Coss Ear2
lakbima.lk
COSS Ear 1

සංගීත ප්‍රසංගයකට සහභාගි වන ගායකයකුට හෝ ගායිකාවකට ඒ වෙනුවෙන් ගෙවන මුදල තීරණය කිරීම කියන්නේ ඔහු හෝ ඇයගේ වටිනාකම කෙතරම්දැයි විනිශ්චයකට ලක්වන අවස්ථාවක් කීවොත් වඩාත් නිවැරදියි. මොකද එහිදී ඔහු හෝ ඇයගේ ප්‍රවීණත්වය, ජනප්‍රියත්වය සහ දක්ෂතා ආදී සෑම දෙයක් ගැනම සැලකිල්ලට ගැනීම බොහෝ විට සිදුවෙනවා. 
ඒ කොහොම වුණත් සමහර ගායක ගායිකාවන් ප්‍රසංග සංවිධායකයන්ගේ පැරැත්තය නිසාම අඩු මුදලකට ගී ගයන අවස්ථාවන්ද නැතුවා නොවෙයි. නමුත් තමා නම් තමන්ගේ වටිනාකම කවදාවත් බාල්දු කර නොගන්නා බවයි ප්‍රවීණ සංගීතවේදී ආචාර්ය දයාරත්න රණතුංග පවසන්නේ. ‘රිද්ම’ සමග කතා බහට එක්වූ ආචාර්ය දයාරත්න රණතුංග සහ මහාචාර්ය අමරා රණතුංග සිය 
‍‍‍ජ්‍යෙෂ්ඨත්වයට අනුව ලැබුණු සහ නොලැබුණු දෑ ගැනත් මේ සංවාදයේදී රටට හෙළි කළා. 
 
දයාරත්න සහ අමරා රණතුංග යුවළගේ අලුත් ගීත නිර්මාණයක් බොහෝ කලකින් ජනතාවට රස විඳින්නට නොලැබුණේ ඇයි? 
දයාරත්න- අපේ අලුත් ගීත නිර්මාණ ඕනෑ තරම් තියෙනවා. හැබැයි ඒවා මාධ්‍යවලින් ප්‍රචාරය වෙන්නේ නැහැ. කාලයක් තිස්සේ අහන්නට ලැබෙන ගීතවලටම තමයි මාධ්‍යවලින් ඉඩකඩ ලබාදෙන්නේ.
 
දශක ගණනාවක් තිස්සේ සංගීත ක්ෂේත්‍රයේ රැඳී සිටින ඔබ දෙපළට ගීත ලෝලීන් දක්වන ඇල්ම තවමත් එදා වගේමයි කියලා කියන්න පුළුවන්ද? 
දයාරත්න - ඇත්තෙන්ම ඔව්. අපි දෙන්නා ඇමෙරිකාවේ සංචාරයකට සහභාගි වෙලා මීට දින දෙක තුනකට කලින් තමයි ආපහු ලංකාවට ආවේ. ඒ සංචාරයේදී අපි ඇමෙරිකාවේ ප්‍රාන්ත ගණනාවකටම ගිහින් ප්‍රසංග පැවැත්වුවා. ඒ ප්‍රසංගවලදී ලැබුණු ප්‍රතිචාරවලින් අපට තේරුම් ගියා ලංකාවේ විතරක් ‍නෙවෙයි ලංකාවෙන් පිට ජීවත්වන ලාංකිකයන් පවා එදා වගේම අදත් අපේ හඬට ඇලුම් කරනවා කියලා. 
අමරා - අපේ පැරණි ගීත තමයි හුඟක් දෙනා තවමත් අපෙන් ඉල්ලන්නේ. ඒ ගීත ගැන ඔවුන් තුළ තිබෙන මතකය ගැන ඇතැම් වෙලාවට පුදුමත් හිතෙනවා. 
 
නමුත් ඔබ දෙදෙනා ලංකාවෙ පැවැත්වෙන ප්‍රසංගවලදී දැන් දකින්නට ලැබෙන්නේ ටිකක් අඩුවෙන් ඇයි ඒ? 
දයාරත්න - එළිමහන් ප්‍රසංගවලට සහභාගි වීම අපි තරමක් සීමා කරලයි තියෙන්නේ. දැන් අපි වැඩිපුරම සහභාගි වෙන්නේ ශාලාවල පවත්වන ප්‍රසංගවලටයි. 
 
ඔබ දෙදෙනාටම තවමත් හොඳින් ගායනා කිරීමේ හැකියාව තියෙනවා. එහෙම තියෙද්දී ඇයි ඒ වගේ තීරණයක් ගත්තේ?
දයාරත්න - ඒකට හේතුව කීපයක්ම තියෙනවා. එකක් තමයි, එළිමහන් ප්‍රසංගවල පවතින වාතාවරණය අපේ ගීතවලට නොගැළපෙන බවක් අපට තේරුම් යාම. එළිමහන් ප්‍රසංගවලදී මුලින්ම සංගීත කණ්ඩායම තරමක් බාල මට්ටමින් ගීත ගායනා කළාට පස්සේ අපි ඇවිල්ලා ඊට හාත්පසින් වෙනස් විදිහට පෙරදිග ලක්ෂණ තියෙන ගීත ගායනා කරන කොට රසිකත්වයේ වුණත් වෙනසක් ඇතිවෙනවා. 
 
දයාරත්න- අමරා යුවළ එළිමහන් ප්‍රසංගවලට ගී ගයන්න විශාල මුදලක් අය කරනවා කියලා රාවයක් පැතිර තිබෙනවා. ඇත්තද ඒ කතාව? 
දයාරත්න- ඔව් ඒක ඇත්ත. සමහරු අඩු මුදලට ප්‍රසංගවලට සහභාගි වෙන බව අපි දන්නවා. ඒත් අපි අපේ වටිනාකමට සරිලන මුදලක් අරගෙන තමයි එළිමහන් ප්‍රසංගවලට ගියත් යන්නේ. 
 
කොච්චර විතර ද ඒ අය කිරීම 
දයාරත්න - මම ලක්ෂ එක හමාරක විතර මුදලක් එක ප්‍රසංගයකට අය කරනවා. 
 
දෙදෙනාම සහභාගි වෙන ප්‍රසංගයක් නම්? 
දයාරත්න- දෙදෙනාම ගීත ගායනා කරනවා නම් රුපියල් ලක්ෂය බැගින් ලක්ෂ දෙකක මුදලක් අය කරන අවස්ථාවලුත් තියෙනවා. 
 
ගායක ගායිකාවන්ට එතරම් මුදලක් ගෙවන එළිමහන් ප්‍රසංග සුලබ නැහැ නේද? 
දයාරත්න- හුඟක් අයට එතරම් මුදලක් ගෙවන්න අමාරු බව අපි දන්නවා. ඒත්, අපි අපේ දැනුමට සහ ප්‍රවීණත්වයට සරිලන ගාස්තුවක් අය නොකළොත් අපේ වටිනාකම කාටවත් තේරෙන්නෙ නැහැ. අඩු මුදලකට රට වටේ තියෙන හැම ප්‍රසංගයකටම සහභාගි වුණොත් වැඩි මුදලක් හම්බ කරගන්න පුළුවන් බව ඇත්ත. හැබැයි අපි නම් එහෙම කරන්නේ නැහැ. 
 
ප්‍රවීණත්වය අතිත් ගත්තොත් ඔබ දෙදෙනාම අද වෙද්දී ඉහළ තලයකයි රැඳී ඉන්නේ? 
දයාරත්න - ඒක ඇත්ත. 1955 අවුරුද්දේ අපි දෙන්නා මහ රෑ යාමේ ගීතය ගායනා කරද්දී අද සංගීත ක්ෂේත්‍රයේ සිටින කවුරුවත් ගීත ගායනා කරලා තිබුණේ නැහැ. අමරදේව මහත්තයා පවා ඒ වෙනකොට ඉන්දියාවට ගිහින් සංගීතය හදාරමිනුයි හිටියේ. 
 
ඒ වගේම අමරා රණතුංග කියන්නේ ලංකාවේ සංගීත ක්ෂේත්‍රයේ විශේෂ සලකුණක් තැබූ කලාකාරිනියක්? 
අමරා- ඔව්. සංගීතය පැත්තෙන් ලංකාවේ පළමු වරට ආචාර්ය උපාධියක් ලබාගත්තේ මමයි. සංගීත ක්ෂේත්‍රයේ අපේ රටේ පළමු මහාචාර්යවරියත් මමයි. මම බොහෝම දුෂ්කර ගමන් මගක ගිහිල්ලයි ඒ ජයග්‍රහණ ලබාගත්තේ. මම මග එළිපෙහෙළි කර තිබූ නිසා මගෙන් පස්සේ අයට ඒ ගමන යන එක ඒ තරම් අපහසු වුණේ නැහැ. 
 
සංගීතය පැත්තෙන් ගිය ගමන දිහා බලද්දී ඔබ දෙදෙනාට ඒ වෙනුවෙන් ලැබුණු තනතුරු සහ ඇගයීම් ගැන සතුටු වෙන්න පුළුවන්ද? 
දයාරත්න- අපේ සුදුසුකම්වලට අනුව සම්මුඛ පරීක්ෂණවලට පෙනී ඉඳලා ලබාගත් තනතුරු නම් සියල්ලම වගේ අපට ලැබුණා. නමුත් දේශපාලන පත්වීම් නම් නොලැබි ගිය අවස්ථා තිබුණා. 
 
එහෙම වුණේ දේශපාලන පත්වීම් පිරිනමද්දී දේශපාලකයන් ඇතැම් විට ගන්නා වැරදි තීරණ නිසාද? 
දයාරත්න - මම ඒකට උදාහරණයක් කියන්නම්. මම තමයි ගුවන් විදුලි සංස්ථාවේ ප්‍රථම සංගීත හා පර්යේෂණ අධ්‍යක්ෂවරයා. සිංහල, දෙමළ, සහ ඉංග්‍රීසි කියන භාෂා තුනම යටතේ තමයි මම ඒ තනතුරට පත්වෙලා හිටියේ. පසු කාලෙක මා යටතේ හිටපු අමරදේව මහත්මයාටයි, කුලතිලක මහත්මයාවයි දේශපාලන පත්වීමක් විදිහට ගුවන් විදුලියේ පර්යේෂණ නිලධාරී තනතුරට පත් කළා. අමරදේව මහත්තයා පර්යේෂකයෙක් ‍නෙවෙයි. ඔහු ලංකාවේ බිහි වූ දක්ෂතම තනු නිර්මාණකරුවෙක්. ඒ අංශයෙන් ඔහුට තනතුරක් දුන්නා නම් ඒ අවස්ථාවේ ඔහුගෙන් මීට වඩා ප්‍රයෝජන ගන්න තිබුණා.
 
කලාකරුවන් දේශපාලනය කරන එක අද වෙද්දී සුලබ දෙයක්. දේශපාලනය පැත්තට යොමු වුණා නම් හොඳයි කියලා කවදාවත් හිතිලා නැද්ද?
දයාරත්න - අපි කවදාවත් කිසිම දේශපාලන පක්ෂයකට සම්බන්ධ වෙලා වැඩ කරලා නැහැ. 
අමරා - අපි දේශපාලකයන්ගේ පස්සේ ගිහින් කිසිදෙයක් අරගෙනත් නැහැ. ඉදිරියේදී එවැනි දේවල් ලබා ගැනීමේ අපේක්ෂාවකුත් නැහැ.
 
දේශපාලනය කරන්න කියලා ආරාධනා ලැබිලත් නැද්ද?
දයාරත්න - මොකද නැත්තේ? විජය කුමාරතුංගයන් පවා ඔහුගේ පක්ෂයෙන් ඡන්දය ඉල්ලන්න කියලා මට ආරාධනා කළා. මම ඒ ආරාධනය ප්‍රතික්‍ෂේප කළා. 
 
සෞන්දර්ය විශ්ව විද්‍යාලයේ සමගත් ඔබ දෙපළටම දිගු අතීතයක් තිබෙනවා.  
දයාරත්න - ඔව්. සෞන්දර්ය කලා විශ්වවිද්‍යාලයේ මුල්ම ශිෂ්‍ය ශිෂ්‍යාවන් පස් දෙනා අතරේ අමරා සහ මමත් ඉන්නවා. එදා අප සමග ඉගෙන ගත් සමහරු අද ජීවතුන් අතරත් නැහැ. 
අමරා - පසුකාලීනව අවුරුදු 47ක් මම එහි සේවය කළා.ඊට අමතරව මම ඇමෙරිකාවේ සරසවියකත් වසර දෙකක් සංගීතය උගන්වා තිබෙනවා. 
 
නමුත් අමරදේවයන්ගේ අභාවයෙන් පසු සෞන්දර්ය කලා විශ්වවිද්‍යාලයේ කුලපති ධුරය ප්‍රවීණ සංගීතඥ සනත් නන්දසිරි මහතාටයි හිමි වුණේ. 
දයාරත්න - ඔව්. සංගීත ක්ෂේත්‍රයේ අපේ තිබෙන හිතවත්කම් ඒ විදිහටම ඉදිරියටත් පවත්වා ගත යුතු නිසා අපි ඒ ගැන නිහඬව ඉන්නවා. නමුත් ‍‍‍ජ්‍යෙෂ්ඨත්වය, අධ්‍යාපන සුදුසුකම් ආදිය අනුව බැලුවොත් සුදුස්සාට සුදුසු තැන ලැබි නැති බව මේ ගැන කරුණු කාරණා හරි හැටි දන්නා අයට නම් වැටහෙනවා ඇති.
අමරා - අපි තනතුරු පස්සේ යන කලාකරුවෝ නමෛයි. අධ්‍යාපන සුදුසුකම්වලට මම ආපු දුර මට නම් හොඳටම ප්‍රමාණවත්. හැබැයි අපේ දැනුමෙන් ලංකාවේ අය වැඩ ගත්තා මදි ද කියන කනගාටුව නම් හිතට එනවා. 
 
ඔබේ දූ දරුවන් සංගීතය පැත්තට යොමු වෙලා නැද්ද? 
දයාරත්න - අපට ඉන්නේ පුතාලා දෙන්නෙක් සහ දුවෙක්. දුවගේ නම රූපශිකා රණතුංග. ඇයට සංගීතය සහ නර්තනය යන දෙඅංශයටම හැකියාව තිබෙනවා. ඇය ඉන්දියාවේ ඕචදචපචඵ විශ්වවිද්‍යාලයෙන් ආචාර්ය උපාධි ලබාගෙන මේ වන විට මියුසියස් විද්‍යාලයේ සේවය කරනවා. පුලස්ති සහ නන්දිත පුතුන් දෙදෙනාටත් හොඳ ගායන හැකියාවක් තියෙනවා. 
 
කිෂාන් කනංකෙ 
 
ඡායාරූප- තුෂාර අතපත්තු{jcomments on}

ඒ රිදී සීනු හඬ අපේ සිනමාවේ නිළියෝ කොයිතරම් ප්‍රමාණයකට ජීවය කැව්වාද? ඒ විතරක් ‍නෙවෙයි රියැලිටි තරග හරහා අද දවසේ ගායනයට පිවිසෙන නවක ශිල්පීන් ශිල්පිනියන් කී දෙනෙකුට ඒ හඬ අත්වැලක් වී ඇද්ද? ඒ අද්විතීය හ¾ෙඩ් හිමිකාරිය වන්නේ ඇන්ජලීන් ගුණතිලකයි.
ජනප්‍රිය සිනමාවේ ජනප්‍රිය ගී රැසක හිමිකාරිය වූ ඇන්ජලීන් ගුණතිලක පිළිබඳ මීට කලකට පෙර අසන්නට ලැබුණේ කනගාටුදායක පුවතක්. හදිසියේම ඇය  අසනීප වූ බව දැනගන්න ලැබුණත් ඇය මාධ්‍ය ඉදිරියට එන්නට අකමැති වූ නිසා අප ඇයව වෙහෙස කළේ නැහැ.
නමුත් මේ වනවිට ඇයගේ අසනීප තත්ත්වය තරමක් සුව අතට හැරෙමින් පවතිනවා. 
මට දැන් ටිකක් කතා කරන්න පුළුවන් එන්න අපේ ගෙදර..
පසුගිය දවසක අපට ඇයගෙන් ලැබුණේ එබඳු ප්‍රතිචාරයක්. 
ටිකක් කෙට්ටු වුණාට ඉස්සර තිබුණ ලස්සන ඒ වගේමයි අපි එහෙම කියාගෙන ගෙට ගෙවදින කොටම   ඇන්ජලීන් සුහදශීලීව හිනාවෙලා අපිත් එක්ක කතා කරන්න ගත්තා. රෝගී තත්ත්වයත් එක්ක අපැහැදිලිව තිබූ ඒ කටහඬ ආයෙමත් පැහැදිලියි. 
දැන් මම හවසට හවසට ලෙස්ලි එක්ක වැලි පාක් එකට ඇවිදින්න යනවා. මුණ ගැහෙන හැමෝම කියන්නේ ඔය කතාව තමයි.... අසනීප වුණාට පස්සේ කෑම ගත්තේම නැති කාලයක් තිබුණා. ඒ නිසා ගොඩාක් කෙට්ටු වුණා. දැන් නම් ටිකක් විතර කෑම කන්න පුළුවන්. ඒත් මට හරියන්නේ මම උයන කෑම. තව ටිකක් සනීප වුණාම කුස්සියට ගිහින් උයන්න පටන් ගන්න හිතාගෙන ඉන්නේ...
ඇන්ජලීන් කතා කරන්නේ බලා‍පොරොත්තු සහගත හඩින්. සම්පූර්ණ සුවය ලබලා ආයෙම ගී ගයන්න එන දවස උදාවනතුරු ඇය බලා ඉන්නවා. ආගිය තොරතුරු කතා කරලා මේ අභාග්‍ය සම්පන්න සිදුවීම ගැන අපි ඇයගෙන් විමසුවා. 
2016 මැයි මාසයේ තමයි මුලින්ම අසනීප තත්ත්වය මතුවුණේ. රෑ නිදාගන්න යද්දී ශාරීරික අපහසුතාවයක් දැනුණා. පහුවදා රෝහලට ගියා. එදා මාව පරීක්ෂා කරලා එදාම රෝහල් ගත කළා.'' 
වෛද්‍ය පරීක්ෂණවලින් දැනගන්න ලැබිලා තියෙන්නේ ඇන්ජලීන්ගේ මොළයේ රුධිර නාලයක ‍ලේ කැටියක් ඇති බවයි. නවලෝක රෝහ‍ලේ සහ ආශා සෙන්ට්‍රල් හි මාස ගණනක් නැවතිලා අදාළ සැත්කම් කරලා තමයි ඇය සුව අතට හැරුණේ. 
දෙවියන් වහන්සේ තමයි මාව ගලවාගත්තේ, එදා හොස්පිටල් යන්න මාව යොමුකළේ දෙවියන් වහන්සේ. බැරි වෙලාවත් දවසක් හරි පමා වුණානම් අද වෙද්දී ඇන්ජලීන් කෙනෙක් නැති වෙන්න තිබුණා.
සැත්කම් මගින් ‍ලේ කැටිය ඉවත් කළත් ඇන්ජලීන්ගේ ශාරීරික තත්ත්වය යථා තත්ත්වයට ගන්න ටිකක් අපහසු වෙලා තියෙනවා. මේ වනවිට ආයුර්වේද ප්‍රතිකාර මගින් ඇගේ අතේ සහ පයේ ඇති ආබාධිත තත්ත්වය සුව අතට ගෙන එන්නට ප්‍රතිකාර හා ව්‍යායාම් කෙරෙනවා. ඒ නිසාම අද ඇයට දෙපයින් නැඟිට ඇවිද යන්නටත් පුළුවන්කම ලැබි තිබෙනවා. 
ආයෙමත් ගී ගයන්න දෙවියන් වහන්සේ මට අවස්ථාව දෙනතුරු මම බලාගෙන ඉන්නවා ඇන්ජලීන් එහෙම කිව්වේ සිය ආදරණීය සැමියා ලෙස්ලි ගුණතිලක දිහා බලාගෙන. ඔහු තමයි මේ වනවිට ඇයගේ ළඟ ඉඳගෙන සියලුම ඇප උපස්ථාන කරන්නේ. විදෙස්ගතව පදිංචිව සිටින වැඩිමල් දියණිය මිලානි සැමියා හා දරුවන් සමග ලංකාවට ඇවිත් කාලයක් ඇන්ජලීන්ගේ තනියට ළඟ ඉඳලා ආයෙමත් පිටව ගොස් තිබෙනවා. හැබැයි ඇන්ජලීන්ගේ බාල දියණිය ඩිල්ෂානි පදිංචිවෙලා ඉන්නේ ඇන්ජලීන්ගේ නිවස ආසන්නයේමයි. 
''දරු මුණුපුරන්ගෙන් සංගීතයට යොමුවුණේ දෙවැනි දුවගේ පුතා ජූඩ් විතරයි. එයා බැංකුවක රැකියාව කරන අතර සංගීතයේ යෙදුනා. මගේ මුණුපුරාගේ සංගීත අධ්‍යක්ෂණය යටතේ මම ගී ගැයූ අවස්ථාත් තියෙනවා. 
ඒත් පහුගිය අප්‍රේල් මාසේ දෙවැනි දුවගේ මහත්තයා හදිසියේ මිය යාම නිසා ඒ ව්‍යාපාර බලාගන්න ජූඩ් රැකියාවෙන් ඉවත් වුණා. ඒ එක්කම සංගීත කටයුතුවල යෙදෙන්නට කාලයත් අඩුවුණා.'' 
පහුගියදා පැවැති සරත් දසනායක උපහාර උළෙ‍ලේදී ජෝතිපාල හා ඇන්ජලීන් ගැයූ හද විමන් දොරින් ගීතය ජූඩ් හා මීණා ප්‍රසාදනී ගායනා කළා. 
ඒ ප්‍රසංගයට ජූඩ්ට මිල්ටන් ගේ ගීතයක් ගයන්න ආරාධනාවක් ලැබුණා. මම ඒකට තදින්ම විරුද්ධ වුණා. ජෝතියි මමයි ගැයූ ගීතයන් ගැයුවට කමක් නැහැ. ඒත් මම කැමති නැහැ මගේ මුණුපුරා වුණත් වෙනත් ගායකයන්ගේ ගී ගයනවට. තමන්ගේම ගී තුළින් ඉදිරියට එන්න කියලා මම එදා ඔහුට කිව්වා. ඒ නිසා ජූඩ් එදා ගැයුවේ හද විමන් දොරින් ගීතය විතරයි.
ලෙඩක් දුකක් හැදුනම හිතවත් මිතුර මිතුරියන්, නෑදෑයින් ඇවිත් ආදරයෙන් කරුණාවෙන් කතා කරන එක ගිලන් හිතකට සැනසිල්ලක්. දශක ගණනක් කලා ක්‍ෂේත්‍රයේ රැඳී සිටි ඇන්ජලීන්ට හිතවතුන් බොහොමයක් සිටිනවා. ඇගෙන් උදව් උපකාර ලද විශාල පිරිසක්ද සිටිනවා. ඒ වගේම ඇන්ජලීන් හඩින් ඔපවත් වූ නිළියන් ගණනද විශාල ප්‍රමාණයක්. ඒත් බොහෝ අය ඇන්ජලීන්ගේ සුවදුක් බලන්නට එනවා තබා දුරකථන ඇමතුමක් වත් දෙන්නේ නැහැ. ඇන්ජලීන් ගුණතිලකගේ නිවස ඉදිරිපස පිහිටා තියෙන්නේ කාගිල්ස් ෆුඩ් සිටියයි. මේ ෆුඩ් සිටියට පැමිණෙන සමහර ජනප්‍රිය නිළියෝ පිට පාරෙන් හැරිලා යන බවද ඇය අප සමග කියා සිටියා. හෙළ ගී අඹරේ රැජිණියන් දෙදෙනකු වගේ වැජඹුණු ලතා හා ඇන්ජලීන් කාලයක් විරසක වෙලා සිටි බව කලාලොවට රහසක් ‍නෙවෙයි. ඒත් අද මේ දෙදෙනා සුහද මිතුරියන් දෙදෙනෙක්.
ලතා නිතරම මාව බලන්න එනවා. කෑම හදාගෙනත් එනවා.
ඒ වගේම සුජාතා අත්තනායක, ශ්‍රීමතී තිලකරත්න, මල්ලිකා කහවිට, රොහිනි සුදසිංහ, ශ්‍රීයානි දිසානායක වැනි ගායිකාවන්, ඇන්ජලීන්ගේ සුවදුක් බලන්න එනබවද ඈ පැවැසුවා. අසාධාරණයේදී කෙළින් කතාකරනවා වගේම යමකු තමන්ට සුළු උපකාරයක් කළත් ඉහළින් ඇගයීමේ ගුණය ඇන්ජලීන් සතුව තිබෙනවා. ඇයට ප්‍රතිකාර කළ සියලුම වෛද්‍යවරුන්, ආශීර්වාද කළ පූජකවරුන් වගේම ස්වාමීන් වහන්සේලා සියල්ලන්ගේම නම් ඇය මතකයෙන් පැවැසුවේ අපිවත් පුදුම කරමින්. ඒත් ඒ සියලුම නම් සඳහන් කරන්න ඉඩකඩ මදි නිසා ඇන්ජලීන් සමග අපිත් ඔවුන්ට ස්තූතිවන්ත වෙන්න එකතු වෙනවා. 
මම දවස පුරා කරන්නේ බයිබලය කියවන එකයි. ගීතිකා අහන එකයි. මම ගායනා කළ ගීත මම අහන්නේ නැහැ. ඒ කටහඬ අද නැහැ කියලා හිතෙනකොට දුකයි. ඒත් මගේ හඬ ආයෙම යථා තත්ත්වයට එනවා මට දැනෙනවා. පල්ලියට ගියාම ගීතිකා කණ්ඩායම ගීතිකා ගයද්දී මමත් හිමීට ගයනවා. මට දැනෙනවා මගේ හඬ ටිකෙන් ටික එනබව. දෙවියන් වහන්සේ ආයෙම මගේ හඬ  මට ලබාදෙයි. මම හදිස්සි වෙන්නේ නැහැ. එදා තිබුණු මගේ හඬ මට දෙන දවස දෙවියන් වහන්සේ තීරණය කරයි. එදාට මම නැවත ගීත ගයන්න එනවා. 
බලා‍පොරොත්තු පිරුණු හඬකින් ඇන්ජලීන් අප සමග එසේ කියා සිටියා. ඉක්මනින් සුවවෙලා යළි ගායනයට එකතු වන්නට ඇයට නිදුක් නිරෝගී සුව පතන්න අපිත් අමතක කළේ නැහැ. රිද්ම පාඨක ඔබත් ඒ ප්‍රාර්ථනය හදවතින්ම කරන බව අපි දන්නවා. 
 
ආරියවංශ කුලතිලක{jcomments on}

 

IMAGE

නෙලා සමග ඔබ හමුවට එන බෙනට්ගේ පුතා

IMAGE 2018 Feb 25 14:21
අද වෙද්දී උදාර රත්නායක කියන්නේ නළුවෙක්ද? එහෙමත් නැතිනම් දේශපාලනඥයෙක්ද? නළුකම මගේ වෘත්තිය...
Views - 687

මගෙන් නම් සල්ලි ඉල්ලුවේ නෑ ඒත් මේ වගේ කතාවක් නම් කිව්වා

IMAGE 2018 Feb 25 14:08
මේ වෙද්දී ඉන්දිකාගේ කලා දිවිය දශක දෙකකටත් එහා ගිය එකක් නේද? ඔව්. මම මුලින්ම ක්‍ෂේත්‍රයට එකතු...
Views - 1259

රනිල් සල් සපු නා හැර ගියේ ඇයි?

IMAGE 2018 Feb 25 13:52
“සල් සපු නා” ටෙලි නාට්‍යයේ දැන් රනිල්ව දකින්නට ලැබෙන්නේ නැහැ. ඇයි ඒ ? මම තාවකාලිකව ‘සල්...
Views - 1095

තාත්තගේ අකමැත්තෙන් රඟපාන්න ආපු උපාසක අම්මා

IMAGE 2018 Feb 25 12:18
කොහොමද ඔබට අංජනා එහෙමත් නැත්නම් උපාසක අක්කා වෙන්න අවස්ථාව ලැබුණේ? මාව උපාසක අම්මා කළේ...
Views - 843

බසයේදී දුන් බොරු විවාහ පොරොන්දුවෙන් පවුල්ජීවිතේ 'හබක්'

IMAGE 2018 Feb 23 12:25
ඔහු අගනුවර ප්‍රසිද්ධ සමාගමක විධායක නිලධාරියෙකි. වයස අවුරුදු 40 ඉක්මවූ ඔහුට රූමත් බිරිඳක් සහ...
Views - 5527

අහිමි පෙම ඉල්ලා පෙම්වතියට ප්‍රසිද්ධියේ ගුටි ඇනලා

IMAGE 2018 Feb 23 10:42
පැරණි පෙම්වතියගෙන් අහිමි වූ ආදරය නැවත ඉල්ලා එය නොලැබුණු විට නාරාහේන්පිට ප්‍රදේශයේදී ඇයට...
Views - 3646

Please publish modules in offcanvas position.