Coss Ear2
lakbima.lk
COSS Ear 1

ප්‍රවීණ චිත්‍රපට අධ්‍යක්ෂ සෝමරත්න දිසානායක විසින් නිර්මාණය කරන ලද චිත්‍රපට ලැයිස්තුව දෙස බලන ඕනෑම කෙනෙකුට එක්තරා ‍පොදු නිගමනයකට එන්න පුළුවන්. ඒ තමයි ‘ළමා සිනමා’ ප්‍රේක්ෂකයන් විශාල පිරිසක් ඔහු වටා එක් රොක්ව සිටින බව. කොහොම නමුත් ඔහුගේ අලුත්ම චිත්‍රපටය තිරයට එද්දී, ළමයින් ඉලක්ක කරගෙන චිත්‍රපට හදන අධ්‍යක්ෂවරයකු විදිහට ඔහු ගැන ගොඩනැගී තිබෙන ප්‍රතිරූපය නම් වෙනස් වෙනවාට කිසිදු සැකයක් නැහැ. ලංකාවේදී ප්‍රදර්ශනයට තවමත් අවසර ලැබි නැතත්, එම චිත්‍රපටය විදෙස් සිනමා උළෙලකදී පළමු වරට ප්‍රදර්ශනය කිරීමට පසුුගියදා ඔහුට අවස්ථාව හිමි වුණා. බූසාන් අන්තර්ජාතික සිනමා උළෙ‍ලේදී පැවැත්වූ එම මංගල දර්ශනයෙන් අනතුරුව යළි මෙරටට පැමිණි විගස සෝමරත්න දිසානායක සිය සිනමා ජීවිතයේ අලුත්ම පෙරළිය ගැන මුල් වරට කතා බහ කරන්නට ‘රිද්ම’ සමග මෙලෙස අත්වැල් බැඳ ගත්තා. 
 
ප්‍රවීණ සිනමාකරුවෙක් විදිහට ඔබට ජාත්‍යන්තර සිනමා උළෙලක් කියන්නේ ආගන්තුක දෙයක් ‍නෙවෙයි. 
නමුත්, ඔබේ චිත්‍රපටයක් වෙනුවෙන් පසුගියදා ඔබ බූසාන් සිනමා උළෙලට සහභාගි වූ අවස්ථාව නම් ඔබට තරමක් විශේෂයි කියලා කියන්න පුළුවන් නේද? 
ඔව්. ඒ විශේෂත්වය තමයි එම සිනමා උළෙ‍ලේදී ප්‍රදර්ශනය කෙරුණු මගේ නවතම චිත්‍රපටය මම මීට පෙර නිර්මාණය කළ චිත්‍රපටවලට වඩා බොහෝ් සෙයින් වෙනස් එකක් වීම. එය වැඩිහිටියන්ට පමණක් නැරඹීමට සුදුසු චිත්‍රපටයක්. චිත්‍රපටයේ නම තමයි “අන්ඩර් පෑන්ට්ස් තීෆ්” සිංහලෙන් කියනවා නම් “ජංගි හොරා.”
 
ළමයින් වෙනුවෙන් චිත්‍රපට හදලා සිංහල සිනමාවේ ආදායම් වාර්තා පිහිටවපු ඔබ ඇයි වැඩිහිටියන්ට පමණක් සීමා වූ චිත්‍රපටයක් හදන්න හිතුවේ? 
මම මීට පෙර නිර්මාණය කළ හැම චිත්‍රපටයක්ම ළමයින් මූලික කරගත් ඒවා බව ඇත්ත. ඒවා  ළමයින්ද  ඇතුළුව පවු‍ලේ සැමට නැරඹීමට සුදුසු චිත්‍රපට. නමුත් මට හිතුනා සිනමාකරුවෙක් විදිහට මම හැමදාම එකම සීමාවකට කොටු වී සිටිය යුතු නැහැ කියලා. එහි ප්‍රතිඵලය තමයි මේ චිත්‍රපටය. 
 
අමුතුම විදිහේ නමක් එක්ක, අමුතුම කතාවක්ද මේ චිත්‍රපටයෙන් ඔබ කියන්න හදන්නේ? 
හරියට හරි. මෙහි ප්‍රධාන චරිතය එක්තරා  මානසික ව්‍යාධියකින් පෙළෙන පුද්ගලයෙක්. ඔහු කාන්තා යට ඇඳුම් හොරකම් කරනවා. ඔහුගේ මේ හැසිරීම ඔහුගේ පවු‍ලේ උදවියටත් විශාල ගැටලුවක් වෙනවා. පුබුදු චතුරංග තමයි මේ චරිතය රඟපාන්නේ.
 
ඔබ මීට කලින් තිරයට ගෙන ආ “සරිගම” චිත්‍රපටය පාඩු ලැබිම මේ විදිහේ චිත්‍රපටයක් හදන්න ඔබව පෙළඹුවා කියන්න බැරිද? 
“සරිගම” පාඩු ලැබුවේ නැහැ. චිත්‍රපටයට ගිය වියදම හොයාගන්න මට පුළුවන් වුණා. හැබැයි මගේ වෙනත් චිත්‍රපට වගේ ආදායම් වාර්තා පිහිටුවන්න සරිගම චිත්‍රපටයට නොහැකි වූ බව නම් ඇත්ත. 
 
ඊට කලින් ඔබේ චිත්‍රපටවලට එවැනි ඉරණමක් අත් වුණේ නැහැ. ඇයි මෙදා පාර විතරක් ඔබ ගහපු තුරුම්පුව වැරදුණේ? 
එහෙම වුණේ චිත්‍රපටයේ වරදක් නිසා ‍නෙවෙයි. “සරිගම” කියන්නේ ප්‍රේක්ෂක ආකර්ෂණය ලැබෙන විදිහේ චිත්‍රපටයක්. නමුත් අපේ සිනමා කර්මාන්තයේ පවතින චිත්‍රපට බෙදා හැරීමේ වියවුල නිසයි ප්‍රධාන වශයෙන්ම “සරිගම”ට එවැනි ඉරණමක් අත් වුණේ. චිත්‍රපටය ප්‍රදර්ශනයට තෝරාගත් මණ්ඩලයත් අසාර්ථකත්වයට බලපෑවා. උදාහරණයක් විදිහට කීවොත් මුළු මධ්‍යම පළාතේම ඒ මණ්ඩලයට සිනමා හලක් තිබුණේ නැහැ මගේ චිත්‍රපටය ප්‍රදර්ශනය කරන්න. 
 
සරිගම චිත්‍රපටයෙන් අත්කරගන්නට බැරි වුණු ආර්ථික ජයග්‍රහණ මේ වගේ චිත්‍රපටයකින් අත්කරගන්න හැකි වේවි කියලා හිතෙනවාද? 
කොහෙත්ම නෑ. මේ චිත්‍රපටයෙන් මට ආර්ථික වශයෙන් පාඩු වේවි කියලයි මට හිතෙන්නේ. මොකද මීට පෙර මගේ සිනමා නිර්මාණ වටා එක්රොක්වී සිටි විශාල ප්‍රේක්ෂක පිරිසක් මට මේ චිත්‍රපටයේදි අහිමි වේවි. මෙය පවු‍ලේ චිත්‍රපටයක් නොවීම නිසා මට සිදුවන ආර්ථිකමය අවාසිය දැන දැනම තමයි මම මේ චිත්‍රපටයට අත ගැහුවේ. 
 
කතා තේමාවට උචිත නමක් චිත්‍රපටයට යෙදුවාට චිත්‍රපටය ප්‍රේක්ෂකයන් ඉදිරියට රැගෙන යද්දි ප්‍රේක්ෂකයන්ගෙන් නරක ප්‍රතිචාරත් ලැබේවි කියලා හිතෙන්නේ නැද්ද? 
දැනටමත් මට ඒ විදිහේ අත්දැකීම්වලට මුහුණ දෙන්න සිදු වෙලයි තියෙන්නේ. මේ චිත්‍රපටයේ සිංහල නම තමයි “ජංගි හොරා.” හැබැයි ඒ නමට මේ වෙනකොට බොහෝ දෙනකුගේ විරෝධයක් තියෙනවා. “ජංගි හොරා” කියලා නම දාන්න එපා කියලයි මා සමග කතා බහ කරන හුඟක් අය කියන්නේ. මේ නිසා මමත් මේ නම ගැන දෙගිඩියාවකින් තවමත් ඉන්නේ. 
 
සිංහල නම කොහොම වෙතත් ඔය විරෝධතාවය නිසා චිත්‍රපටය ප්‍රදර්ශනය කරන කාලය වන විට ඉංග්‍රීසි නමත් චිත්‍රපටයෙන් හැ‍ලේවිද? 
එහෙම නම් වෙන එකක් නැහැ. මම කැමතියි. “අන්ඩර් පෑන්ට්ස් තීෆ්” කියන නමට. කොහොමත් ඒ නමින් තමයි මම චිත්‍රපටය ලියාපදිංචි කරලා තියෙන්නෙත්. අනික මම සිංහල නම කිව්වත් නැතත් ප්‍රේක්ෂකයෝ මේ චිත්‍රපටයට “ජංගි හොරා” කියලා කියන බවට නම් සැකයක් නැහැ. 
 
කිෂාන් කනංකෙ 

අපේ රටේ සාමාන්‍යයෙන් අධ්‍යක්ෂණය සඳහා කාන්තා දායකත්වය ලැබෙන්නේ අඩුවෙන්. සුමිත්‍රා පීරිස් හා ඉනෝකා සත්‍යාංගනී හැරුණු විට අධ්‍යක්ෂණයට පිවිසි සියලුම කාන්තාවන් මුලින් නිළියන් ලෙස නමක් හදාගෙනය පසුකාලීනව තමයි අධ්‍යක්ෂණයට යොමුවුණේ. ප්ලොරිඩා ජයලත්, රූබි ද මැල්, රෝහිණී ජයකොඩි, මාලනී ෆොන්සේකා හා ශ්‍රියානි අමරසේන මේ ආකාරයට අධ්‍යක්ෂණයට පිවිසුණා. මේ කර්තව්‍යයට දැන් අපේ තවත් ප්‍රවීණ නිළියක් එකතු වෙලා ඉන්නවා. ඇය දමයන්ති ෆොන්සේකා. වේදිකා නාට්‍යය, ඒකාංගික ටෙලි නාට්‍යය හරහා අධ්‍යක්ෂණයේ අත්‍පොත් තැබූ දමයන්ති මේ දිනවල සිය කුළුඳුල් ප්‍රාසාංගික ටෙලි නාට්‍ය අධ්‍යක්ෂණයේ නියැළිලා ඉන්නවා. ඇගේ වැඩිමල් සොයුරිය වන මාලනී ෆොන්සේකාත් මෙහි රඟපෑම විශේෂයි. 
 
දමයන්ති මේ දිනවල අලුත් වැඩකට අත ගහලා නේද?
ඔව්, මගේ කුළුඳුල් ප්‍රාසාංගික ටෙලි නාට්‍යයේ රූගත කිරීම් ඇරඹුණා. මේ දවස්වල තණමල්විල හා කළුතර ප්‍රදේශවල එහි රූගත කිරීම් සිදුවනවා. ටෙලි නාට්‍යයේ නම රංකිරි අම්මා
 
රංකිරි අම්මා මොන වගේ කතාවක්ද? 
එය 1930 දශකය තේමා කරගත්තු කතාවක්. පසුකාලයේ ඉහළම පෙළේ ව්‍යාපාරිකයන් වුණේ මේ යුගයේ දකුණෙන් කොළඹට ආපු අය. මේ කතාව සැබෑ චරිතයක් වටා ගෙතුන එකක් ‍නෙවෙයි. හැබැයි මේ කතාවෙන් කියැවෙන්නේ දකුණු පළාතේ දුෂ්කර ගමක තරුණයෙක් කොළඹ ඇවිත් ජීවිතය ජය ගන්න විදිය. මෙම නාට්‍ය කොටස් පනස් ගණනක ටෙලි නාට්‍යයක්.
 
රංකිරි අම්මා නිර්මාණයට දායක වන ශිල්පීන් ගැන කතා කළොත්? 
මෙය දයා රාජපක්ෂගේ කතාවක්. ඒත් පිටපත රචනා කළේ මම හා අජිත් සේරම් එකතුවෙලා. මෙහි මාලනී ෆොන්සේකා, රෝහණ බැද්දගේ, සරත් කොතලාවල, සමන්ති ලැනරොල්, මාධනී මල්වත්තගේ, ශ්‍යාම් ප්‍රනාන්දු, උමයංගනා වික්‍රමසිංහ,        විභීෂණ කුරේ, කෝකිල පවන්, නයෝමි තක්ෂිලා, තාරක ‍පොතුපිටිය, අසංක රුවන් ඇතුළු විශාල පිරිසක් රංගනයෙන් එකතු වනවා. 'රංකිරි අම්මා' නිෂ්පාදනය කරන්නේ ලසන්ත තෙන්නකෝන් සහ තිලිණි අනුරාධා. මේ සඳහා රේඛීය නිෂ්පාදනයෙන් අසංක රුවන් ‍පොතුපිටිය, එකතු වෙනව. සජිත් විජිතසූරිය (කැමරා), ධම්මික හේවාවික්‍රම (කලා අධ්‍යක්ෂණය) ධනුෂ්ක හුලංගමුව (අංග රචනය) සුනිල් කරුණාරත්න (සහය අධ්‍යක්ෂණය) ඇතුළු විශාල පිරිසක් මේ සඳහා එකතුවනවා. 
 
රංකිරි අම්මා දමයන්ති ෆොන්සේකාගේ කුළුඳුල් අධ්‍යක්ෂණය ‍නෙවෙයි නේද?
මීට කලින් මම වේදිකා නාට්‍ය තුනක්, ඒකාංගික ටෙලි නාට්‍ය තුනක් අධ්‍යක්ෂණය කරලා තියෙනවා. මේ මගේ තුන්වැනි අධ්‍යක්ෂණය. හැබැයි ප්‍රාසාංගික නාට්‍යයක් පළවෙනි වතාවට තමයි මම අධ්‍යක්ෂණය කරන්නේ. 
 
ඔබේ සොයුරිය වන සිනමාවේ නිළි රැජින මාලනී ෆොන්සේකාව දර්ශන තලයේදී මෙහෙයවීම ඔබට කොයි වගේ අත්දැකීමක් වුණාද?
මාලනී ෆොන්සේකා කියන්නේ හෙළ සිනමාවේ නිළි රැජින. නමුත් ඇය ඉතාම ආධුනික අධ්‍යක්ෂවරයෙකුට වුවත් මෙහෙයවන්නට හැකියාව ඇති ඉතාම නම්‍යශීලී චරිතයක්. රංකිරි අම්මා ටෙලි නාට්‍යයේ කිරිහාමි කියන චරිතය තමයි මාලනී අක්කා රඟපෑවේ. තණමල්විල ප්‍රදේශයේ කාෂ්ටක අව්වේ සෙරෙප්පු දෙකක්වත් නැතුව අක්කා කළ කැපවීම ගොඩක් 
අගය කළ යුතුයි. 
 
ප්‍රසන්න විතානගේ කියන ජාත්‍යන්තර සම්මානලාභී අධ්‍යක්ෂවරයා ඔබේ සැමියා. ඔහු ඔබේ සෙවණැල්ල වගේ සිටින නිසා අධ්‍යක්ෂණයේදීත් බොහෝ ගුරුහරුකම් ලැබෙනවා ඇති?
ඔය ප්‍රශ්නයට උත්තර දෙන්න කලින් මම ‍පොඩි උදාහරණයක් කියන්නම්. ප්‍රසන්නගේ පුරහඳ කළුවර  චිත්‍රපටයේ ජෝ අබේවික්‍රමගේ දියණියගේ චරිතයට මුලින්ම තෝරාගත්තේ මාව. මම තමයි ඒ චරිතයට නයනා හෙට්ටිආරච්චි සුදුසු බව යෝජනා කළේ. ප්‍රසන්නයි මමයි එක්තරා සම්මුතියකට එළැඹුණේ අපි විවාහ වන විටදීයි. දෙදෙනාගේ නිර්මාණ කාර්යයන්ට දෙදෙනා කිසිම බලපෑමක් කරන්නේ නැහැ කියලා අපි තීරණය කරගත්තා. අධ්‍යක්ෂණය සම්බන්ධ මම යම් උපදෙසක් ඇහුවොත් ඔහු ඊට උදව් කරනවා. එහෙම නැතුව මගේ කටයුතුවලට කිසිම බලපෑමක් ඔහුගෙන් එල්ලවන්නේ නැහැ. ඒ නිදහස නිසා තමයි මට පුළුවන් වෙලා තියෙන්නේ කලා කටයුතු සාර්ථක කරගන්න. 
 
රංකිරි අම්මා ටෙලි නාට්‍යයට ඔබ රංගනයෙන් දායක නොවුණේ ඇයි? 
රඟපාන අතරේ අධ්‍යක්ෂණය කරන එක පහසු නැහැ. ඒ හින්දා ඒ දෙකම කළේ නැහැ. 
අධ්‍යක්ෂවරියක් විදියට තවත් පරිණත වුණාම මගේ නිර්මාණයක මට රඟපාන්න පුළුවන් වේවි.
 
අධ්‍යක්ෂවරියක් විදියට ඔබේ ඊළඟ ඉලක්ක මොනවාද? 
කතා තේමා කීපයක් තියෙනවා. මේ නිර්මාණය ඉවර වෙලා තමයි ඒවාට අත ගහන්නේ. අධ්‍යක්ෂවරියක් විදියට මගේ ලොකුම ඉලක්කය සිනමාව ජයගැනීම.
 
ආරියවංශ කුලතිලක
IMAGE

මට දැන් තාත්තා ගැන තියෙන්නේ අනුකම්පාවක් විතරයි

IMAGE 2018 Feb 18 10:28
ආචාර්ය  වික්ටර් රත්නායකයන්ගේ පුතුන් දෙදෙනා වන ජයන්ත සහ ලෙලුම් ගැන අද වෙද්දී මුළු රටම...
Views - 40

ග්‍රැන්ඩ්පාස් ගොඩනැගිල්ල කඩා වැටීම සොයුරාගේ සැලසුමක් -...

IMAGE 2018 Feb 16 13:54
හත්දෙනෙකුට මරු කැඳවමින් පසුගිය (14) දා ග්‍රැන්ඩ්පාස් ගොඩනැගිල්ල කඩා වැටීමේ සිද්ධිය...
Views - 2969

මනාලයාගේ 'දෙනෙත් උඩ රැන්දූ' මනාලියගේ රැකියාව

IMAGE 2018 Feb 16 12:26
අනුරාධපුරයට ආසන්න නිකැලැල් චරිතවත් යුවතියක සඳහා මනාලයෙකු සොයන බව මීට සති කිහිපයකට ඉහත ඉරිදා...
Views - 6225

හෙදිය සමූහ දූෂණයට විනයාරක්ෂක කපිතාන් අල්ලයි

IMAGE 2018 Feb 14 23:55
රංචු ගැසී පුද්ගලික රෝහලක හෙදියක් සමූහ දූෂණයට ලක් කිරීමේ සිද්ධිය සම්බන්ධයෙන් ‍පොලීසියට...
Views - 5202

ඡන්ද ප්‍රතිඵල වලින් පස්සෙ සමහරුන් බුම්මාගෙන ඉන්නේ ඇයි?

IMAGE 2018 Feb 14 13:39
මෙවර පළාත් පාලන ඡන්දයේ දී මෙන්ම  සෑම මැතිවරණයකදීම කිසියම් පිරිසක් ජයග්‍රහණය කරන විට ඊට...
Views - 3115

හොර හැඳුනුම් පතක් ගෙන ප්‍රේම ලෝකයට බසින 'වැලන්ටයින්'

IMAGE 2018 Feb 14 09:22
පෙම්වතුන් පෙම්වතියන් අතර හෝ අඹු සැමියන් අතර පවත්නා ආදරය ලිංගිකත්වය හා අනුරාගය මත පදනම් වූ...
Views - 3069

Please publish modules in offcanvas position.