැති එකෙක්නෙ. එහෙව් එකා මේ රටේ පේ‍රෟඪ ඉතිහාසය ගැන මොනව දන්නවද? 1947 ඉඳන් මේ වෙනතුරු අවුරුදු 70 ක් තිස්සෙ ඔය ඉස්තානෙන් සම්මත කරපු අණ පණත්වලින් නේද දැන් මේ රට උතුරු කුරු දිවයිනක් වෙලා තියෙන්නෙ. රටට සාමය, සමෘද්ධිය, සෞභාග්‍යය ගෙනාපු එහෙව් තැනකට බෝම්බ ගහන්න ඔය වගේ වස්සෙකුට මිසක් වෙන කාටද ඇහැකි?
 
ශාන්ත සන්නස්ගල:-
ලංකාවෙ එකම එක (වන් ඇන්ඩ් ඔන්ලි) ගුරුවරයා හැටියට මට කියන්න තියෙන්නෙ මගේ ශිෂ්‍යයො වෙනුවෙන් පාර්ලිමේන්තුව ආරක්ෂා කරගන්න මං ජීවිත පූජාවෙන් සටන් වදිනව කියලයි. අවුරුදු ගාණක් තිස්සේ ටියුෂන් පන්තිවලදී ඉගෙන ගන්න බැරි වෙච්ච කුණුහරුප හා අවිනීත හැසිරීම් ඉගෙන ගන්න නම් එක වරුවක් පාර්ලිමේන්තුවෙ මහජන ගැලරියෙ ගත කරන්න කියලයි ශිෂ්‍යයන්ට නිර්දේශ කරන්න ඕන. විමලෙ ඕකට බෝම්බ ගැහුවොත් මේ රටේ අනාගත පරපුර ක‍පෝතියි
 
මාධ්‍ය ඒකකය:-
විමල් වීරවංශ මන්ත්‍රීවරයාගේ ප්‍රකාශය ගැන අපගේ බලවත් සැලකිල්ල යොමුවී තිබේ. මේ සඳහා එතුමාට කවුරුන් විසින් කවර දඬුවම පැනවුවද අවසානයේදී ජනාධිපති සමාව ලැබෙන බව මෙහිලා එකහෙලා කියා සිටිනු කැමැත්තෙමු. අපේ අතිගරු ජනාධිපතිතුමා තමන්ට බෝම්බ ගැසූ ත්‍රස්තවාදියාටද සමාව දුන් පෙරුම් පුරනා බෝධිසත්ත්වයෙකි. ඒ නිසා පාර්ලිමේන්තුවට බෝම්බ ගහන්න ඕනෑ යයි කියූ මේ මන්ත්‍රීවරයාටද ජනාධිපති සමාව ලැබෙනු නිසැකයි. තවද ජනාධිපතිතුමා වීරවංශ මහතා සමග එකට හිඳ සෙල්ෆියකටද පෙනී සිටිනවා ඇත.

එම්.බි.බි.එස්. (කච්චතිව්)

කාලය:- අනාගතය
ස්ථානය:- කොටුව දුම්රිය ස්ථානය ඉදිරිපිට.
සීයා කෙනෙක් සිය මුණුබුරා සමග දුම්රිය ‍පොළෙන් පිටවී මොරටුව බසයකට නගින්නට එයි. හදිසියේම යමක් මතක් වූ සීයා නවතී.
පුතේ, අර පේන මඩුවෙ මගේ පරණ යාළුවො වගයක් ඉන්නවා. අපි ඒගොල්ලන්වත් බලල යමුද? ඔහු මුණුබුරාගෙන් අසයි. ඒ කට්ටිය හරිම දක්ෂයො. ඉහළින්ම විභාගෙ පාස්වෙලා මෙඩිකල් කො‍ලේජ් ගියා. ඒත් ඒ කාලෙ සයිටම් කියල දාපු ප්‍රයිවෙට් වෛද්‍ය විද්‍යාලෙකට විරුද්ධව උපවාස කරන්න අරගෙන දැන් අවුරුදු 50 ක් තිස්සෙම ඒක කරනවා.
සයිටම් අහෝසි කරනු, නිදහස් අධ්‍යාපනය රැකගමු, ව්‍යාජ විසඳුම් එපා ආදී බෝඩ් ගැසූ මඩුවේ වෛද්‍ය සිසු සීයලා හා ආච්චිලා පිරිසක් සිය හැරමිටිද තබාගෙන ඉඳගෙන සිටියහ. මුණුබුරා සමග ආ සීයා දුටු වෛද්‍ය සිසු සීයලා, ආච්චිලා ප්‍රීතියෙන් කුල්මත්ව හුන් තැන්වලින් අමාරුවෙන් නැගිට ඔහු බදාගත්හ.
එක් වෛද්‍ය සිසු ආච්චි කෙනෙක් මුණුබුරාගේ ඔළුව අතගාමින් හඬන්නට පටන් ගත්තාය.
අනේ අපිටත් මේ වගේ සීදේවි මුණුබුරු මිණිබිරියො ඉන්නවනෙ, ඒ කාලෙම බැන්ද නම් ඕ වේදිකාවේ බිම වැටී සිටින සීයා කෙනෙකුට අත දිගු කරමින් කීවාය. කොහෙද මං අර හාදයට කොච්චර කිව්වද මේ සයිටම් මඟුල අත ඇරල ෆාමසියකවත් වැඩට ගිහින් කසාද බඳිමු කියලා.
වෛද්‍ය සිසු සීයලා හා ආච්චිලාගේ දුකෙන් මුණුබුරාද කම්පනය වුණේය.
ඉතින් සීයෙ අවුරුදු පණහකට කලින් මෙඩ්ඩොත් තාම පාරෙ නම් කවුද දැන් ඔය ඉස්පිරිතාලවල වෙදකම් කරන්නෙ? ඔහු සීයාගෙන් ඇසුවේය. පිටරට දොස්තරලද?
සීයා මුණුබුරාට ඉතිහාස කතාව කියන්නට විය.
සයිටම් වැඩේ වැරදුණාම ඒක දාපු දොස්තර නෙවිල් ප්‍රනාන්දු ගිහින් කච්චතිව් දූපතේ මෙඩිකල් කො‍ලේජ් එකක් දැම්මා ඔහු කියා සිටියේය. ඒක පිටරට නිසා ඒකෙ කට්ටියව මෙහේ පිළිගත්තා, දැන් ඉන්නෙ ඔය එම්.බි.බි.එස්. (කච්චතිව්) ගත්ත අපේම කට්ටිය තමයි.
ඒ ඇසූ මුණුබුරාගේ මුහුණේ ප්‍රශ්නයක් නැගුණි.
සීයෙ, කච්චතිව් කියන්නෙ සිරිමා බණ්ඩාරනායක ඉන්දියාවත් එක්ක කතා කරල අරගත්ත අපේ දූපතක්නෙ ඔහු කියා සිටියේය. ඒක කොහොමද පිටරට වෙන්නෙ?
මුණුබුරාගේ ප්‍රශ්නයෙන් සීයාට හිනා ගියේය.
ඒ කාලෙ පුතේ, අපේ රටේ හිටිය සූරම සූර වෙළෙන්දෙක් රනිල් කියලා. හොඳ ගානකට ආව නම් මිනිහ දන්ත ධාතුව වුණත් විකුණනවා සීයා කියා සිටියේය. විකුණන්න මුකුත් නැතිවුණාම මිනිහා ‍පොල් ගහකුයි, පල්ලියකුයි විතරක් තියෙන කච්චතිව් දූපතත් ‍පොඩි ගානකට ඉන්දියාවටම දීල දැම්මා. ඒකෙන් තමයි කච්චතිව් එම්.බි.බි.එස්. පිටරට උපාධියක් වුණේ.
ඉතින් ඒ කාලෙ මේ ආච්චිල සීයලට තමන් දවසක අමාරුවෙ වැටෙනව කියල කියන්න කවුරුත් හිටියෙ නැද්ද සීයෙ?
ටික දෙනෙක් හිටිය පුතේ සීයා කීවේය. ඒ වුණාට උන් ඔක්කොම දුෂ්ට, නූගත්, ප්‍රතිගාමියො. රටේ හිටපු යහපත්, උගත්, ප්‍රගතිශීලියො ඔක්කොම කිව්වෙ සයිටම් නැත්නම් මරණය කියල සටන් කරමු කියලයි.
මේ වන විට මුණුබුරාගෙ ඇස්වල කඳුළුද පිරී තිබුණේය.
අනේ සීයෙ, මේ ආච්චිල, සීයල වැටිච්ච වළෙන් ගොඩගන්න කවුරුවත් කවදාවත් කිසිම උත්සාහයක් කරේම නැද්ද?
කරා, කරා පුතේ. හරියටම අවුරුදු පනහකට කලින් 2017 ඔක්තෝබර් හරියෙ ආණ්ඩුව ඔන්න වළෙන් ගොඩවෙයල්ල කියල හීන් කඹයක් දැම්මා සීයා කියා සිටියේය. එතකොට ඔක්කොම කට්ටිය වටවෙලා ඒ ළමයින්ට කිව්ව ඕක දිරච්ච කඹයක්, ඕකෙ එල්ලෙන්න නරකයි, අපි වළෙන් ගොඩ එන්න ක්‍රේන් එකක්ම ඉල්ලමු කියල.

දන්න යකා සහ නොදන්න යකා

ජනාධිපති මෛත්‍රීපාල සිරිසේන මේ ළඟදී යාපනේ රැස්වීමක කතා කරමින් මාව දුර්වල කළොත් බලවත් වෙන්නේ යක්ෂයායි කියා සිටියේය.
අපේ ජනාධිපතිව පන්නා යක්ෂයා බලයට ඒමට ඉඩ ඇතැයි සිතීමෙන් මම හොඳටම අවුල් වුණෙමි. මේ ගැන අරයාගෙන්, මෙයාගෙන් අහන්නේ නැතිව අදාළ පුද්ගලයාගෙන්ම විමසීමට සිතූ මම යක්ෂයා හමුවීමට ගියෙමි. මා මුලින්ම කළේ ජනාධිපති කී කතාව යක්ෂයාට කියා සිටීමයි.
මගේ කතාව අසා සිටි යක්ෂයා යක්ෂාසනයෙන් නැගිට්ටේය. අනතුරුව යක්ෂ කුටියේම පැත්තක තිබූ කණ්නාඩියක් ළඟට ගියේය. ඒ දෙස ඉතා ඕනෑකමින් බලා සිටි ඔහු අනතුරුව කබඩයකින් රතු පාට සාටකයක් ගෙන එය බෙල්ලට දමා තවදුරටත් කණ්නාඩිය දෙස එබිකම් කළේය.
ඉන්පසු හිස දෙපැත්තට වනමින් ඔහු මා ළඟට පැමිණියේය.
ඒක වෙන්න බෑ හලෝ ඔහු මට කියා සිටියේය. මම කොහොමටවත් මහින්ද රාජපක්ෂ වගේ ‍නෙවෙයිනෙ.
යක්ෂයාගේ කතාවට මට හිනා ගියේය.
පිස්සු යකෙක්නෙ මේ. ජනාධිපතිතුමා මහින්දට යක්ෂයා කියල කියයිද? මම ඔහුගෙන් ඇසුවෙමි. අවුරුදු තිහක යුද්දෙ ඉවර කරල රටට සාමය ලබාදීපු මනුස්සයට යක්ෂයා කියන්නෙ කවුද?
ඒ ඇසූ යක්ෂයා මා දෙස පුදුමයෙන් බලා සිටියේය.
අම්මට සිරි මුන්නැහේට පුදුම මතකයක්නෙ තියෙන්නෙ ඔහු කියා සිටියේය. මෙච්චර අවුරුදු ගානකට පස්සෙත් තාම මතකයිනෙ මහින්දගෙ කාලෙදියි යුද්දෙ ඉවර කරේ කියලා.
මම යක්ෂයාගේ ප්‍රශංසාව ලැජ්ජාවෙන් බාරගෙන මෙසේ කියා සිටියෙමි.
මම නම් හිතන්නෙ ජනාධිපතිතුමා කිව්වෙ එයාව දුර්වල කරොත් රනිල් ඔළුව උස්සයි කියලයි කියලා.
ඒ අසා යක්ෂයාට හිනා ගියේය.
ජනාධිපතිට දැන් රනිල්ව පේනව ඇත්තෙ යකෙක් වගේද දන්නෑ. ඒ වුණාට මේක කිව්වෙ රනිල්ට වෙන්න බෑ ඔහු කියා සිටියේය. මේක කිව්වෙ උතුරෙදිනෙ. එහෙ මිනිස්සුන්ට රනිල් සුරදූතයෙක් මිසක් යක්ෂයෙක් ‍නෙවෙයිනෙ. එහේට යක්ෂයා මහින්දනෙ.
අපේ දේශපාලනය පිළිබඳ යක්ෂයාට ඇති දැනුම ගැන පුදුම වූ මම ඔහුගෙන් මෙසේ ඇසුවෙමි.
ජනාධිපතිතුමාව යකෙක් කරගන්න එපා කිව්ව වෙන්න බැරිද?
ඒ අසා යකා මොහොතක් කල්පනා කළේය.
ඒක නම් කියන්න බෑ තමයි. ඔහේලගෙ ජනාධිපතිවරු කවුරුත් යක්කු වුණේ ටිකක් කල් ගියාට පස්සෙනෙ යක්ෂයා කියා සිටියේය. ඔහොම ප්‍රශ්නයක් වෙන්නෙ නෑනෙ යක්ෂයාගෙ නම කියලම කිව්ව නම්.
මෙහිදී මම ජනාධිපතිගේ පැත්ත ගතිමි.
අපේ ජනාධිපතිතුමා කුතුහලයට කැමැති කෙනෙක්නෙ. ඒක මං හිතන්නෙ ඩීමන් ආනන්දගෙ ‍පොත් කියවල ලබපු බලපෑමක් නිසා වෙන්න ඇති මම කියා සිටියෙමි. දැන් බලන්න පළාත් පාලන ඡන්දෙ කවද්ද තියන්නෙ, බැඳුම්කර කොමිසමෙන් වැරදිකාරයො කරන උන්ට දඬුවම් දෙනවද, සයිටම් වහනවද, 2020 ඡන්දෙ ඉල්ලනවද, ඒකාබද්ධෙ එක්ක එකතු වෙනවද, ඔය හැම දෙයක්ම මිනිස්සුන්ට හිතාගන්න අරිනව මිසක් කිසිදෙයක් හරියට කියන්නෙ නෑනෙ.
ඒ අසා යක්ෂයා හිනාවුණේය.
ඒත් හැම දේකදීම කුතුහලය රඳවගන්න බැරි වුණා නේද? ඔහු මගෙන් ඇසුවේය. යක්ෂයා බලවත් වුණේ නැතුව වුණත් මේක යකාගෙ ආණ්ඩුවක්ය කියල සැකයක් නැතුව කවුරුත් දන්නව නේද?
IMAGE

55 වියැති බැංකු ලොක්කා 29 කන්තෝරු නෝනා සමඟ 'හනිමූන්' ගිහින්

IMAGE 2017 Nov 22 12:50
බැංකුවක උසස් නිලයක් දරන පනස්පස් හැවිරිදි සිය සැමියා වසර ගණනාවක් තිස්සේ විසිනව හැවිරිදි රජයේ...
Views - 2349

අහසේ සිට බිමට පනින එස්.ටී.එෆ්. යුවතියෝ

IMAGE 2017 Nov 22 10:55
අම්පාර උහන ගුවන් ධාවන පථයෙන් අහසට නැඟගත්, එම්. අයි. 17 වර්ගයේ හෙලිකොප්ටරය  නිලඹර දෙපළු කරමින්...
Views - 1553

මිහිදුම සහ වැස්ස ගැන 'කාලගුණ විද්‍යාවෙන්' බොරු කී‍වේ ඇයි?

IMAGE 2017 Nov 22 10:43
මේ දිනවල අළුයම් කාලයේ අගනුවර ඇතුළු ප්‍රදේශ රැසක දැඩි මිහිදුම් තත්ත්වයක් දක්නට ලැබුණු බව...
Views - 822

මුගාබේගේ බිරිඳ ද පක්ෂයෙන් නෙරපයි

IMAGE 2017 Nov 21 09:37
වසර 37  ක කාලයක් සිම්බාබ්වේ දේශය පාලනය කළ රොබට් මුගාබේ නිවාස අඩස්සියට ගනිමින් හමුදාව එරට...
Views - 1836

ඒ ආදර කතාව ඉවරයි මම දැන් සින්ගල්

IMAGE 2017 Nov 19 17:31
සිරස ජුනියර් සුපර් ස්ටාර් කියන්නේ මේ දවස්වල ප්‍රේක්ෂකයන් ආදරයෙන් වැළඳ ගත් රියැලිටි...
Views - 5473

කේන්ද්‍රයක මාරක අපල තිබීමටත් වඩා නොතිබීම භයානකය

IMAGE 2017 Nov 19 15:19
මහජන බැංකු විශ්‍රාමික සංගමයේ පිළියන්දල කැස්බෑව ශාඛාවේ අටවන සංවත්සරික සභාව පසුගිය...
Views - 3420

Please publish modules in offcanvas position.

Web Analytics